SB MEMBER NA SANGKOT SA ILIGAL NA DROGA SA AKLAN, SUMUKO SA POLICE REGIONAL DIRECTOR

ulat ni Darwin Tapaya, Energy FM 107.7 Kalibo

Sumuko sa pulisya ang isang Sangguniang Bayan member sa probinsiya ng Aklan matapos masangkot sa iligal na droga.

Kinilala ang naturang opisyal na si Daligdig “Datu”Sumndad, SB member ng Malay.

Ito ang kinumperma sa Energy FM Kalibo ni SPO1 Nida Gregas, tagapagsalita ng Aklan Police Provincial Office (Appo).

Ayon kay Gregas, boluntaryo umanong sumuko si Sumndad kay PCSupt. Hawthorne Binag, director ng Police Regional Office 6. 

Sinabi pa ni Gregas na bagaman sumuko siya sa mga awtoridad, patuloy anya ang gagawing monitoring ng mga kapulisan sa kanya.

Si Sumdad ay itinuturing na high value target sa lalawigan ng Aklan.

AKLAN PNP IKINABAHALA ANG SUNOD-SUNOD NA KASO NG RIDING-IN-TANDEM SA PROBINSIYA

ulat ni Darwin Tapayan, Energy FM 107.7 Kalibo

Ikinabahala ng Aklan Police Provincial Office (APPO) ang sunod-sunod na kaso ng riding-in-tandem sa probinsiya.

Sa isang press conference, sinabi ni PSSupt. Lope Manlapaz, direktor ng APPO, paiigtingin pa ng mga kapulisan ang seguridad at tutukan ang pagsawata ng mga nasabing kaso.

Nitong linggo lang tatlong kaso na nang riding-in-tandem ang naganap sa Aklan.

Nitong Lunes, patay nang pagbabarilin sa brgy. Odiong, Altavas ang drug surenderee na kinilalang si Jovanie Gervacio, residente ng brgy. Poblacion sa nasabing bayan.

Patuloy namang ginagamot sa ospital ang negosyanteng si Merlu Manokan makaraang pagbabarilin din sa loob ng kanilang bahay sa brgy. Aquino, Ibajay.

At ngayong Huwebes, tatlong tanod ang napatay at isa pang tanod ang sugatan matapos pagbabarilin din sa peryahan sa brgy. Camanci Norte, Numancia.

Ayon kay Manlapaz, bagaman naka-full-alert ngayon ang mga kapulisan nagkataon anya na ang mga nasabing insidente ay naganap malayo sa mga checkpoint sa mga nabanggit na lugar.

Aalamin rin anya nila kung iisang grupo lang ba ang mga suspek sa mga nasabing insidente.

Napag-alaman na simula nang maupo si Manlapaz bilang direktor ng Aklan PNP, limang kaso na nang riding-in-tandem ang naganap sa kanyang administrasyon.

Aminado naman siya na hirap parin sila sa pagtukoy sa mga suspek gayunman pinasiguro niya na hidi tumitigil ang mga kapulisan sa paglutas ng mga nasabing kaso.

AKLAN PNP LALU PANG PINAIGTING ANG PWERSA LABAN SA MGA ARMADONG GRUPO

Hinigpitan pa ng Aklan Philippine National Police ang siguridad sa probinisya.

Ang paghihigpit sa seguridad ay kasunod ng patuloy na bakbakan sa Marawi City at pagsalakay ng mga armadong grupo sa isang police station sa Iloilo nitong Linggo.

Sa panayam ng Energy FM Kalibo kay PSSupt. Lope Manlapaz, direktor ng Aklan Police Provincial Office, patuloy ang ginagawa nilang checkpoint sa mga boundary ng lalawigan.

Binabantayan anya ng mga kapulisan ang mga kahinahinalang mga tao na papasok sa lalawigan lalu na sa isla ng Boracay. Nabatid na nagdagdag narin ng pwersa ng mga kapulisan sa naturang isla.

Nakaalerto rin anya ang kanilang pwersa sa Kalibo International Airport katuwang ang Philippine Army, PNP AVSEGROUP.

Sa kabilang banda, patuloy rin ang monitoring ng Maritime Police at Philippine Coastguard sa mga baybaying sakop ng probinsiya.

Humingi naman ng kooperasyon si Manlapaz sa taumbayan na agad na magreport sa mga kapulisan kapag may mga mamataang kahinahinalaang tao o bagay sa kani-kanilang lugar.

NO. 1 MOST WANTED SA BAYAN NG MAKATO, ARESTADO; BRGY. KAGAWAD ARESTADO RIN SA PAGTATAGO SA SUSPEK

ulat ni Darwin Tapayan, Energy FM 107.7 Kalibo

Arestado ang no. 1 most wanted person ng Makato municipal police station sa kasong murder sa brgy. Francisco Sur, Tibiao, Antique.

Kinilala ang akusado na si Redentor Tumulog, 29 anyos, residente ng brgy. Salazar, Tibiao at kabilang sa listahan ng crime group.

Inaresto ang nasabing lalaki sa bisa ng warrant of arrest na inilabas ng regional trial court sa bayan ng Kalibo noon pang Setyembre 2014.

Inaresto rin ng operatiba ang barangay kagawad na nangalaga sa wanted person.

Maliban rito nahulihan rin ng caliber 38 revolver at may anim na live ammunition si kgd. Jesus Mariano, 59 anyos, residente ng brgy. Bandoja, Tibiao.

Isinagawa ang operasyon ng pinagsamang pwersa ng Crime Investigation and Detection Group (CIDG), APPO PIB, APPO Trackers Team at Tibiao municipal police station.

Ang akusado ay nasa pangangalaga na ng CIDG saka ito dadalhin sa kaukulang korte.

Nakakulong naman ang konsehal sa Tibiao municipal police station sa Antique para sa kaukulang disposisyon.

MATATAAS NA URI NG MGA BALA AT PAMPASABOG NAREKOBER SA SEMENTERYO SA KALIBO

ulat ni Darwin Tapayan, Energy FM 107.7 Kalibo

photo (c) APSC

Narekober ng mga awtoridad ang iba-ibang bala at isang pampasabog sa Medalla Milagrosa Cemetery sa bayan ng Kalibo pasado alas-4:00 ng hapon.

Sa report ng Kalibo PNP, nakasilid ang mga ito sa isang brown envelope at may nakasulat na "Kung sino man po makakita nito pakibigay sa pulis. Salamat".

Ang mga narekober ay: 79 rounds of cal. 30 (7.62mm); 10 rounds of cal. 5.56; 17 rounds of cal. 50 (12.7mm) live ammunition; isang rifle grenade; isang mortar propellant o propeller; tatlong empty cartridge o shell ng 20mm antiaircraft.

Sa panayam ng Energy FM kay SPO4 Vengie Repedro, EOD Technician ng Aklan Public Safety Company, walang dapat ikabahala ang taumbayan sa nasabing insidente.

Posible anyang iniwan ito ng pamilya ng yumaong sundalo sa takot na makasuhan sila kapag direktang ibinigay sa pulis.

Nanawagan siya na kung sino man ang may mga baril, bala o pampasabog ay iturn-over ang mga ito direkta sa pulisya.

Napag-alaman na natagpuan ang mga ito ng isang 24 anyos na construction worker.

Sa ngayon ay nasa kustodiya na ng APSC ang mga nasabing bala at pampasabog para sa kaukulang disposisyon.

10 PULIS MULA AKLAN PINADALA SA MARAWI CITY

photo (c) Aklan PPO

Sampung pulis ng Aklan Provincial Police Office (APPO) ang sumabak na sa nagaganap na bakbakan sa Marawi City.

Sa panayam ng Energy FM Kalibo, sinabi ni SPO1 Nida Gregas, tagapagsalita ng APPO, na ang mga nasabing pulis ay galing sa Aklan Public Safety Company.

Karamihan umano sa mga pulis na ito ay mga police officer 1.

Sinabi ni Gregas na sa buong rehiyon, kabuuang 114 kapulisan ang pinadala na sa Marawi City bilang dagdag pwersa kontra sa pagsagupa ng mga terorista.

Malaking bahagi ng bilang ang mula sa Regional Public Safety Company Battalion ng Police Regional Office 6. May mga pulis din mula sa mga lalawigan ng Antique at Capiz.

Nakaalerto parin ang mga kapulisan sa probinsiya simula nang ideklara ni pangulong Rodrigo Duterte ang Martial Law sa Mindanao.

Matatandaan na nitong Mayo 23 nang unang atakehin ng Maute terror group ang Marawi City kung saan nasa 100 na ang naiulat na namatay.

KAPULISAN SA AKLAN NAKA-FULL ALERT KASUNOD NG DEKLARASYON NG MARTIAL LAW SA MINDANAO

ulat ni Darwin Tapayan, Energy FM 107.7 Kalibo

photo (c) Aklan PPO

Naka-full alert ngayon ang mga kapulisan sa probinsiya kasunod ng deklarasyon ni Pangulong Rodrigo Duterte ng Martial Law sa Mindanao gabi ng Mayo 23.

Sinabi ni PSSupt. Lope Manlapaz, acting provincial director ng Aklan Provincial Police Office, sinisiguro ng mga kapulisan ang seguridad at kaligtasan ng taumbayan.

Paalala ng opisyal, hindi dapat magulat ang publiko sa mga police checkpoints sa mga strategic area at sa deployment ng mga sundalo sa iba-ibang lugar.

Nabatid na nakikipagtulungan narin ang Muslim communities sa Aklan at nakahandang magbigay ng anumang impormasyon sa mga awtoridad sakaling may namataan silang “suspicious visitors” sa kanilang lugar.

Hinikayat rin ni Manlapaz ang taumbayan na i-report agad sa mga kapulisan o militar ang anumang impormasyon kaugnay sa presensiya ng mga teroristang grupo.

Pinaalalahanan rin niya ang publiko na maging responsable sa pagpost ng mga impormasyon sa social media kaugnay rito nang sa gayun ay maiwasan ang panic.

Idineklara ni Duterte ang Martial Law sa Mindanao matapos atakehin ng teroristang Maute group ang Marawi city noong Mayo 23.

KAMPANYA LABAN SA ILIGAL NA DROGA PAIIGTINGIN SA MGA KABARANGAYAN

Nakatakdang magpulong sa Aklan Provincial Police Office (APPO) ang mga lider ng Association of Barangay Captains (ABC) mula sa 17 mga munisipyo ng Aklan sa darating na Mayo 12.

Pag-uusapan sa pagpupulong na ito ang kani-kanilang mga tungkulin sa anti-drug campaign ng kasalukuyang administrasyon.

Sinabi ni chief inspector Reynante Jomocan, Aklan police relations chief, na ang pagpapatibay ng mga tungkulin ng mga lider ng barangay sa kampanya laban sa droga ay alinsunod sa Board Resolution No. 3 series of 2017 of the Dangerous Drugs Board.

Ayon sa report, sa 325 na mga kabarangayan sa Aklan, 214 ang tinuturing na drug affected sa pagsisimula ng Duterte’s anti-drug campaign.

Nabatid na sa 214 na ito, 114 na ang drug-cleared ngayon pero sasailalim parin umano sa validation at evaluation ng regional oversight committee ng Dangerous Drugs Board.

Sa natitirang 100 drug-affected barangays, 48 na rito ang nasa post-operation phase at 52 ang nasa operation phase.

Para sa municipality level, sinabi ni Jomocan na ang mga bayan ng Libacao, Buruanga, at Madalag ay sasailalim nasa validation at evaluation para madeklarang drug-clear.

AKLAN PNP NAGHAHANDA NA SA SEMANA SANTA AT SUMMER VACATION

ulat ni Darwin Tapayan, Energy FM 107.7 Kalibo

Naghahanda na ang Aklan Police Provincial Office (APPO) para sa seguridad sa nalalapit na semana santa at summer vacation.

Kaugnay rito, sinabi ni APPO public information officer SPO1 Nida Gregas, inatasan na ang pwersa ng mga kapulisan sa lalawigan upang maglaan ng sapat na police presence, mobile o beat patrol, intelligence gathering operations at public safety para sa semana santa.

Maliban sa paghahanda para sa Lenten season, pinalalawig na rin ng Aklan PNP ang operational plan para sa summer vacation. Kasama rito ang maxim

um deployment ng PNP personnel sa provincial at sa mga municipal police stations at maging sa mga mobile patrol.

Kabilang rin sa ipapatupad ang pagakakaroon ng Police Motorists’ Assistance Centers sa mga matataong lugar at ang pag-iinspeksyon sa lahat ng mga terminal sa probinsiya.

Maglalagay rin umano sila ng mga information desk sa mga bus terminal, mga pier at mga paliparan, mga lugar ng pagsamba at sa mga resort at tourist spot.

Makikipag-ugnayan rin umano ang lahat ng mga field unit commander sa mga organizer ng mga aktibidad ng simbahan at sa mga kinauukulan.

DROGA, SUGAL AT WANTED PERSON, SUSUPILIN NG BAGONG OIC NG AKLAN PNP

ulat ni Darwin Tapayan, Energy FM Kalibo

photo by APPO 

Striktong ipapatupad ng bagong officer-in-charge ng Aklan police provincial office (APPO) ang mga batas laban sa wanted person, illegal drugs, at illegal gambling sa kanyang panunungkulan.

Sa panayam ng Energy FM Kalibo sinabi ni PSSupt. Lope Manlapaz, na ang mga atas na ito bilang OIC ng police force sa lalawigan ay mula sa regional director.

Ipapagpapatuloy rin umano niya ang mga sinimulan ng dating administrasyon lalu na sa pagpapanatili ng peace and order at pagsupil sa mga kriminalidad sa probinsiya.

Kaugnay rito hiniling niya ang kooperasyon ng mga Aklanon para sa kaayusan at katahimikan ng Aklan. Paliwanag ni Manlapaz, hindi nila matutupad ang kanilang atas at mapanatili ang kaayusan kung walang aktibong suporta mula sa mamamayan.

Si Manlapaz ay opisyal na umupo noong Lunes bilang bagong OIC ng Aklan PNP kapalit ni dating acting provincial director PSSupt. John Mitchell Jamili matapos siyang ilipat sa Campo Crame.

Ang kasalukuyang OIC ay una nang naglingkod bilang hepe ng regional logistic division ng police regional office 6.

PNP-AKLAN KINUMPIRMA ANG PAGBUBUKAS NG STL SA PROBINSIYA

ulat ni Darwin Tapayan, Energy FM Kalibo

APPO

Kinumpirma ni Aklan Police Provincila Office acting director PSupt. Pedro Enriquez sa Energy FM Kalibo na magsisimula na ang operasyon ng extended small-town lottery (STL) sa lalawigan ngayong buwan ng Marso.

Ito ay base sa sulat na natanggap niya mula sa Philippine Charity Sweeptakes Office (PCSO) na nagsasabing mayroon na silang otorisadong operator sa probinsiya.

Samantala,  sinabi naman ni Sangguniang Panlalawigan member at committee chair on peace and order Nemisio Neron na tutol siya sa anumang uri nang sugal maging legal man ito illegal. Sa kabila nito, sinabi niya na kung ito ay alinsunod sa batas ay wala silang magagawa rito.

Sinabi pa ni Neron na ang magagawa lamang umano nila ay bantayan ang operasyon ng STL sa probinsiya na hindi ito maabuso. Posible naman anyang pag-usapan ng Sanggunian ang isyung ito.

Una nang nagpahayag ng pagtutol ang Diocese of Kalibo sa takdang pagbukas ng ganitong uri ng sugal sa probinsiya.

Nabatid na ang pagsasaligal ng STL ay naglalayong makapagdadala ng malaking kita sa mga lokal na pamahalaan,

pagbibigay ng pangkabuhay sa karamihan at pag-alis ng mga iligalista.