LALAKI NANLABAN SA PULIS MAKATO, BINARIL PATAY

PATAY ANG isang lalaki makaraang barilin ng mga rumespondeng pulis sa Brgy. Aglucay, Makato gabi ng Linggo.

Ayon sa kapulisan nanlaban ang suspek na kinilalang si Cipriano Condez y Tiongson, nasa legal na edad at residente ng nasabing lugar.

Una rito, humingi ng responde ang kagawad ng barangay sa Makato PNP makaraang magpaputok ng baril ang suspek sa kanilang barangay.

Napag-alaman na hinahamon ng patayan ng nakainon na suspek ang kanyang kapatid na si Junio Condez habang bitbit niya ang .357 revolver.

Pagdating ng kapulisan, pinakakalma umano nila ang suspek pero sa halip na sumunod ay tinutukan pa niya ng baril ang tropa at akmang mambaril.

Matapos ang ilang negosasyon ay binaril ng pulis ang suspek na tinamaan sa kanyang mga paa at dinala ito sa ospital.

Makalipas ang ilang oras, binawian rin ng buhay ang suspek habang ginagamot sa intensive care unit ng hospital. Sa impormasyon ng Energy FM Kalibo, lost of blood umano ang ikinamatay ng suspek.

Nasa pangangalaga naman ng Makato PNP ang baril, isang fire cartridge at limang live ammunition.
Patuloy pa ang imbestigasyon ng kapulisan sa insidente.##

- Kasimanwang Darwin Tapayan, Energy Fm 107.7 Kalibo

DALAWA PATAY MATAPOS PAGBABARILIN SA ISLA NG BORACAY

Patay ang dalawang lalaki sa Isla ng Boracay matapos silang pagbabarilin Byernes ng hating gabi sa Sitio Pinaungon, Brgy. Balabag.

Kinilala sa report ng pulisya ang mga biktima na sina Melchor Almeria at Samuel Moral, pawang nagtratrabaho sa Isla at tubong Iloilo.

Ayon sa inisyal na report ng Boracay Tourist Assistance Center, tatlong hindi pa nakikilalang mga lalaki ang nakitang responsable sa pamamaril sa mga biktima.

Ayon sa waitress, nagkainitan umano ang mga biktima at dalawa pa nilang mga kasama at ang mga suspek dahil lamang sa nakaharang na sasakyan sa kalsada.

Maya-maya pa ay sunod-sunod na putok na ng baril ang narinig at nakita na lamang na nakabulagta na sa kalsada ang dalawang biktima.

Hinabol pa ng tatlong mga naka-off duty na pulis ang mga suspek pero mabilis itong nakalayo sa lugar.

Dinala pa sa magkahiwalay na pagamutan ang mga biktima pero hindi na umabot ng buhay si Moral samantalang binawian rin agad ng buhay si Almeria habang ginagamot.

Nagtamo ang dalawa ng multiple wounds dahilan ng kanilang pagkamatay.

Pinaniniwalaang caliber 12 shotgun ang ginamit sa pamamaril base narin sa mga ebesensyang narekober sa lugar.

Inaalam pa ngayon ng mga kapulisan ang motibo sa likod ng krimen at pagkakakilalan ng mga suspek.

DALAWA SUGATAN MATAPOS PAGBABARILIN NG DI PA NAKIKILANG SUSPEK SA BORACAY

ulat ni Archie Hilario, Energy FM 107.7 Kalibo

Sugatan ang dalawang biktima matapos pagbabarilin ng di pa nakikilalang suspek sa So. Bolabog, brgy. Boracay kaninang umaga. 

Kinilala ang mga  biktima sa pangalang  Edlyn Catilla Padilla ,19-anyos na taga  Bacolod City, Roquito Pagayon Tumbagahan39, na taga-Ibajay, Aklan. 

Isinugod naman agad sa hospital ang mga biktima at stable na ang kalagayan ng mga ito. 

Lumalabas sa inisyal na imbestigasyon na agawan sa lupa ang motibo ng insidente.

Samantala nagpapatuloy naman ang imbestigayon ng pulisya sa insidenteng ito.

36 ANYOS NA LALAKI PATAY MATAPOS BARILIN SA BAYAN NG NEW WASHINGTON, SUSPEK ARESTADO

Patay ang isang 36-anyos na lalaki makaraang barilin sa so. Kamangahan, brgy. Tambak, New Washington pasado alas-6:00 kagabi.

Kinilala sa report ng New Washington PNP ang biktima na si Ruperto Marquez y Rasgo, residente ng nasabing lugar.

Sa pagresponde ng mga kapulisan sa lugar, positibong itinuro ng mga testigo ang suspek sa insidente na nakorner ng mga awtoridad sa kanyang compound.

Kinilala ang suspek na si Jeffrey Bautista y Francisco, 32-anyos, isang sekyu at residente ng parehong barangay.

Narekober ng mga kapulisan sa posisyon ng suspek ang isang .38 revolver at dalawang fire cartridge na nakuha sa kanilang compound.

Nagtamo ng sugat sa kaliwang bahagi ng kanyang tiyan.

Agad na isinugod ng mga kapulisan ang biktima sa provincial hospital pero kalaunan ay binawian rin ng buhay habang ginagamot sa intensive care unit.

Pansamantala namang ikinulong sa New Washington PNP station at nakatakdang sampahan ng kaukulang kaso.

AWAY SA LUPA NAUWI SA PAGBARIL SA LANIPGA, TANGALAN; 70 ANYOS NA SUSPEK ARESTADO

Rudivico Belinario

Nauwi sa pagbaril ang away sa lupa ng magtiyo sa brgy. Lanipga, Tangalan kahapon ng hapon.

Kinilala ang biktima na si Gonzalo de Pablo, 48 anyos, samantalang ang suspek ay kinilalang si Rudivico Belinario, 70 anyos, pawang mga residente ng nasabing barangay.

Ayon sa report ng Tangalan PNP station, tinutukan umano ng baril ng suspek ang anak na lalaki ng biktima.

Nang makita ay kinumpronta ng biktima ang suspek at sinubukang agawin ang armas mula sa kanya. Pero nabaril parin ng suspek ang biktima sa kanyang kanang paa.

Naagaw naman ng biktima ang baril mula sa suspek at pinalo siya sa kanyang noo.

Sinubukan pa umano ng suspek na bumunot ng itak pero naagaw ito ng biktima kasama ang asawa at anak nilang lalaki.

Narekober ng mga kapulisan ang revolver caliber .38 at itak na ginamit sa insidente.

Confined sa provincial hospital ang biktima samantalang nakakulong naman sa Tangalan PNP station ang suspek na posibleng sampahan ng kaukulang kaso.

PINAGHIHINALAANG GUN FOR HIRE SA AKLAN, BINARIL SA BUY BUST OPERATION NANG MANLABAN SA OPERATIBA

Sugatan ang isang pinaghihinalaang gun for hire nang barilin ng pulis sa isang buy bust operation sa Kalibo dahil nanlaban umano ito.

Kinilala ang suspek na si Raymund Olino, residente ng brgy. Rizal, Ibajay.

Ginawa ang operasyon dakong alas-9:00 ng umaga sa Park Homes 3 sa brgy. Andagao, Kalibo nang pinagsamang pwersa ng Crime Investigation and Detection Group (CIDG) at Kalibo PNP.

Ayon kay PCInsp. Raul Boledo, hepe ng CIDG-Aklan, nanlaban umano ang suspek matapos mapag-alamang pulis ang kanyang nakatransaksiyon.

Nakapaputok umano ito ng makalawang beses sa operatiba dahilan para manlaban ang mga ito kung saan nagtamo ng dalawang sugat ng pagbaril ang suspek sa kanyang kaliwang paa.

Narekober ng mga awtoridad ang isang caliber 45 sa posesyon ng suspek at isa pang caliber 45 sa nangyaring buybust operation kapalit ng Php20 peso bill kabilang na ang Php1,000 marked money.

Pahayag ni Boledo, pinaghihinalaang gun for hire ang suspek at matagal narin umanong minomonitor ng mga kapulisan.

Naka-hospital arrest ngayon ang suspek sa provincial hospital na posibleng maharap sa mga kaukulang kaso.

KAGAWAD NG LOCTUGA, LIBACAO PINAGHAHANAP PARIN NG PULISYA SA KASONG PAMAMARIL

ulat ni Darwin Tapayan, Energy FM 107.7 Kalibo

Patuloy na pinaghahanap ng mga kapulisan ang tumakas na barangay kagawad at suspek sa naganap na pamamaril sa sitio Indang, brgy. Loctuga, Libacao hating gabi ng Martes.

Sa panayam sa “programang tambalang A&R”, sinabi ni PInsp. Mayolito Iremedio, hepe ng Libacao police station, hanggang Sabado pa ginagawa nilang manhunt sa 45-anyos na suspek.

Si kagawad Lito Villorente ay tumakas matapos mabaril niya ang biktimang si Julie Orbista, 26 anyos at residente ng parehong lugar.

Magugunitang nagkaroon umano ng hindi pagkakaintidihan ang suspek at si Argie “Gege” Esto habang nagsusugal sa isang lamay.

Sinubukan umanong barilin ng nakainom na suspek ang nakaalitan pero mabilis itong nakalayo sa lugar at aksidenteng natamaan si Orbista.

Ayon pa kay Iremedio, wala umanong narekober na bala ng baril doon sa lugar. Wala rin umanong malalim na motibo sa naturang insidente kundi dala lamang ng kalasingan ng suspek.

Dagdag pa ng hepe “isolated” lamang ang ganitong kaso at nanatiling mapayapa ang bayan ng Libacao.

Sa kabilang banda, pinabulaanan naman niya ang mga kumakalat na impormasyong may mga namamataang umaaligid na mga armadong grupo sa lugar.

Nananatili anyang mapagmatyag ang mga kapulisan kasama ang Philippine Army at maging ang mga opisyal ng bayan para siguraduhin ang peace and order sa Libacao.

26 ANYOS NA LALAKI SUGATAN SA PAMAMARIL SA LOCTUGA, LIBACAO; SUSPEK ISANG KAGAWAD

ulat ni Darwin Tapayan, Energy FM 107.7 Kalibo

Patuloy ang ginagawang imbestigasyon ng mga kapulisan sa nangyaring pamamaril sa isang lamay sa sitio Indang, brgy. Loctuga, Libacao hating gabi kagabi.

Sa phone interview, sinabi ni PInsp. Mayolito Iremedio, hepe ng Libacao police station, ang sugatan sa naturang insidente ay kinilalang si Julie Orbista y Katimpo, 26 anyos at residente ng parehong lugar.

Kinilala naman niya ang suspek na si Lito Villorente y Katimpo, 45 anyos at kagawad ng nasabing barangay.

Ayon kay Insp. Iremedio, sa inisyal na imbestigasyon nagkaroon umano ng hindi pagkakaintidihan ang suspek at ang isang alyas Gege Esto.

Sinubukan umanong barilin ng suspek ang nakaalitan pero mabilis itong nakalayo sa lugar at aksidenteng natamaan si Orbista.

Isinugod agad sa ospital ang biktima kung saan ito kasalukuyang nagpapagaling na nagtamo ng dalawang sugat sa kanang paa ng hindi pa malamang uri ng baril.

Samantala, sa mga sandaling ito ay pinaghahanap pa ng mga kapulisan at ng Philippine Army ang tumakas na kagawad ng barangay.

Patuloy pa ang ginagawang imbestigasyon ng mga awtoridad sa nasabing insidente.

MGA BALA NG BARIL NAREKOBER SA ISANG BAKURAN SA BRGY. NAVITAS, NUMANCIA

ulat ni Darwin Tapayan, Energy FM 107.7 Kalibo

Dinala sa isang police station ang mga bala ng dalawang magkaibang kalibre matapos makita ito sa isang bakuran sa brgy. Navitas, Numancia.

Sa report ng pulisya, ang mga itinurn-over ay siyam na piraso ng empty shell ng caliber 9mm at anim na empty shell ng caliber .45.

Itinurn-over ang mga ito ni Petra Tipay, 54 anyos, residente ng nasabing lugar.

Una rito, ayon kay Tipay, pasado ala-1:00 ng madaling araw, narinig niya sa labas ng kanilang bahay ang isang lalaki na tinatawag ang kanyang anak para mag-inuman.

Hindi umano niya ito pinansin sa kabila na ilang beses na nagtatawag ang lalaki sa labas pero ilang minuto anya ay nakarinig siya ng ilang putok ng baril.

Namataan umano niya ang lalaki at kinilala niyang si Jay Yacub, nasa legal na edad at residente rin ng nasabing lugar.

Matapos maireport ang insidente sa pulisya, ay agad na nagsagawa ng imbestigasyon ang mga awtoridad para sa ikadarakip ng suspek gayunman ay nakatakas na umano roon.

Patuloy pa ang ginagawang imbetigasyon ng mga awtoridad hinggil sa nasabing insidente.

FOREIGNER ARESTADO MATAPOS MABARIL ANG ISANG MENOR DE EDAD SA NEW WASHINGTON, AKLAN

Arestado ang isang 61-anyos na foreigner sa bayan ng New Washington makaraang mabaril ang isang 11-anyos na batang lalaki .

Kinilala ang suspek na si Lewis France Sanderson na isang American national at pansamantalang nakatira sa brgy. Fatima sanabing bayan.

Sa report ng New Washington PNP, nakatanggap sila ng reklamo mula sa isang concerned citizen na may naganap na pamamaril sa nabanggit lugar.

Agad namang rumesponde ang mga kapulisan sa pangunguna ni PO2 Rolan De Mateo at agad na naaresto ang suspek.

Isinugod naman sa provincial hospital ang biktima na kinilalang si J-Mar Naplaza para malapatan ng kaukulang lunas.

Napag-alam na nangunguha lamang ng bunga ng Indian  mango ang bata kasama ang iba pa ng madaplisan siya ng bala ng baril sa kanyang kamay.

Naniniwala naman ang pamilya ng biktima na walang intensiyon na barilin ng foreigner ang bata.

Posible anyang namamaril lang sa fishpond ang foreigner nang aksidenteng madaplisan ng bala ng sinasabing airsoft gun ang menor de edad.

Pansamantalang nakakulong ngayon ang foreigner sa New Washington PNP station habang umuusad pa ang imbestigasyon sa nangyari.  

PAGBARIL KAY DATING PUNONG BARANGAY SOLINA, HINDI ACCIDENTAL FIRING -- PNP

ulat ni Darwin Tapayan, Energy FM 107.7 Kalibo

reenactment of the shooting incident
photo by Darwin Tapayan

Pinawi ng pulisya ang espekulasyon na accidental firing ang nangyari sa pagkabaril kay dating punong barangay Ananias Solina, 60 anyos, ng Linabuan Norte, Kalibo.

Sa isang press conference, sinabi ni PCInsp. Cirox Omero, forensic chemist, sa ginawa nilang bullet trajectory sa sasakyan ng biktima napag-alaman na galing sa labas ang bala ng baril.

Ayon naman kay PSInsp. Honey Mae Ruiz, deputy chief ng Kalibo police station, hindi parin matukoy kung ano nga ba ang motibo sa naturang insidente.

Paliwanag ni Ruiz, sa ginawa nilang background check sa biktima, lumalabas na wala itong nakaalitan maging ang iba niyang miyembro ng pamilya.

Hirap rin aniya sila sa pagtukoy sa responsable sa nasabing insidente dahil sa kakulangan ng testigo. Negatibo rin umano ang kuha ng mga close circuit television sa pinangyarihan ng insidente.

Matatandaan na Lunes dakong 11:45 ng gabi nang mabaril si Solina habang nasa loob ng sasakyan sa kahabaan ng Veterans Avenue sa brgy. Pobalcion na nagtamo ng sugat sa kaliwang kamay at paa.

Hindi pa malinaw kung binaril siya o biktima ng stray bullet. Sa ngayon, patuloy pa ang imbestigasyon ng mga kapulisan hinggil sa nasabing insidente.

PAGBARIL KAY DATING KAPITAN SOLINA, PATULOY PANG INIIMBESTIGAHAN NG PULISYA

Ulat ni Darwin Tapayan, Energy FM 107.7 Kalibo

Patuloy ang ginagawang imbestigasyon ng pulisya sa umano’y pagbaril kay punong barangay Ananias Solina, 60 anyos, ng Linabuan Norte.

Ayon sa police report, naganap ang nasabing insidente Lunes dakong alas-11:45 ng gabi.

Binabaybay umano ng biktima ang kahabaan ng Veterans Avenue sa brgy. Poblacion, Kalibo sakay ng Honda accord vehicle nang tamaan siya ng bala ng baril.

Nagtamo ng tama ang biktima sa kanyang kanang kamay at hita. Butas rin ang windshield sa likurang bahagi ng kanyang sasakyan.

Ayon kay PCInsp Ulysses Ortiz, hepe ng Aklan Crime Laboratory, narekober umano ng pulisya ang isang fired bullet ng hindi pa nalalamang kalibre ng baril sa kamay ng biktima.

Dinala narin sa kanilang tanggapan ang kotse ni Solina para isailalim sa bullet trajectory.

Ayon pa sa Crime Laboratory, sang-ayon naman ang biktima na sumailalim sa paraffin test para malaman kung nagpaputok ito ng baril.

Sa ngayon, patuloy na ginagamot sa isang pribadong ospital ang biktima.

Si Solina ay naglingkod na punong barangay ng Linabuan Norte, Kalibo at naging president ng Association of Barangay Chairmen sa Aklan.

SUSPEK SA CAMANCI NORTE SHOOTING, NEGATIBO SA RESULTA NG PARAFFIN TEST

ulat ni Darwin Tapayan, Energy FM 107.7 Kalibo

Negatibo ang resulta ng paraffin test na isinagawa sa suspek sa nangyaring pamamaril sa Camanci Norte, Numancia Miyerkules ng gabi.

Si Kevin Cangson, 25 anyos, tubong Odiongan, Romblon at kasalukuyang nakatira sa brgy. Camanci Norte ay hindi nakitaan ng gun powder nitrate.

Ang paraffin test ay ginawa ni PCInsp.  Cirox Omero, forensic chemist ng Crime Laboratory, noong Hulyo 6 ng gabi at naglabas ng resulta nitong Hulyo 9.

Ayon kay PCInsp. Ulysses Ortiz, acting provincial chief ng Crime Laboratory, ang resultang ito ay hindi makakaapekto sa kasong isinampa laban sa suspek.

Paliwanag ni Ortiz, batayan parin ng kaso ang mga testimonya ng mga saksi sa nasabing krimen.

Posible anyang magnegatibo ang isang tao bagaman nagpaputok ito ng baril sa ilang kadahilan kabilang na kapag ang suspek ay naka-gloves at kung malakas ang hangin.

Si Cangson ay isa sa itinuturong suspek sa pagbaril sa apat na  tanod ng brgy. Camanci Norte na ikinamatay ng tatlo at ikinasugat ng isa pa.

COMPOSITE SKETCH NG ISA PANG SUSPEK SA PAGBARIL SA 4 NA TANOD INILABAS NA NG PNP

ulat ni Darwin Tapayan, Energy FM 107.7 Kalibo

Inilabas na ng Numancia municipal police station ang composite sketch ng isa pang suspek sa nangyaring pamamaril sa peryahan sa brgy. Camanci Norte, Numancia Myerkules ng gabi.

Sa ngayon, ayon sa Numancia PNP ito ay 80 porsyento nang facial computer composite sketch ng suspek base sa mga testimonya ng mga saksi.

Ang nasabing composite sketch ay nabuo sa pamamagitan ng trained personnel ng Regional Crime laboratory ng Philippine National Police.

Matatandaan na apat na tanod ang pinagbabaril sa nasabing papamaril kung saan tatlo rito ang napatay at isa ang sugatan.

Dalawa rin ang napag-alaman na natamaan ng ligaw na bala – isang 9-anyos na babae at 23 anyos na lalaki na nagtamo ng mga daplis ng bala sa kanilang katawan.

Una nang naaresto at nasampahan ng kaso ang isa sa dalawang suspek na kinilalang si Kevin Cangson, 25 anyos at tubong Odiongan, Romblon.

Nanawagan ang mga kapulisan sa taumbayan na ipagbigay-alam agad sa kanilang tanggapan ang anumang impormasyon kaugnay sa cartographic sketch na ito.

SUSPEK NA BUMARIL SA KANYANG KAPATID SA BRGY. BULWANG, NUMANCIA SUMUKO NA SA PULISYA

ulat ni Darwin Tapayan, Energy FM 107.7 Kalibo

Sumuko na sa mga kapulisan ang suspek sa pagbaril sa kanyang kapatid sa brgy. Bulwang, Numancia Linggo ng hapon.

Kahapon ng umaga ay boluntaryong sumuko sa isang miyembro ng Kalibo police station ang suspek na Joewhan Borrega, 39 anyos, at residente ng nasabing lugar.

Agad namang dinala sa Numancia municipal police station ang suspek at pansamantalang ikinulong doon.

Matatandaan na pinagbabaril ng suspek ang kanyang kapatid na si Jeffrey Borega, 34 anyos, na dahilan ng kanyang agarang kamatayan.

Una rito, sinugod ng biktima ang suspek sa kanilang bahay at nanggugulo doon.

Sinubukan ng news team na kunan ng pahayag ang suspek kung ano ang malalim na motibo kung bakit niya nabaril ang kapatid gayuman man ay tumaggi itong makapanayam.

Ayon naman sa Numancia PNP, posibleng hindi na magsasampa ng kaso ang pamilya ng biktima at sa halip ay aayusin nalang ang kanilang problema.

SUSPEK SA PAMAMARIL SA CAMANCI NORTE, SINAMPAHAN NA NG KASO

ulat ni Darwin Tapayan, Energy FM 107.7 Kalibo

Sumailalim na sa inquest proceeding ang suspek sa nangyaring pamamaril sa brgy. Camanci Norte, gabi ng Miyerkules na ikinamatay ng tatlong barangay tanod at ikinasugat ng tatlo pa.

Ayon kay PO2 Marlon Del Rosario, imbestigador ng Numancia PNP, nahaharap sa tatlong counts of murder, at attempted murder si Kevin Cangson, 25 anyos, at driver ng riding in tandem.

Si Cangson ang tinuturong nakabaril sa tatlong tanod na ikinamatay nina Rogelio Saron, Jesconie Isidro, at ikinasugat ni Danilo Villorente na patuloy pang inoobserbahan sa isang pribadong ospital.

Una nang itinanggi ng suspek ang alegasyon sa kanya sa naging panayam ng Energy FM Kalibo.

Giit niya at ng kanyang live-in parter, nakacheck-in umano sila sa hotel kasama ng pamilya ng babae nang mangyari ang insidente.

Patuloy naman ang imbestigasyon ng mga kapulisan hinggil sa nasabing insidente sa posibleng pagkakakilalan at ikadarakip ng isa pa niyang kasama na sinasabing bumaril at pumatay sa tanod na si Walter Rembulat.

34 ANYOS NA LALAKI PATAY NANG PAGBABARILIN NG KANYANG KAPATID

ulat ni Archie Hilario, Energy FM 107.7 Kalibo

Patay ang isang 34 anyos na lalaki makaraang pagbabarilin ng kanyang sariling kapatid sa brgy. Bulwang, Numancia kahapon ng hapon.

Kinilala ang biktima na si Jeffrey Borega, laborer, at residente rin ng nasabing lugar.

Ayon kay PO2 Felizardo Navarra Jr., imbestigador ng Numancia PNP station, nakainom umano ang nasabing biktima at nanggugulo sa kanilang bahay.

Pinagbabasag pa umano ng biktima ang mga bote ng tindang soft-drinks at beer ng kanyang manugang bago ito sumugod sa bahay ng kanyang kapatid.

Dito, kumuha umano ng hindi pa malamang kalibre ang suspek na si Joewhan Borrega, 39 anyos at pinagbabaril ang biktima.

Nagtamo ng sugat sa dibdib at tiyan ang biktima at mabilis na isinugod sa provincial hospital pero hindi na ito umabot pa ng buhay.

Samantala, tumakas naman ang suspek at patuloy pang pinaghahanap ng mga kapulisan.

SUSPEK SA PAMAMARIL SA CAMANCI NORTE SUMAILALIM NA SA PARAFFIN TEST

Ulat ni Darwin Tapayan, Energy FM 107.7 Kalibo

Sumailalim na sa paraffin test sa crime laboratory ang nahuling suspek sa pamamaril sa brgy. Camanci Norte, Numancia Miyerkules ng gabi.

Ito ang kinumpirma ni PO2 Felizardo Navarra Jr., imbestigador ng Numancia municipal police station, sa panayam ng Energy FM Kalibo.

Si Kevin Cangson, 25 anyos, tubong Odiongan, Romblon at kasalakuyang nakatira sa brgy. Camanci Norte, ay sumang-ayon na maeksamin ng mga awtoridad kung nagpaputok nga ba ito ng baril.

Nanindigan ang suspek at tinuturong driver sa riding in tandem na wala siyang kinalaman sa nasabing insidente na ikinamatay ng tatlong tanod, at ikinasugat ng tatlo pa.

Ang paraffin test ay isang eksaminasyon kung saan ang suspek sa pamamaril ay isinasailalim sa chemical analysis para malaman kung may presensya ng gun powder sa kanyang kamay.

Ipapadala pa sa crime laboratory sa Iloilo ang ginawang paraffin test para makumpirma ang resulta ng eksaminasyon na posibleng magtatagal pa ng ilang araw.

Napag-alaman na ang paraffin test ay pwede paring pumalya bagaman ang isang tao ay talagang nagpaputok ng baril sa ilang kadahilanan.

Ang resulta ng eksaminasyon ay hindi konklusibo at pangunahing batayan parin ang mga testigo sa insidente.

Kasalukuyang nakakulong ngayon sa Numancia PNP station ang suspek at nakatakdang sampahan ng kaukulang kaso.

SUSPEK SA PAMAMARIL SA BRGY. CAMANCI NORTE, NUMANCIA NAARESTO NA

ulat ni Darwin Tapayan, Energy FM 107.7 Kalibo

Naaresto na ng mga kapulisan ang isa sa dalawang suspek sa nangyaring pamamaril sa brgy. Camanci Norte, Numancia Miyerkules ng gabi na ikinamatay ng tatlong tanod at ikinasugat ng  tatlo.

Kinilala ang nasabing suspek na si Kevin Cangson, 25-anyos, tubong Odiongan, Romblon pero pansamantalang nakatira sa brgy. Camanci Norte sa nasabing bayan.

Ayon kay PSInsp. Geo Colibao, hepe ng Numancia municipal police station, naaresto umano nila ang nasabing suspek sa police station mismo, matapos imbitahan ang mga ito para sa imbestigasyon.

Dagdag pa ni Colibao, positibong itinuro ng tatlong saksi ang nasabing suspek sa harap ng mga kapulisan bagay na inaresto ito ng mga awtoridad.

Ang suspek at ang kanyang live-in partner ay nasangkot sa kaguluhan sa birthday party sa kanilang boarding sa nasabing barangay Martes ng gabi kung saan nakaalitan nila ang mga rumespondeng tanod at ang punong barangay.

Sa alegasyon ni Shenna mae Baylon, live-in partner ng suspek, sinuntok umano siya ni punong barangay John Maribojo na natamaan sa kanyang mata. 

Si Cangson ang sinasabing driver ng motorsiklo at nakabaril sa tatlong tanod na ikinamatay nina Rogelio Saron, 38 anyos, Jesconie Isidro, 35 samantalang patuloy namang ginagamot sa ospital ang kasama nilang si Danilo Villorente, 43. 

Sa panayam ng Energy FM Kalibo, mariin namang itinatanggi ng suspek ang alegasyon sa kanya.

Giit niya at ng kanyang live-in parter, nakacheck-in umano sila sa hotel kasama ng pamilya ng babae nang mangyari ang insidente.

Nakatakdang sampahan ng kasong murder at frustrated murder ang nasabing suspek.

Patuloy naman ang imbestigasyon ng mga kapulisan hinggil sa nasabing insidente sa posibleng pagkakakilalan at ikadarakip ng isa pa niyang kasama na sinasabing bumaril at pumatay sa tanod na si Walter Rembulat.

Samantala, nasa maayos nang kalagayan ang dalawang biktima ng stray bullet –isang 9 anyos na babae at 23 anyos na lalaki.

3 TANOD PATAY NANG PAGBABARILIN NG RIDING IN TANDEM SA NUMANCIA

Patay ang tatlong tanod sa brgy. Camanci Norte makaraang pagbabarilin ng riding in tandem.

Naganap ang nasabing insidente sa peryahan ng nasabing barangay dakong alas-10 ng gabi habang nasa kasagsagan ng duty ang mga nasabing tanod.

Ayon sa report ng Numancia PNP, nilapitan umano ng gun man ang tanod na si Walter Rembulat, 35 anyos, at pinagbabaril.

Pinagtulungan naman ng tatlo pang tanod na hulihin ang nasabing gunman.

Dito na pinagbabaril ng gunman at driver ang mga tanod na sina Danilo Villorente, 43 anyos, Rogelio Saron, 38, Jesconie Isidro, 35.

Agad namang nakatakas ang hindi pa nakikilalang mga suspek na nakabonet.

Isinugod naman sa magkaibang hospital ang mga biktima pero hindi na umabot ng buhay si Rembolat at Saron. 

Binawian ng buhay si Isidro habang ginagamot sa intensive care unit dakong alas-2:00 ng madaling araw kanina.

Napag-alaman na dalawang sibilyan na nasa peryahan ang natamaan ng stray bullet – isang 9-anyos na babae at 23 anyos na lalaki.

Inaalam pa ng mga kapulisan ang motibo nang nasabing insidente.