60-ANYOS NA BABAE PATAY NANG MAGBIGTI SA LAGUINBANWA EAST, NUMANCIA

Patay ang isang 60 anyos na babae makaraang magbigti sa kwarto ng kanilang bahay sa Laguinbanwa East, Numancia, Aklan ngayong hapon.

Kinilala ang nasabing biktima sa pangalang Helen Placido y Francisco, tubong Mercedes, Madalag.

Sa panayam sa kanyang anak na si Jorelyn, 19, dakong alas-5:00 ng hapon nang matagpuang nakabigti ang biktima gamit ang isang lubid.

Agad namang rumesponde ang mga kapulisan at isinakay sa patrol ang biktima para isugod sa ospital gayunman dineklara ring dead on arrival.

Ayon sa pamilya, posible umanong nagpakamatay ito dahil sa iniindang na sakit.

MGA BALA NG BARIL NAREKOBER SA ISANG BAKURAN SA BRGY. NAVITAS, NUMANCIA

ulat ni Darwin Tapayan, Energy FM 107.7 Kalibo

Dinala sa isang police station ang mga bala ng dalawang magkaibang kalibre matapos makita ito sa isang bakuran sa brgy. Navitas, Numancia.

Sa report ng pulisya, ang mga itinurn-over ay siyam na piraso ng empty shell ng caliber 9mm at anim na empty shell ng caliber .45.

Itinurn-over ang mga ito ni Petra Tipay, 54 anyos, residente ng nasabing lugar.

Una rito, ayon kay Tipay, pasado ala-1:00 ng madaling araw, narinig niya sa labas ng kanilang bahay ang isang lalaki na tinatawag ang kanyang anak para mag-inuman.

Hindi umano niya ito pinansin sa kabila na ilang beses na nagtatawag ang lalaki sa labas pero ilang minuto anya ay nakarinig siya ng ilang putok ng baril.

Namataan umano niya ang lalaki at kinilala niyang si Jay Yacub, nasa legal na edad at residente rin ng nasabing lugar.

Matapos maireport ang insidente sa pulisya, ay agad na nagsagawa ng imbestigasyon ang mga awtoridad para sa ikadarakip ng suspek gayunman ay nakatakas na umano roon.

Patuloy pa ang ginagawang imbetigasyon ng mga awtoridad hinggil sa nasabing insidente.

19-ANYOS NA LALAKI NATULOG SA GITNA NG NATIONAL HIGHWAY, NABANGGAAN NG MOTORISKLO

ulat ni Darwin Tapayan, Energy FM 107.7 Kalibo

Nabundol ng isang motorsiklo ang isang 19-anyos na lalaki na natulog sa gitna ng national highway sa brgy. Tabangka, Numancia dakong alas-10:00 ng gabi.

Sa report ng Numancia PNP station, kinilala ang lalaki na si Rollan Balsomo, tubong Negros Occidental at pansamantalang nakatira sa brgy. Badio, Numancia.

Ayon sa pulisya, binabaybay ni John Rey Tibar, 27, ang kahabaan ng national highway mula sa brgy. Poblacion, Makato sakay ng kanyang motorsiklo nang maaksidente siya sa brgy. Tabangka.

Salaysay ng motorista, patungo sana siya sa bayan ng Kalibo nang mabundol niya ang lalaki na napag-alamang nasa ilalim ng nakalalasing na inumin.

Agad namang dinala ng motorista ang sugatang lalaki sa provincial hospital para mabigyan ng kaukulang lunas.

Buluntaryong sumuko sa tanggapan ng Numancia PNP ang motorista na nagtamo rin ng ilang sugat sa katawan samantalang ang lalaki ay naconfine sa provincial hospital.

SUSPEK SA CAMANCI NORTE SHOOTING, NEGATIBO SA RESULTA NG PARAFFIN TEST

ulat ni Darwin Tapayan, Energy FM 107.7 Kalibo

Negatibo ang resulta ng paraffin test na isinagawa sa suspek sa nangyaring pamamaril sa Camanci Norte, Numancia Miyerkules ng gabi.

Si Kevin Cangson, 25 anyos, tubong Odiongan, Romblon at kasalukuyang nakatira sa brgy. Camanci Norte ay hindi nakitaan ng gun powder nitrate.

Ang paraffin test ay ginawa ni PCInsp.  Cirox Omero, forensic chemist ng Crime Laboratory, noong Hulyo 6 ng gabi at naglabas ng resulta nitong Hulyo 9.

Ayon kay PCInsp. Ulysses Ortiz, acting provincial chief ng Crime Laboratory, ang resultang ito ay hindi makakaapekto sa kasong isinampa laban sa suspek.

Paliwanag ni Ortiz, batayan parin ng kaso ang mga testimonya ng mga saksi sa nasabing krimen.

Posible anyang magnegatibo ang isang tao bagaman nagpaputok ito ng baril sa ilang kadahilan kabilang na kapag ang suspek ay naka-gloves at kung malakas ang hangin.

Si Cangson ay isa sa itinuturong suspek sa pagbaril sa apat na  tanod ng brgy. Camanci Norte na ikinamatay ng tatlo at ikinasugat ng isa pa.

COMPOSITE SKETCH NG ISA PANG SUSPEK SA PAGBARIL SA 4 NA TANOD INILABAS NA NG PNP

ulat ni Darwin Tapayan, Energy FM 107.7 Kalibo

Inilabas na ng Numancia municipal police station ang composite sketch ng isa pang suspek sa nangyaring pamamaril sa peryahan sa brgy. Camanci Norte, Numancia Myerkules ng gabi.

Sa ngayon, ayon sa Numancia PNP ito ay 80 porsyento nang facial computer composite sketch ng suspek base sa mga testimonya ng mga saksi.

Ang nasabing composite sketch ay nabuo sa pamamagitan ng trained personnel ng Regional Crime laboratory ng Philippine National Police.

Matatandaan na apat na tanod ang pinagbabaril sa nasabing papamaril kung saan tatlo rito ang napatay at isa ang sugatan.

Dalawa rin ang napag-alaman na natamaan ng ligaw na bala – isang 9-anyos na babae at 23 anyos na lalaki na nagtamo ng mga daplis ng bala sa kanilang katawan.

Una nang naaresto at nasampahan ng kaso ang isa sa dalawang suspek na kinilalang si Kevin Cangson, 25 anyos at tubong Odiongan, Romblon.

Nanawagan ang mga kapulisan sa taumbayan na ipagbigay-alam agad sa kanilang tanggapan ang anumang impormasyon kaugnay sa cartographic sketch na ito.

SUSPEK NA BUMARIL SA KANYANG KAPATID SA BRGY. BULWANG, NUMANCIA SUMUKO NA SA PULISYA

ulat ni Darwin Tapayan, Energy FM 107.7 Kalibo

Sumuko na sa mga kapulisan ang suspek sa pagbaril sa kanyang kapatid sa brgy. Bulwang, Numancia Linggo ng hapon.

Kahapon ng umaga ay boluntaryong sumuko sa isang miyembro ng Kalibo police station ang suspek na Joewhan Borrega, 39 anyos, at residente ng nasabing lugar.

Agad namang dinala sa Numancia municipal police station ang suspek at pansamantalang ikinulong doon.

Matatandaan na pinagbabaril ng suspek ang kanyang kapatid na si Jeffrey Borega, 34 anyos, na dahilan ng kanyang agarang kamatayan.

Una rito, sinugod ng biktima ang suspek sa kanilang bahay at nanggugulo doon.

Sinubukan ng news team na kunan ng pahayag ang suspek kung ano ang malalim na motibo kung bakit niya nabaril ang kapatid gayuman man ay tumaggi itong makapanayam.

Ayon naman sa Numancia PNP, posibleng hindi na magsasampa ng kaso ang pamilya ng biktima at sa halip ay aayusin nalang ang kanilang problema.

SUSPEK SA PAMAMARIL SA CAMANCI NORTE, SINAMPAHAN NA NG KASO

ulat ni Darwin Tapayan, Energy FM 107.7 Kalibo

Sumailalim na sa inquest proceeding ang suspek sa nangyaring pamamaril sa brgy. Camanci Norte, gabi ng Miyerkules na ikinamatay ng tatlong barangay tanod at ikinasugat ng tatlo pa.

Ayon kay PO2 Marlon Del Rosario, imbestigador ng Numancia PNP, nahaharap sa tatlong counts of murder, at attempted murder si Kevin Cangson, 25 anyos, at driver ng riding in tandem.

Si Cangson ang tinuturong nakabaril sa tatlong tanod na ikinamatay nina Rogelio Saron, Jesconie Isidro, at ikinasugat ni Danilo Villorente na patuloy pang inoobserbahan sa isang pribadong ospital.

Una nang itinanggi ng suspek ang alegasyon sa kanya sa naging panayam ng Energy FM Kalibo.

Giit niya at ng kanyang live-in parter, nakacheck-in umano sila sa hotel kasama ng pamilya ng babae nang mangyari ang insidente.

Patuloy naman ang imbestigasyon ng mga kapulisan hinggil sa nasabing insidente sa posibleng pagkakakilalan at ikadarakip ng isa pa niyang kasama na sinasabing bumaril at pumatay sa tanod na si Walter Rembulat.

34 ANYOS NA LALAKI PATAY NANG PAGBABARILIN NG KANYANG KAPATID

ulat ni Archie Hilario, Energy FM 107.7 Kalibo

Patay ang isang 34 anyos na lalaki makaraang pagbabarilin ng kanyang sariling kapatid sa brgy. Bulwang, Numancia kahapon ng hapon.

Kinilala ang biktima na si Jeffrey Borega, laborer, at residente rin ng nasabing lugar.

Ayon kay PO2 Felizardo Navarra Jr., imbestigador ng Numancia PNP station, nakainom umano ang nasabing biktima at nanggugulo sa kanilang bahay.

Pinagbabasag pa umano ng biktima ang mga bote ng tindang soft-drinks at beer ng kanyang manugang bago ito sumugod sa bahay ng kanyang kapatid.

Dito, kumuha umano ng hindi pa malamang kalibre ang suspek na si Joewhan Borrega, 39 anyos at pinagbabaril ang biktima.

Nagtamo ng sugat sa dibdib at tiyan ang biktima at mabilis na isinugod sa provincial hospital pero hindi na ito umabot pa ng buhay.

Samantala, tumakas naman ang suspek at patuloy pang pinaghahanap ng mga kapulisan.

SUSPEK SA PAMAMARIL SA CAMANCI NORTE SUMAILALIM NA SA PARAFFIN TEST

Ulat ni Darwin Tapayan, Energy FM 107.7 Kalibo

Sumailalim na sa paraffin test sa crime laboratory ang nahuling suspek sa pamamaril sa brgy. Camanci Norte, Numancia Miyerkules ng gabi.

Ito ang kinumpirma ni PO2 Felizardo Navarra Jr., imbestigador ng Numancia municipal police station, sa panayam ng Energy FM Kalibo.

Si Kevin Cangson, 25 anyos, tubong Odiongan, Romblon at kasalakuyang nakatira sa brgy. Camanci Norte, ay sumang-ayon na maeksamin ng mga awtoridad kung nagpaputok nga ba ito ng baril.

Nanindigan ang suspek at tinuturong driver sa riding in tandem na wala siyang kinalaman sa nasabing insidente na ikinamatay ng tatlong tanod, at ikinasugat ng tatlo pa.

Ang paraffin test ay isang eksaminasyon kung saan ang suspek sa pamamaril ay isinasailalim sa chemical analysis para malaman kung may presensya ng gun powder sa kanyang kamay.

Ipapadala pa sa crime laboratory sa Iloilo ang ginawang paraffin test para makumpirma ang resulta ng eksaminasyon na posibleng magtatagal pa ng ilang araw.

Napag-alaman na ang paraffin test ay pwede paring pumalya bagaman ang isang tao ay talagang nagpaputok ng baril sa ilang kadahilanan.

Ang resulta ng eksaminasyon ay hindi konklusibo at pangunahing batayan parin ang mga testigo sa insidente.

Kasalukuyang nakakulong ngayon sa Numancia PNP station ang suspek at nakatakdang sampahan ng kaukulang kaso.

SUSPEK SA PAMAMARIL SA BRGY. CAMANCI NORTE, NUMANCIA NAARESTO NA

ulat ni Darwin Tapayan, Energy FM 107.7 Kalibo

Naaresto na ng mga kapulisan ang isa sa dalawang suspek sa nangyaring pamamaril sa brgy. Camanci Norte, Numancia Miyerkules ng gabi na ikinamatay ng tatlong tanod at ikinasugat ng  tatlo.

Kinilala ang nasabing suspek na si Kevin Cangson, 25-anyos, tubong Odiongan, Romblon pero pansamantalang nakatira sa brgy. Camanci Norte sa nasabing bayan.

Ayon kay PSInsp. Geo Colibao, hepe ng Numancia municipal police station, naaresto umano nila ang nasabing suspek sa police station mismo, matapos imbitahan ang mga ito para sa imbestigasyon.

Dagdag pa ni Colibao, positibong itinuro ng tatlong saksi ang nasabing suspek sa harap ng mga kapulisan bagay na inaresto ito ng mga awtoridad.

Ang suspek at ang kanyang live-in partner ay nasangkot sa kaguluhan sa birthday party sa kanilang boarding sa nasabing barangay Martes ng gabi kung saan nakaalitan nila ang mga rumespondeng tanod at ang punong barangay.

Sa alegasyon ni Shenna mae Baylon, live-in partner ng suspek, sinuntok umano siya ni punong barangay John Maribojo na natamaan sa kanyang mata. 

Si Cangson ang sinasabing driver ng motorsiklo at nakabaril sa tatlong tanod na ikinamatay nina Rogelio Saron, 38 anyos, Jesconie Isidro, 35 samantalang patuloy namang ginagamot sa ospital ang kasama nilang si Danilo Villorente, 43. 

Sa panayam ng Energy FM Kalibo, mariin namang itinatanggi ng suspek ang alegasyon sa kanya.

Giit niya at ng kanyang live-in parter, nakacheck-in umano sila sa hotel kasama ng pamilya ng babae nang mangyari ang insidente.

Nakatakdang sampahan ng kasong murder at frustrated murder ang nasabing suspek.

Patuloy naman ang imbestigasyon ng mga kapulisan hinggil sa nasabing insidente sa posibleng pagkakakilalan at ikadarakip ng isa pa niyang kasama na sinasabing bumaril at pumatay sa tanod na si Walter Rembulat.

Samantala, nasa maayos nang kalagayan ang dalawang biktima ng stray bullet –isang 9 anyos na babae at 23 anyos na lalaki.

26 ANYOS NA LALAKI ARESTADO SA KASONG SLANDER BY DEED SA BAYAN NG NUMANCIA

ulat ni Darwin Tapayan, Energy FM 107.7 Kalibo

Arestado ang isang 26-anyos na lalaki sa sa kasong slander by deed sa brgy. Bulwang, Numancia.

Kinilala ang akusado na si Leo Prado, residente ng nasabing lugar.

Naaresto ang lalaki sa kanilang residensya sa bisa ng warrant of arrest na inilabas at nilagdaan ni judge Bienvinido Barrios Jr., ng Regional Trial Court sa Kalibo.

Ang nasabing operasyon ay isinagawa ng pinagsamang pwersa ng Aklan Crime Investigation and Detection Group at Numancia municipal police station.

Ang akusado ay pansamantalang nakakulong ngayon sa lock-up cell ng Numancia PNP at nakatakdang iharap sa kaukulang korte.

Anim na libong piso ang itinakdang pyansa ng korte para sa kanyang temporaryong kalayaan.

3 TANOD PATAY NANG PAGBABARILIN NG RIDING IN TANDEM SA NUMANCIA

Patay ang tatlong tanod sa brgy. Camanci Norte makaraang pagbabarilin ng riding in tandem.

Naganap ang nasabing insidente sa peryahan ng nasabing barangay dakong alas-10 ng gabi habang nasa kasagsagan ng duty ang mga nasabing tanod.

Ayon sa report ng Numancia PNP, nilapitan umano ng gun man ang tanod na si Walter Rembulat, 35 anyos, at pinagbabaril.

Pinagtulungan naman ng tatlo pang tanod na hulihin ang nasabing gunman.

Dito na pinagbabaril ng gunman at driver ang mga tanod na sina Danilo Villorente, 43 anyos, Rogelio Saron, 38, Jesconie Isidro, 35.

Agad namang nakatakas ang hindi pa nakikilalang mga suspek na nakabonet.

Isinugod naman sa magkaibang hospital ang mga biktima pero hindi na umabot ng buhay si Rembolat at Saron. 

Binawian ng buhay si Isidro habang ginagamot sa intensive care unit dakong alas-2:00 ng madaling araw kanina.

Napag-alaman na dalawang sibilyan na nasa peryahan ang natamaan ng stray bullet – isang 9-anyos na babae at 23 anyos na lalaki.

Inaalam pa ng mga kapulisan ang motibo nang nasabing insidente.

AKLAN PNP IKINABAHALA ANG SUNOD-SUNOD NA KASO NG RIDING-IN-TANDEM SA PROBINSIYA

ulat ni Darwin Tapayan, Energy FM 107.7 Kalibo

Ikinabahala ng Aklan Police Provincial Office (APPO) ang sunod-sunod na kaso ng riding-in-tandem sa probinsiya.

Sa isang press conference, sinabi ni PSSupt. Lope Manlapaz, direktor ng APPO, paiigtingin pa ng mga kapulisan ang seguridad at tutukan ang pagsawata ng mga nasabing kaso.

Nitong linggo lang tatlong kaso na nang riding-in-tandem ang naganap sa Aklan.

Nitong Lunes, patay nang pagbabarilin sa brgy. Odiong, Altavas ang drug surenderee na kinilalang si Jovanie Gervacio, residente ng brgy. Poblacion sa nasabing bayan.

Patuloy namang ginagamot sa ospital ang negosyanteng si Merlu Manokan makaraang pagbabarilin din sa loob ng kanilang bahay sa brgy. Aquino, Ibajay.

At ngayong Huwebes, tatlong tanod ang napatay at isa pang tanod ang sugatan matapos pagbabarilin din sa peryahan sa brgy. Camanci Norte, Numancia.

Ayon kay Manlapaz, bagaman naka-full-alert ngayon ang mga kapulisan nagkataon anya na ang mga nasabing insidente ay naganap malayo sa mga checkpoint sa mga nabanggit na lugar.

Aalamin rin anya nila kung iisang grupo lang ba ang mga suspek sa mga nasabing insidente.

Napag-alaman na simula nang maupo si Manlapaz bilang direktor ng Aklan PNP, limang kaso na nang riding-in-tandem ang naganap sa kanyang administrasyon.

Aminado naman siya na hirap parin sila sa pagtukoy sa mga suspek gayunman pinasiguro niya na hidi tumitigil ang mga kapulisan sa paglutas ng mga nasabing kaso.

‘KAPAYAPAAN SA MARAWI’ PANALANGIN NG MGA MUSLIM SA AKLAN SA PAGTATAPOS NG RAMADAN

ulat ni Darwin Tapayan, Energy FM 107.7 Kalibo

Kapayapaan sa Marawi. Ito ang panalangin ng mga kapatid na Muslim sa Aklan sa pagtatapos ng Ramadan o Eid al-Fit’r.

Sa panayam ng Energy FM Kalibo kay Hadji Sulay, lider ng Muslim community sa Numancia, dalangin nila na matapos na ang nagaganap na bakbakan sa Marawi sa pagitan ng mga teroristang Maute at tropa ng gobyerno.

Ayon kay Sulay, kahapon opisyal na nagtapos ang kanilang halos isang buwang pag-aayuno. 

Nabatid na nagsagawa sila ng simpleng programa kasama ang mga tauhan ng Philippine Army, Philippine National Police, ilang opisyal ng lokal na pamahalaan at iba pang bisita.

Patuloy anya silang nakikipagtulungan sa mga awtoridad at mga opisyal ng gobyerno para masiguro na walang makapasok na masasamang elemento sa kanilang lugar.

Napag-alaman na sa kasalukuyan, tatlong pamilya na mula Marawi o Lanao del Sur ang nagbakwit sa kanilang lugar.

Pinasiguro naman ni Sulay na minomonitor nila ang mga taong pumapasok sa kanilang komunidad at inuusisa kung may relasyon ito sa mga teroristang grupo.

Ang Muslim community sa Numancia ay isa sa may pinakamalaking bilang ng mga Muslim sa Aklan kasama ang Boracay at Kalibo.

SUSPEK SA PAMAMARIL SA NAVITAS, NUMANCIA SINAMPAHAN NA NG KASONG FRUSTRATED MURDER

Energy file photo

Sinampahan na ng kasong frustrated murder ang suspek sa pamamaril sa brgy. Navitas, Numancia araw ng Martes. 

Ayon sa imbestigador na si PO2 Felizardo Navarra Jr. ng Numancia PNP, nakapiit na ngayon ang suspek sa Aklan rehabilitation center.

Matatandaan na si Eduardo Reyes, 69 anyos, ang tinuturong bumaril sa 24 anyos na si Meljun Laurente.

Sinabi ng imbestigador na nanindigan sa kanyang complaint affidavit ang biktima na biglaan siyang binaril.

Naglalaro umano siya ng basketball ng malapitan siyang binaril ng suspek.

Nabatid na may dati ng hindi pagkakaintindihan ang suspek at ang biktima.

Php200 libo ang itinakdang piyansa ng para sa temporaryong kalayaan ng suspek.

Samantala, nakaconfine parin sa provincial hospital ang biktima.

NO.6 DRUG PERSONALITY SA AKLAN ARESTADO SA BAYAN NG NUMANCIA

Arestado ang isang 36 anyos na mister sa brgy. Laguinbanwa East, Numancia sa pagtutulak ng iligal na droga.

Kinilala ang suspek na si John Alex Nabor y De Miguel at itinuturing na ika-anim sa druglist ng Aklan Police Provincial Office.

Sa inisyal na report ng Aklan Police Provincial Office, nabilhan ng isang sachet ng pinaghinalang shabu kapalit ng Php1,100 kabilang ng Php500 buy bust money.

Isinagawa ang operasyon ng pinagsamang pwersa ng Aklan Provincial Drug Enforement Unit, Philippine Drug Enforcement Unit 6, Numancia muncipal police station, 12 Infantry Battalion at MIG 6.

Sa live interview sa suspek, mariing pinabulaanan niya ang akusasyong tulak siya ng droga.

Aminado siya na gumagamit ng ipinagbabawal na droga pero matagal nang tumigil matapos sumuko sa Numancia PNP kasunod ng paglulunsad ng oplan tokhang.

Hindi naman makapaniwala ang kanyang ina at asawa sa nangyari.

May nakuha pang mga sachet ng sinasabing iligal na droga sa isinagawang body search.

Sa ngayon ay nagpapatuloy pa ang inventory ng mga awtoridad sa nasabing operasyon.

25 ANYOS NA LALAKI BINARIL SA BRGY. NAVITAS, NUMANCIA; SUSPEK, ARESTADO

Nagtamo ng tama ng baril sa tiyan at hita ang isang 25 anyos na lalaki matapos barilin ng kapitbahay sa brgy. Navitas, Numancia pasado alas-5:00 ng hapon.

Ayon kay PO2 Felizardo Navarra Jr., ng Numancia PNP, naglalaro umano ng basketball ang biktima na si Meljun Laurente nang lapitan ito ng suspek saka binaril ng hindi pa malamang kalibre ng baril.

Nakatago naman sa loob ng kanyang bahay ang suspek na kinilalang si Eduardo Reyes, 69 anyos.

Nahirapan pang kumbisihin ng mga awtoridad ang lalaki na lumabas sa loob ng kanyang bahay at sumuko sa mga awtoridad.

Nakumbinsi lamang ang lalaki ng kanyang kaibigan at dating pulis na si Razan Perlas.

Ayon pa kay PO2 Navarra, matagal nang may namamagitang alitan sa dalawa. Madalas umanong binabato ng biktima ang bahay ng suspek at minsan ng humantong sa bugbugan.

Posible anyang napuno ng galita ang suspek dahil muli na namang binato ng biktima ang kanyang bahay dahilan para barilin niya ito.

Sa eksklusibong panayam ng Energy FM Kalibo sa suspek, mariin naman niyang pinabulaanan ang pagbaril sa kapitbahay.

Nakapiit na ngayon sa lock-up cell ng Numancia municipal police station ang suspek at posibleng maharap sa kasong frustrated murder.

BARRACK SA LAGUINBANWA EAST, NUMANCIA, NILOOBAN

Ulat ni Darwin Tapayan, Energy FM 107.7 Kalibo

Nilooban ng hindi pa nakikilalang magnanakaw ang isang barrack sa brgy. Laguinbanwa East, Numancia habang natutulog ang mga biktima.

Natangay ng suspek ang anim na iba-ibang unit ng cellphone at pera ng mga construction worker sa ginagawang commercial building dito sa gilid ng national highway.

Naganap ang insidente pasado ala-1:00 ng madaling araw.

Nagising ang ilan sa mga biktima at namataan pa ang suspek sa loob ng barrack pero mabilis rin itong nakatakbo papalayo.

Iniimbestigahan na ng Numancia municipal police station ang nasabing insidente.

NEWS UPDATE: 39 ANYOS NA TRICYCLE DRIVER BINARIL NG RIDING IN TANDEM

ulat ni Darwin Tapayan, Energy FM 107.7 Kalibo

Binaril ng riding in tandem ang 39 anyos na tricycle driver sa brgy. Bulwang, Numancia.

Ito ang lumabas sa inisyal na imbestigasyon ng Numancia municipal police station sa pagpaslang sa biktimang si Edwin Dela Cruz, Sr.

Ayon kay PO2 Marlon del Rosario, namataan sa kuha ng close-circuit television (CCTV) footage ang dalawang lalaki sakay sa motorsiklo na sinusundan ang biktima.

Napag-alaman na mula pa sa Kalibo Public Market ay sinundan na ng mga suspek ang nasabing lalaki.

Naghatid pa ito ng kanyang pasahero sa brgy. Bulwang nang ilang sandali lang ay pinagbabaril na siya ng mga suspek.

Hirap pa sa pagtukoy ang mga awtoridad sa pagkakakilalan ng mga suspek dahil malayo ang kuha ng CCTV at nakahelmet pa ang mga ito.

Narekober ng mga awtoridad ang 6 na fire cartridge sa pinangyarihan ng insidente at dalawang slug ng pinaniniwalaang caliber 45.

Sa isinagawang post mortem examination sa bangkay ng biktima, nakitaan ito ng 12 sugat sa katawan.

Inaalam pa ng mga kapulisan ang motibo ng krimen.

TRICYCLE DRIVER BINARIL SA BAYAN NG NUMANCIA PATAY

ulat ni Joefel Magpusao, Energy FM 107.7 Kalibo

Dead on the spot ang isang 39 anyos na tricycle driver matapos itong pagbabarilin sa brgy. Bulwang, Numancia.

Sa inisyal na report ng pulisya, naganap ang nasabing insidente dakong alas-6:20 ng umaga kanina.

Kinilala ng Numancia municipal police station ang biktima na si Edwin Dela Cruz, 39, tubong Andagao, Kalibo.

Unang inakala ng nakarinig ng putok na gulong ng tricycle ang sumabok. 

Nang kanilang usisain ay bumulagta ang wala nang buhay na lalaki na nakadapa sa manibela ng kanyang tricycle at may mga tama ng bala sa likod at duguan.

Ayon sa Scene of the Crime Opperatives (SOCO), nakita sa crime scene ang anim na fired cartridge ng di nakikilalang kalibre. Nakitaan rin ng 11 sugat sa katawan ang biktima.

Napag-alaman na naghatid pa ng pasahero ang biktima sa brgy. Bulwang nang pagbalik ay doon na ito pinagbabaril ng mga hindi pa nakikilalang mga suspek.

Inaalam pa ng mga awtoridad ang motibo ng insidente at ang pagkakakilalan ng suspek.