OPERASYON NG SMALL TOWN LOTTERY SA AKLAN MULING IIMBESTIGAHAN NG SANGGUNIANG PANLALAWIGAN

Muling iimbestigahan ng Sangguniang Panlalawigan ang operasyon ng small town lottery dito sa Aklan.

Gusto kasing siguraduhin ng Sanggunian kung nasusunod ng authorized agent corporation ang kanilang presumptive monthly retail receipt (PMRR) na Php23 milyon.

Nagsimula ang Yetbo Gaming Corporation ng operasyon ng STL sa probinsiya Marso 2017 na may opisina sa N. Roldan St., Kalibo.

Bago pa man ang operasyon ng STL sa probinsiya nangako ang Philippine Charity Sweepstakes Office (PCSO) Aklan branch at Yetbo na magsusumite ng buwanang report sa Sanggunian.

Pero ayon sa Sanggunian simula noon ay wala silang natanggap na report mula sa kanila.

Huling pinatawag ng Sangguniang ang PCSO-Aklan Mayo noong nakaraang taon kung saan napag-alaman na sa mga unang buwan ng kanilang operasyon ay mababa ang kanilang kinita kumpara sa kanilang PMRR.

Napag-alaman rin ng SP na ilan sa kanilang implementing rules and guidelines ang hindi nasusunod.

Sinabi noong ng PCSO-Aklan na ang Yetbo gaming corporation ay may cashbond na katumbas ng kanilang PMRR. Dito anya kukunin ang kakulangan sa kinita ng nasabing gaming corporation.

Sinabi pa ng PCSO na kung magpapatuloy na mababa ang kikitain ng korporasyon ay ipapasara nila ang operasyon nito.

Matatandaan na ang SP Aklan ay nagpasa ng resolusyon upang mahigpit na tutulan ang operasyon ng STL sa Aklan.

PCSO CHAIR CORPUZ NAKIPAGDAYALOGO SA MGA ALKALDE, MGA HEPE NG PULIS SA AKLAN

ulat ni Darwin Tapayan, Energy FM 107.7 Kalibo

Nakipagdayalogo si Philippine Charity Sweepstake Office (PCSO) chairman Jose Jorge Corpuz sa mga alkalde at mga hepe ng pulis sa Aklan.

Sa naganap na dayalogo, inilahad ni Corpuz ang mga programa at proyekto ng PCSO lalu na ang tulong na dala ng operasyon ng Small-town Lottery (STL).

Iginiit ni Corpuz na ang STL ay isang paraan para kumita ang gobyerno na ginagamit sa paglalaan ng tulong medikal sa taumbayan.

Ayon sa report ng PCSO Aklan, sa buwan ng Hunyo ay kumita ng mahigit na siyam na milyon ang operasyon ng STL sa lalawigan.

Gayunman mababa ang bilang na ito sa kanilang presumptive monthly retail receipt (PMRR) na 23 milyon bawat buwan.

Ipinagmalaki ng PCSO ang kabuuang mahigit Php3 milyon na bahagi na naibigay na nila sa mga lokal na pamahalaan sa Aklan sa operasyon ng STL simula Marso nitong taon.

Nagpaabot naman ng hinaing ang ilang opisyal sa umao’y kakulangan ng koordinasyon ng authorized agent corporation na Yetbo sa mga lokal na pamahalaan kaugnay ng kanilang operasyon.

Sa kabilang banda, ayon sa Aklan PNP, wala pa silang napag-alamang iligal na aktibidad kaugnay sa operasyon ng STL sa probinsiya.

OPERASYON NG SMALL TOWN LOTTERY PINASUSUSPENDE NG SP-AKLAN

ulat ni Darwin Tapayan, Energy FM 107.7 Kalibo

Ipinapasuspende ng Sangguniang Panlalawigan ang operasyon ng small town lottery sa probinsiya dahil sa umano'y paglabag nito sa sariling 2016 implementing rules and regulations (IRR).

Ito ay kasunod ng pag-amin ni John Martin Alipao, financial management officer I ng Philippine Charity Sweepstakes Office (PCSO) Aklan branch.

Sinabi ni Alipao na hindi nila naipapatupad ang paggamit ng handheld terminal sa operasyon ng stl sa Aklan base sa umiiral na IRR.

Sinabi ni Alipao na noong Abril kumita ang stl operation ng mahigit Php7 milyon.

Pinagtataka ng Sanggunian kung lahat ba ng kinikita sa operasyon ay nairiremit ng tama sa PCSO; napakalayo kasi ang kinitang ito sa mahigit Php23 milyon na presumptive monthly retail receipt (PMRR) ng authorized agent corporation.

Sinabi ni Alipao na ang Yetbo gaming corporation ay may cashbond na katumbas ng kanilang PMRR. Dito anya kukunin ang kakulangan sa kinita ng nasabing gaming corporation.

Kaugnay rito nais ring siguraduhin ng Sanggunian na binabawasan nga ang kanilang cashbond.

Samantala, kung magpapatuloy na mababa ang kikitain ng korporasyon ay ipapasara nila ang operasyon nito.

Nabatid na sa buong lalawigan, ang lahat ng munisipalidad sa Aklan ay nag-ooperate ng stl maliban lamang sa Madalag.

Nagpasa naman ng resolusyon ang Sanggunian na humihiling na icomply agad ng PCSO ang umiiral na IRR.

OPERASYON NG STL SA AKLAN IPINAPASUSPENDE NG SANGGUNIANG PANLALAWIGAN

ulat ni Darwin Tapayan, Energy FM 107.7 Kalibo

Ipinapasuspende ng Sangguniang Panlalawigan ng Aklan ang takdang operasyon ng small-town lottery sa probinsiya dahil sa mga isyu ng legalidad na kinakaharap nito.

Sa ginanap na pagdinig ng committee on games and amusement, kinuwestiyon ng mga lokal na mambabatas ang taga-Philippine Charity Sweepstakes Office (PCSO) kung bakit hindi pwedeng buwisan ng lokal na pamahalaan ang operator nito.

Paliwanag ni Bam Urubio, national coordinator on STL operation ng PCSO, na hindi na kailangan ng permit mula sa lokal na pamahalaan ang Authorized Agent Corporations (ACC) dahil nakabayad na ito ng buwis sa national.

Pinasiguro naman ni Urubio na makikinabang rito ang mga lokal na pamahalaan at malaking tulong ito sa mga mahihirap.

Nababahala naman si SP member Jay Tejada na isa itong pagpapakababa ng kanilang kakayahan na mabigyang pahintulot ang operasyong ito.

Kaugnay rito, nanindigan si vice governor Reynaldo Quimpo na isuspende ang nasabing operasyon. Posibleng namang idulog sa korte ang kwestiyon ng legalidad ng operasyon.

GRUPO NG MGA NEGOSYANTE SA PROBINSYA TUTOL RIN SA PAGBUKAS NG STL SA AKLAN

ulat ni Darwin Tapayan, Energy FM 107.7 Kalibo

Naglabas rin ng opisyal na pahayag ang grupo ng mga negosyante sa probinsiya kaugnay ng takdang pagbubukas ng small-town lottery (STL) sa Aklan.

Sa inilabas na board resolution ng Philippine Chamber of Commerce and Industry (PCCI) Aklan chapter, mahigpit nilang tinututulan ang operasyon ng Philippine Charity Sweepstakes Office (PCSO) expanded STL.

Nanindigan ang grupo na dahil narin sa laganap na mga legal na sugal sa probinsiya gaya ng lotto, bingo, at sabong  ay hindi na kailangan pa ang STL.

Paliwanag nila, hindi maganda ang epekto nito sa lokal na ekonomiya lalu na sa mga mahihirap.

Ang resolusyon ay personal na binasa ni Jose Mari Aldecoa, vice president ng PCCI-Aklan board of directors, sa committee hearing kahapon sa Sangguniang Panlalawigan kaugnay ng operasyon ng sugal na ito.

Samantala, sa ngayon ay tatlo nang opisyal na pahayag ng pagtutol ang natanggap ng SP-Aklan mula sa Diocese of Kalibo, PCCI-Aklan, at Couples for Christ.

PCSO IPAPATAWAG NG SP-AKLAN RE: PAGBUBUKAS NG STL SA PROBINSIYA

ulat ni Darwin Tapayan, Energy FM Kalibo

Nakatakdang ipatawag ng Sangguniang Panlalawigan ng Aklan ang pamunuan ng Philippine Charity Sweepstakes Office (PCSO) kaugnay ng takdang pagbubukas ng expanded small-town lottery (STL) sa probinsiya.

Ito ay matapos ipaabot ni SP member Lilian Tirol sa regular session ng Sanggunian ang kanyang pagkabahala kaugnay sa narinig niyang oposisyon ng simbahang Katoliko sa nasabing sugal.

Matatandaan na una nang naglabas ng pastoral letter ang diocese of Kalibo upang tutulan ang operasyon ng STL sa probinsiya sa kabila ng legalidad nito. Binasa ang nasabing pahayag sa mga misa sa lahat ng simbahang sakop ng dayoseso noong Linggo. 

Sang-ayon naman ng konseho na ipatawag ang PCSO para sa isang pagdinig na pangungunahan ng committee on games and amusement ngayong linggo upang ipaliwanag ang operasyon ng STL. Kukuwestiyunin rin kung paano magkakaroon ng bahagi ng kita ang mga lokal na pamahalaan sa operasyong ito.

Naniniwala naman si SP member Harry Sucgang na “premature” kung ipapatawag kaagad sa Sanggunian ang authorized operator ng STL. Makakabuti umano na maobserbahan muna ang kanilang operasyon simula ngayong Marso 25 saka ito ipatawag.

Una nang naireport na ang Yetbo Gaming Corporation ang nabigyan ng awtoridad na mag-operate ng nasabing number game sa probinsiya at may opisina sa N. Roldan St., Poblacion, Kalibo.

PNP-AKLAN KINUMPIRMA ANG PAGBUBUKAS NG STL SA PROBINSIYA

ulat ni Darwin Tapayan, Energy FM Kalibo

APPO

Kinumpirma ni Aklan Police Provincila Office acting director PSupt. Pedro Enriquez sa Energy FM Kalibo na magsisimula na ang operasyon ng extended small-town lottery (STL) sa lalawigan ngayong buwan ng Marso.

Ito ay base sa sulat na natanggap niya mula sa Philippine Charity Sweeptakes Office (PCSO) na nagsasabing mayroon na silang otorisadong operator sa probinsiya.

Samantala,  sinabi naman ni Sangguniang Panlalawigan member at committee chair on peace and order Nemisio Neron na tutol siya sa anumang uri nang sugal maging legal man ito illegal. Sa kabila nito, sinabi niya na kung ito ay alinsunod sa batas ay wala silang magagawa rito.

Sinabi pa ni Neron na ang magagawa lamang umano nila ay bantayan ang operasyon ng STL sa probinsiya na hindi ito maabuso. Posible naman anyang pag-usapan ng Sanggunian ang isyung ito.

Una nang nagpahayag ng pagtutol ang Diocese of Kalibo sa takdang pagbukas ng ganitong uri ng sugal sa probinsiya.

Nabatid na ang pagsasaligal ng STL ay naglalayong makapagdadala ng malaking kita sa mga lokal na pamahalaan,

pagbibigay ng pangkabuhay sa karamihan at pag-alis ng mga iligalista.