WALANG BANTA SA SEGURIDAD SA BORACAY NGAYONG SEMANA SANTA - BORACAY PNP OFFICIAL

Walang banta sa seguridad sa Isla ng Boracay kaugnay ng paggunita ng Semana Santa alinsunod sa monitoring ng security forces ng kapulisan dito.

Sinabi ni SInsp. Jsoe Mark Anthony Gesulga, deputy chief ng Boracay Tourist Assistance Center (BTAC), ang isla ay nananatiling ligtas.

Giniit ni Gesulga na bagaman walang banta sa seguridad, patuloy umano silang magbabantay upang masiguro ang kaligtasan ng mga turista dito.

Ayon pa sa opisyal ng BTAC, ang iba pang multi-sectoral agencies sa isla, kabilang na ang Task Force Boracay ng Philippine Army, Philippine Navy, Philippine Coast Guard at PNP Maritime Group, ay patuloy sa pagbabantay sa entry at exit point at maging sa mga baybaying sakop ng isla.

Sinabi pa ni Gesulga na pinaigting na nila ang seguridad kasunod ng nangyaring bakbakan sa Bohol noong Martes sa pagitan ng sundalo ng gobyerno at mga rebeldeng Abu Sayyaf.

Nabatid na nasa 188 police personnel ang naka-deploy ngayon sa isla para sa Semana Santa. Tinataya namang nasa 50,000 turista ang bibisita sa Boracay kaugnay ng nasabing pagdiriwang. (PNA)

MGA PARTY, MALALAKAS NA TUGTOG IPAGBABAWAL SA BORACAY SA BYERNES SANTO

Ipagbabawal sa Isla ng Boracay ang mga kasiyahan at mga malalakas na tugtog sa darating na Byernes Santo.

Sinabi ni Felix delos Santos, chief tourism operations officer ng Boracay, ito ay para tahimik na gunitain ng mga mananampalatayang Katoliko ang sakripisyo ng Panginoong Jesucrsito.

Ayon kay delos Santos, ang ban ay magsisimula sa Byernes Santo, alas-6:00 ng umaga at magtatapos alas-6:00 ng umaga ng Sabado de Gloria.

Nakasaad sa panuntunan ng municipal resolution no. 015 ay pagbabawal ng pagbibigay ng mga permit sa pagsasagawa ng mga kasiyahan o party  sa Boracay sa Byernes Santo.

Nabatid na ang panuntunang ito ay ipinapatupad bawat taon simula nang ito ay maipasa noong 2009.

Bagaman walang itinakdang parusa, sinabi ng opisyal na ang mga kapulisan ay magpapatrolya parin sa isla upang masiguro na ang resolusyon ay sinusunod.

Nilinaw naman niya na ang mga bars at restaurant sa isla ay hindi binabawalang mag-operate maliban lamang sa pagpapatugtog ng mga maiingay na musika. (PNA)

TRICYCLE VS. MOTOR, 1 PATAY, 2 SUGATAN SA TABAYON, BANGA

ulat ni Darwin Tapayan, Energy FM 107.7 Kalibo

Binawian ng buhay ang isang 63-anyos na lalaki matapos masangkot sa banggaan ng motorsiklo at tricycle sa brgy. Tabayon, Banga kahapon.

Kinilala ang biktima at backrider ng motorsiklo na si Gaodencio Ropa, residente ng Bacan, Banga.

Samantalang sugatan naman ang driver ng motorsiklo na si Erol Julian, residente ng Camaligan, Batan at driver ng tricycle na si Benigno Morales, 50 anyos, residente ng Pagsanjan, Banga.

Ayon sa imbestigasyon ng Banga municipal police station, umagaw umano ng linya sa kurbadang bahagi ng kalsada ang tricycle dahilan para masagi niya ang kasalubong na motorsiklo.

Binawian ng buhay ang matanda habang ginagamot sa intensive care unit ng provincial hospital dakong alas-6:30 na na ng umaga ngayong araw.

Samantala, nakahospital arrest naman sa provincial hospital ang driver ng tricycle na nabatid na lasing nang mangyari ang aksidente.

Maswerte namang nagtamo lamang ng kaunting sugat ang driver ng motor at inirefer sa out-patient department ng ospital.

SNATCHER UMATAKE SA BORACAY; AUSTRALIAN NATIONAL NATANGAYAN NG PHP111,000

ulat ni Darwin Tapayan, Energy FM 107.7 Kalibo

Isang Australian National ang nagreklamo sa Boracay PNP station makaraan umanong mabiktima ng snatching sa Isla ng Boracay kahapon dakong alas-10 ng umaga.

Ayon sa biktimang si Charlotte Collingwood, nag-aantay umano sila ng masasakyang motorsiklo kasama ang kanyang boyfriend sa brgy. Manocmanoc nang mangyari ang nasabing insidente.

May lumapit umano sa kanilang motorsiklo at hinablot ng sakay nito ang kanyang shoulder bag saka ito humarurot ng takbo papalayo.

Sinabi ng biktima na kabilang umano sa laman ng nasabing bag ang laptop, relo, necklace, camera at perang mahigit Php7,000. Sa pagtaya ng turista, aabot  ang mga ito sa halagang Php111,000.

Nagpapatuloy pa ang imbestigasyon ng mga kapulisan hinggil sa nasabing kaso.

FREE WIFI NAKATAKDANG ILAGAY SA COMPOUND NG PROVINCIAL CAPITOL

ulat ni Darwin Tapayan, Energy FM 107.7 Kalibo

Aprubado na sa Sangguniang Panlalawigan ang kahilingan ng pamahalaang lokal ng Aklan na sumailalim sa isang kasunduan para sa libreng wifi sa compound ng provincial capitol.

Ang kasunduan ay sa pagitan ng pamahalaang lokal at ng Department of Information and Communication Technology (DICT).

Ang implementasyon ay bahagi ng proyekto ng free-wifi internet access para sa mga pampublikong lugar.

Samantala, plano rin ng pamahalaang lokal ng probinsiya na isailalim sa pagsasanay ang nasa 500 Aklanon sa buong taon para maging information technology (IT) professional.

Ang plano ay bahagi ng technical training project ng Aklan Information and Communications Technology (ICT) council sa tulong ng DICT.

Ayon kay Marsh Bernabe, local economic and investment promotions officer of the provincial government, layun ng proyektong ito ang makahikayat ng mas maraming IT-BPO o business process outsourcing companies na mag-locate sa Aklan.

Sinabi pa ni Bernabe na nakatakdang simulan ang pagsasanay sa darating na Hunyo.

ENTRANCE SA TIGAYON HILL, LIBRE SA HUWEBES AT BYERNES SANTO

Libre sa publiko ang entrance sa Tigayon Hill sa darating na Huwebes at Byernes Santo ayon sa lokal na pamahalaan ng Kalibo.

Ayon kay Rhea Rose Meren, Kalibo tourism office head, ang Tigayon Hill ay isa umano sa mga paboritong destinasyon sa panahon ng Semana Santa.

Una nang naglinis ang lokal na pamahalaan nitong nakalipas na Sabado at Linggo sa Tigayon Hill.

Tinuturing ng pamahalaang lokal na isa itong "enchanted destination."

Sa mga regular na araw ang entrance sa Tigayon Hill ay Php30 para sa mga residente ng Kalibo at Php100 para naman sa mga turista.

Maliban sa Tigayon Hill, ang iba pang mga paboritong Holy Week destination sa probinsiya ay ang Manduyog Hill sa Banga, Spanish-old sa Tangalan na itinayo pa noong 1889.

Sa Boracay, ang mga popular na Holy Week destination ay ang Sta. Lucia chapel sa brgy. Manocmanoc, Nuestra Señora Lourdes chapel sa Yapak, St. John the Baptist sa Angol, Mary Mother of All Nations sa Pearl of the Pacific Resort at ang Holy Rosary Parish sa Balabag. (PNA)