3 bahay nasunog sa Isla ng Boracay; nag-iwan ng Php70K halaga ng pinsala

photo: Leonard Tirol, BFRAV

KALIBO, AKLAN - Nag-iwan ng nasa Php70,000 halaga ng pinsala ang sunog na nangyari kanina sa Brgy. Manocmanoc, Isla ng Boracay.

Ayon sa ulat ng Bureau of Fire Protection (BFP) - Malay tatlong bahay ang nasunog. Totally burned ang bahay na pagmamay-ari nina Angelyn Roda at Zinadar Delos Santos habang partially burned naman ang bahay ni Tony Malihan.

Batay sa paunang imbestigasyon ni FO3 John Henry Ildesa, imbestigador ng BFP-Malay, nagmula ang sunog sa bahay ni Roda. Mabilis umanong kumalat ang apoy dahil gawa sa mga light materials ang mga bahay.

Nakarating ang ulat sa BFP-Malay banda 2:05 ng hapon at agad rumesponde sa lugar. Nagsimula umano ang sunog dakong 1:30 ng hapon at naapula 2:20 ng hapon.

Wala namang naiulat na nasugatan sa insidente habang iniimbestigahan pa ang sanhi ng sunog.##

- Kasimanwang Darwin Tapayan, Energy FM Kalibo

Babaeng Chinese National naligtas matapos magtangkang tumalon sa isang gusali

NARISCUE NG mga kapulisan ang isang Chinese National na babae makaraang magtangkang tumalon sa bubungan nga three-storey building.

Nabatid na kagabi nagtungo sa Kalibo PNP Station ang nasabing babae at dito ay inalam ng kapulisan ang kaniyang problema sa tulong ng isang negosyanteng Chinese bilang interpreter.

Napag-alam na nakakaranas umano ng mental illness ang nasabing 34-anyos na banyaga.

Dinala ito ng kapulisan sa isang traveller's inn kagabi matapos na mapakalma ito habang nakikipag-ugnayan na sila sa kinauukulan para makauwi ang babae.

Laking gulat nalang ng mga dumaraan ngayong umaga nang nakita nila ang babae na nasa bubungan na ng nasabing traveller's inn at tangkang tumalon.

Agad namang rumesponde ang kapulisan, mga rescuers at bombero sa lugar para mailigtas ang babae.
Dinala sa ospital ang babae at nakikipag-ugnayan na ang mga otoridad rito sa kaniyang pamilya para matulungan siyang makabalik sa kanilanh bansa.##

- Kasimanwang Darwin Tapayan, Energy FM Kalibo
photos screen grab from video of Kasimanwang Archie Hilario of Energy Fm Kalibo

Bahay sa Malinao naabo sa sunog

photo: BFP-Numancia

NAABO SA sunog ang bahay na ito na pagmamay-ari ni Danilo Balangat, 58-anyos, sa Brgy. Rosario, Malinao kahapon ng hapon.

Batay sa ulat ng Bureau of Fire and Protection (BFP) - Numancia, mabilis na nilamon ng apoy ang bahay na yari lamang sa light materials.
Ayon kay FO1 John Daryll Irabon, imbestigador, tinatayang aabot ng Php30,000 ang pinsalang iniwang ng sunog.

Nabatid na nasa labas ng bahay ang may-ari nang mapansin nitong umuusok na ang kanilang bahay.

Dahil sa malayo ang lugar, abo na ang bahay bago pa man makarating ang mga rumespondeng tauhan ng BFP-Numancia.

Tinitingnan naman niya ang pag-short-circuit ng service drop sa nasabing bahay na pinagmulan ng sunog.

Walang naisalbang gamit ang may-ari maliban lamang sa kaunting bigas at telebisyon.

Wala namang nasagutan sa insidente.##

- Kasimanwang Darwin Tapayan, Energy FM Kalibo

48 traffic violators nahuli ng Kalibo PNP sa Oplan Sita

photo: Kalibo PNP

NAHULI NG kapulisan ng Kalibo PNP Station ang 48 traffic violators sa isinagawa nilang Oplan Sita sa ilang mga pangunahing kalsada sa bayang ito ngayong araw.

Ayon kay Police Lieutenant Colonel Richard Mepania, hepe ng Kalibo PNP, karamihan sa mga violators ay mga nagmamaneho ng walang driver's license at mga hindi nakahelmet.

Sinabi ng hepe na tuloy-tuloy ang gagawin nilang Oplan Sita sa mga kalsada kasama ang mga tauhan ng Kalibo Auxiliary Police para madisiplina ang mga motorista.

Layunin din umano ng kanilang operasyon ang mailayo sa kapahamakan o disgrasya ang mga nagmamaneho.

Iba pa umano ito sa kanilang checkpoint. Ang Oplan Sita ay pwede umano nilang gawin sa oras ng pangangailangan.

Samantala, ngayong araw ay nagkabit ng mga signages ang kapulisan ng Kalibo sa mga kalsada sa bayang ito na naglalaman ng ilang paalala sa ligtas na pagmamaneho.

Pahayag ni LtCol. Mepania, katuwang nila rito ang mga tauhan ng Department of Public Works and Highways (DPWH) at Land Transportation Office (LTO) lahat dito sa Aklan.

Aniya bahagi ito ng napag-usapan ng inter-agency sa kanilang Road Safety Summit kamakailan. Sa mga susunod na araw ay magdaragdag pa umano sila ng mga signages.

Nanawagan si Mepania sa mga motorista na sumunod sa batas trapiko para iwas abala at kapahamakan.##

- Kasimanwang Darwin Tapayan, Energy FM Kalibo

Sasakyan nadisgrasya sa Makato, isa patay

photo by Kasimanwang Archie Hilario, Energy FM Kalibo

Isang crosswind ang nadisgrasya sa kahabaan ng national highway sa Brgy. Dumga, Makato ngayong hapon. Sa limang sakay, isa ang patay.

Kinilala ang namatay na si Robert Cano, 30-anyos, tubong Janiuay, Iloilo, at pahenante ng sasakyan.
Outpatient naman ang iba matapos magtamo lamang ng kaunting sugat.

Ayon sa kanyang mga kasama, galing umano sila sa Brgy. Caticlan, Malay at patungo na sanang Iloilo nang mawalan ng kontrol ang driver.

Pinaniniwalaang nakatulog ang driver kaya nangyari ang insidente.

Inararo nito ang isang puno ng indian mango at isang motorsiklo na nakapark.

Naipit umano ang pahenante na namatay sa loob ng sasakyan at nagtamo ng malubhang sugat.

Isinugod pa ito sa Dr. Rafael S. Tumbokon Memorial Hospital pero dineklara ring dead on arrival.##

- Kasimanwang Darwin Tapayan, Energy Fm 107.7 Kalibo

Lalaki arestado matapos mabaril ang kainuman; baril nasabat

contributed photo

POSIBLENG MAHARAP sa kasong Frustrated Homecide at paglabag sa election gun ban ang lalaking ito matapos mabaril ang kainuman kagabi sa Brgy. Andagao, Kalibo.

Kinilala ang suspek na si Julius Maliswa, 51-anyos, technician at tubong Brgy. Taculing, Bacolod City, Negros Occidental.

Kinilala naman ang biktima na si Jonathan Dioso, 38, isang auto mechanic at tubong Pandan, Antique.

Batay sa paunang imbestigasyon ng Kalibo PNP, nag-iinuman umano ang dalawa nang inilabas ng suspek ang baril at ipinakita sa kasama.

Aksidente umanong nakalabit ng suspek ang baril at ito ay pumutok at tumama sa tiyan ng biktima. Agad na isinugod ang biktima sa Dr. Rafael S. Tumbokon Memorial Hospital.

Sa follow-up investigation ng kapulisan ay nahuli ang suspek at nasabat sa kanya ang caliber 9mm na may lamang fired cartridge case, apat na cartridge case ng 9mm caliber at isang deformed fired bullet.

Nakatakdang isalilalim sa inquest proceeding ang suspek habang patuloy na ginagamot sa intensive care unit ng ospital ang biktima.##

- Kasimanwang Darwin Tapayan, Energy Fm 107.7 Kalibo

Top 7 most wanted person sa Aklan sa mga kasong rape arestado

pohoto: Aklan Trackers Team

KALIBO, AKLAN - Arestado ang itinuturing na Top 7 Most Wanted Person ng Aklan sa Muntilupa City dahil sa mga kaso ng rape.

Kinilala ang akusado na si Crisanto Reyes y Calipos, 38-anyos, may asawa, residente ng Brgy. Tambak, New Washington, Aklan.

Siya ay naaresto ng kapulisan sa pangunguna ng Aklan Trackers Team sa Southville 3, Brgy. Poblacion, Muntilupa City nitong Linggo.

Si Reyes ay nahaharap sa dalawang counts ng qualified rape at dalawang counts ng statutory rape.

Ang kanyang warrant of arrest ay inilabas ng Regional Trial Court dito sa Aklan noon pang Mayo 25, 2018.

Dinala na sa Aklan ang nasabing akusado at nakapiit na ngayong sa kaukulang jail facility.##

- Kasimanwang Darwin Tapayan, Energy FM Kalibo

Aklan may bago nang police provincial director

KALIBO, AKLAN - May bago nang provincial director ang kapulisan sa Aklan sa katauhan ni Police Colonel Esmeraldo Osia Jr.

Si Osia ay naging acting provincial director ng Guimaras ng halos isang buwan lamang bago siya nalipat.

Naging hepe rin siya ng Regional Aviation Security Unit (AVSEU) sa Western Visayas.

Si Osia ang pumalit kay PCol. Lope Manlapaz na naglingkod ng mahigit dalawang taon sa probinsiya bilang provincial director.

Si Manlapaz ay malilipat sa Police Regional Office 6 sa Iloilo City.

Isinagawa ang turn-over of command Martes ng umaga sa Camp Pastor Martelino sa Brgy. New Buswang, Kalibo.

Nagpaabot naman ng pasasalamat si Col. Manlapaz sa lahat ng kapulisan sa Aklan, mga stakeholders at mga mamamayan sa pagsuporta sa kanyang liderato.

Habang ipagpapatuloy naman umano ni Col. Osia ang mga magagandang nasimulan ni Manlapaz sa Aklan at i-improve kung ano ang dapat i-improve.##

- Kasimanwang Darwin Tapayan, Energy FM Kalibo

Drainage system sa Isla ng Boracay hindi pa tapos ayon sa DPWH-Aklan

photo by Boracay Rehabilitation Continues FB

KALIBO, AKLAN - Kahapon ay naranasan ang pagbaha sa ilang bahagi ng Isla ng Boracay kabilang na ang mainroad sa may D'Mall area.

Paliwanag ni Department of Public Works and Highway (DPWH) - Aklan District Engineer Noel Fuentebella ang pagbaha ay dahil aniya hindi pa natatapos ang konstruksyon ng drainage sa Isla.

Ito ang naging pahayag ng district engineer umaga ng Lunes sa panayam ng Energy FM Kalibo.

Gayunman iginiit ni Fuentebella na halos kompleto na ang kanilang drainage system. Aniya Drainage sa mainroad lamang umano ang in-charge sa kanila.

Hinihintay na lang umano nila na mai-tap ang  drainage sa mainroad sa drainage na maglalabas ng tubig sa dagat na nakatuka umano sa Tourism Infrastructure and Enterprise Zone Authority (TIEZA).

Aniya hindi pa nakokompleto ng TIEZA ang kanilang drainage kaya umano nagkakaroon ng pag-apaw ng tubig nang bumuhos ang malakas na ulan kahapon sa Isla dahil limitado pa ang lumalabas na tubig-baha sa dagat.

Isa pa sa itinuturo niyang dahilan ng pagbaha ay ang mga basura na nakabara sa mga drainage. Nakikipag-ugnayan na umano ang kaniyang tanggapan sa pamahalaang lokal para malutas ang suliraning ito.

Sa kabila nito "okay" lang sa opisyal ng DPWH-Aklan na umulan para makita umano nila at ng iba pang ahensiya ng gobyerno kung ano pa ang mga dapat ayusin.

Samantala, sa regular session ngayong Lunes napagkasunduan ng mga miyembro ng Sangguniang Panlalawigan na magsagawa ng isang legislative inquiry para alamin ang progreso ng ginagawang kalsada sa Isla.##

- Kasimanwang Darwin Tapayan, Energy FM Kalibo