SALISI GANG UMATAKE SA LOOB NG MALL SA BORACAY

Pinag-iingat ngayon ng mga kapulisan sa Isla ng Boracay ang taumbayan at mga bisita na mag-ingat sa salisi gang.

Umatake kasi ang mga ito sa isang mall doon kung saan isang Korean National ang kanilang nanakawan ng iPhone7.

Kumakain sa food court ang biktimang babae kasama ang asawa at anak na babae nang lapitan sila ng mga suspek.

Makikita sa kuha ng CCTV sa loob ng mall ang nasa pitong babae na halatang nagkukunsyaba para nakawan ang biktima.

Nagkukunwaring mga kostumer ang mga ito. Tinatayang nasa 35 pataas ang kanilang mga edad.

Ano mang impormasyon o pagkakalilan sa mga suspek ay makipag-ugnayan lamang sa  Boracay Police Community Precinct (Tel. No.- 288-3066/166; 288-6940 o 09075036235).

Nagpaalala ang mga kapulisan sa publiko na maging mapagmatyag palagi kapag nasa mga matataong lugar.

Huwag ilagay ang bag sa likod ng upuan kundi ilagay ito sa sabak. Huwag rin hayaan ang cellphone, laptop o camera  sa mesa kung saaan madali itong makuha sa ilang saglit lang.

KAPULISAN SA BORACAY MAY PANAWAGAN SA MGA DRIVER NA HINDI NAGPAPASAKAY NG MGA BATA

Pinasakay ng mga kapulisan ang mga batang ito na nag-aaral sa Yapak Elementary School sa kanilang patrol car ng libre dahil walang mga tricycle, e-trikes, o multicab na nagpapasakay sa kanila.

Nanawagan ang mga kapulisan ng Boracay Police Community Precinct (dating Boracay Tourist Assistance Center ) sa management ng transport group sa isla na disiplinahin ang mga driver nila.

Narito ang kanilang panawagan:

"CALLING THE ATTENTION OF BLTMPC TRANSPORTATION MANAGEMENT:
Please do/give corresponding action to some of your drivers. Pupils walked from Yapak Elementary School going to Puka Beach Area where lot of E-Trikes, Tricycles and Multicabs were on standby but drivers choose tourist passengers and ignore local commuters especially pupils. Local commuters look like an OPTION OR CHANCE PASSENGERS."

34 ANYOS NA LALAKI BINARIL SA ISLA NG BORACAY, PATAY

Patay ang isang 34-anyos na lalaki makaraang barilin sa brgy. Balabag sa isla ng Boracay kagabi.

Naganap ang insidente dakong alas-9:30 kagabi habang nanonood umano sa peryahan ang biktima sa so. Bolabog.

Kinilala sa report ng pulisya ang biktima na si Daniel Lagayada, tubong Roxas City, Capiz at kasalukuyang nagtratrabaho bilang ahente ng isang kompanya sa Boracay.

Ayon kay SPO1 Rogelio Tiongson, imbestigador ng Boracay Tourist Assistance Center, malapitan umanong binaril ang biktima ng hindi pa nakikilalang suspek.

Base sa imbestigasyon ng SOCO-Boracay, nagtamo ng siyam na butas sa kanang bahagi ng katawan ang biktima.

Paniwala ng imbestigador, posibleng dedose na uri ng baril ang ginamit sa krimen.

Sinabi pa ng imbestigador na dinala pa ito sa district hospital sa isla kung saan siya dineklarang dead on arrival ng doktor.

Hirap naman ang pulisya na matukoy ang suspek dahil sa kawalan ng testigo.

Nagpapatuloy pa ang imbestigasyon ng pulisya sa motibo ng insidente at sa pagkakakilalan ng suspek.

KOREANA NASALISIHAN SA LOOB NG ISANG FAST FOOD CHAIN SA BORACAY

ulat ni Darwin Tapayan, Energy FM 107.7 Kalibo

Nagreklamo sa kapulisan ang isang 50-anyos na Koreana matapos umanong masalisihan sa loob ng isang kilalang fast food chain sa brgy. Balabag sa isla ng Boracay.

Sa report ng Boracay Tourist Assistance Center, naganap ang insidente kahapon mag-aalas-6:00 ng gabi habang naghihintay ng kanyang tourguide ang nasabing biktima.

Ayon kay PO1 Santi Jarloc, kinilala ang nasabing turista na si Lee Nam Young. Nalingap lamang umano ang turista nang kunin sa kanya ang bag na nakalagay sa mesa.

Sinabi ng turista, laman ng kanyang bag ang nasa 316 US dollar, Php50,000 at 60,000 Korean money, at mga mahahalagang gamit at dokumento.

Nakunan umano ng CCTV footage ang insidente ayon kay PO1 Jarloc at sa ngayon ay nagpapatuloy umano ang imbestigasyon para sa ikadarakip ng suspek.

DALAWA SUGATAN MATAPOS PAGBABARILIN NG DI PA NAKIKILANG SUSPEK SA BORACAY

ulat ni Archie Hilario, Energy FM 107.7 Kalibo

Sugatan ang dalawang biktima matapos pagbabarilin ng di pa nakikilalang suspek sa So. Bolabog, brgy. Boracay kaninang umaga. 

Kinilala ang mga  biktima sa pangalang  Edlyn Catilla Padilla ,19-anyos na taga  Bacolod City, Roquito Pagayon Tumbagahan39, na taga-Ibajay, Aklan. 

Isinugod naman agad sa hospital ang mga biktima at stable na ang kalagayan ng mga ito. 

Lumalabas sa inisyal na imbestigasyon na agawan sa lupa ang motibo ng insidente.

Samantala nagpapatuloy naman ang imbestigayon ng pulisya sa insidenteng ito.

SECURITY GUARD ARESTADO SA BUY BUST OPERATION SA BORACAY; 14 SACHETS NANG SHABU NAREKOBER

Nasabat ng mga kapulisan ang 14 sachet ng pinaghihinalaang shabu sa buy bust operation kagabi sa isla ng Boracay.

Ang operasyon ay ikinasa ng mga awtoridad laban sa suspek na kinilalang si Alex Garcera, 33 anyos, may-asawa, tubong Tapaz, Capiz at kasalukuyang nakatira sq brgy. Yapak sa nasabing isla.

Nabilhan ng poseour buyer ang isang sachet ng pinaghihinalaang shabu kapalit ng Php1000.

Ayon pa kay PCInsp. Frenzy Andrade, hepe ng Provincial Drug Enforcement Unit, nasabat rin sa kanyang posisyon at kontrol ang 13 sachet ng parehong sangkap at isang 9mm calibre ng baril.

Ang suspek ay isang newly identified drug personality ng mga kapulisan.

Todo tanggi naman sa panayam ng Energy FM Kalibo ang suspek at pinalalabas na "planted" lamang ang nangyari.

Nakakulong na ngayon sa Kalibo PNP station ang suspek habang inihahanda ang kasong isasampa laban sa kanya.

Posibleng maharap ang suspek sa mga kasong paglabag sa Comprehensive Dangerous Drugs Act at illegal possession of firearm.

Ang operasyon ay ikinasa sa brgy. Yapak sa isang hotel kung saan nagtratrabaho ang suspek.

Ikinasa ito ng pinagsamang pwersa ng mga tauhan ng PDEU, PDEA, Provinciall Intelligence Branch at Boracay at Malay PNP.

SA ISLA NG BORACAY, 19 ANYOS NA LALAKI NAGBIGTI, PATAY

Patay ang isang 19 anyos na lalaki sa brgy. Balabag sa isla ng Boracay matapos itong magbigti sa loob ng sariling kuwarto kagabi.

Kinilala ng Boracay Tourist Assistance Center ang biktima na si Norman Broncano alyas “Boboy”, residente ng nasabing barangay.

photo (c) Manilyn Broncano f

Una rito, nagtaka umano ang ina matapos ilang beses siyang nagtatawag at kumakatok sa kuwarto ng anak para anyayahang kumain pero hindi ito sumasagot.

Dito pwersahan niyang sinira ang pinto ng kuwarto at tumamabad sa kanya ang malamig nang bangkay ng anak na nakabigi gamit ang electrical cord. 

Dinala pa nila ito sa isang klinika pero deneklara ring dead on arrival.

Ayon kay PO2 Marvin Garino, dakong alas-3:00 ng madaling araw kahapon nang umuwi ang biktima na nakainom at nakasagutan ang ama sa kanilang bahay.

Bago pumasok sa kuwarto ay nagsabi pa umano ito sa nakababatang kapatid na babae na “manami magpakamatay” at hindi na muling narinig at lumabas pa ng kuwarto.

Sinabi pa ni Garino na ganito rin ang binitiwang salita ng biktima sa kanyang mga barkada sa kanilang inuman bago umuwi ng madaling araw na iyon.

Wala namang nakikitang iba pang motibo ang imbestigador sa nasabing insidente. Wala rin umanong foul play sa insidente.

BAKLA ARESTADO SA PANG-AABUSO SA MENOR DE EDAD NA KOREANO SA ISLA NG BORACAY

Arestado ang isang 23-anyos na bakla makaraang halayin ang isang menor de edad na Koreano sa isla ng Boracay.

Kinilala ang bading na si Joel Dela Cruz, tubong Agusa del Sur at kasalukuyang nakatira sa station 3, brgy. Manocmanoc sa nasabing isla.

Ayon kay PO2 Emely Roldan, imbestigador ng Women and Children Protection Desk ng Boracay PNP, naganap ang insidente sa tinutuluyang boarding house ng suspek dakong alas-10:00 ng gabi.

Pahayag ng imbestigador inimbitithan umano ng suspek ang biktima na nakasalubong niya sa beach na pumunta sa isang hotel kung saan umano siya nagtratrabaho bilang therapist.

Sumama naman ang bata sa bading na hindi inaasahang dadalhin siya sa boarding house sa kanyang kuwarto at doon ay sekswal na hinalay. 

Inihatid aman umano ng bading ang Koreano sa kanyang mga magulang at humingi ng 100 dollar. Ayon kay Roldan, nakumbense ng suspek ang ama ng biktima na magbigay ng pera pero bigla umanong tumakbo ang suspek nang makita ang isang gwardiya na papalapit.

Naaresto ng pulisya ang suspek sa kanyang boardinghouse at pansamantalang ikinulong sa Boracay Tourist Assistance Center (Btac).

Ayon kay Roldan, hindi na nagpursigi ang pamilya na sampahan ng kaso ang bading dahil tatlong araw lamang umano ang kanilang bakasyon sa isla.

‘OPLAN HAWAN’ SA FRONT BEACH SA ISLA NG BORACAY MULING UMARANGKADA

ulat ni Darwin Tapayan, Energy FM 107.7 Kalibo

photo (c) LGU Malay

Umaarangkada ngayon sa isla ng Boracay ang “Oplan Hawan” clearing operation laban sa mga illegal vendors, commissioners, at mga illegal structures sa front beach.

Ayon kay PSInsp. Mark Anthony Gesulga, hepe ng Boracay Tourist Assistance Center, ang tuluy-tuloy na operasyon ay para mapanatili ang magandang imahe ng world-known tourist destination sa mga turista.

Paliwanag niya, ang aksyon ay kasunod ng ilang reklamo ng ilang mga turista laban sa mga commissioner na hindi sumisipot sa mga itinakdang oras sa mga binayarang aktibidad.

Sinisira rin umano nila ang mga iligal na istraktura na humaharang sa mga daanan at kinukumpiska ang mga paninda ng mga ambulant vendor para walang maging sagabal sa mga turista.

Pinasiguro naman niya na tuluy-tuloy ang gagawin nilang random operation at profiling sa mga mahuhuling lumalabag para sa mas mabigat na multa kapag muling nahuli.

Ang task force ay binubuo ng pulisya, lokal na pamahalaan ng Malay, army, coastguard, auxialiary police at iba pa.

Nanawagan naman siya sa mga apektado ng koordinasyon at pag-intindi para sa ikabubuti at ikakaganda ng Boracay.

APAT ARESTADO SA ILIGAL NA PAGPAPAPUTOK NG BARIL AT KAGULUHAN SA ISLA NG BORACAY

Inaresto ng mga kapulisan sa isla ng Boracay ang tatlong lalaki at isang babae matapos masangkot ang mga ito sa iligal na pagpapaputok ng baril at kaguluhan.

Kinilala ang mga suspek na sina Rodly Gabinete, 38 anyos; Natanie

l Gareza, 34; Kim Nikki Maming, 24; at Faith Maming, 22, lahat nagtratrabaho sa Milky’s Dive Center at nakatira sa brgy. Balabag sa nasabing isla.

Ayon sa report ng Boracay Tourist Assistance Center (Btac), nangyari ang nasabing insidente dakong alas-11:00 ng gabi sa so. Ibabaw Pinaungon, brgy Balabag.

Nakatanggap umano ng report ang mga kapulisan na may nagpaputok ng baril sa naturang lugar at may nanggugulo roon.

Sa pagresponde ng mga kapulisan nakita nila ang suspek na si Gabinete na nagpaputok ng baril at nang mapansin ang mga kapulisan ay agad itong tumakbo at itinapon ang hawak na baril.

Nasabat ng mga kapulisan ang baril na may lamang magazine na may dalawang live ammunition ng caliber .45.

Nakita rin ng mga kapulisan ang sukbit na baril sa kasama niyang si Gareza bagay na pinusasan rin ito ng mga kapulisan. 

Nang maaresto ang unang dalawang suspek, nagalit ang isa pa nilang kasama na si Kim Nikki at dinuru-duro ang hepe ng Btac na si PSInp. Mark Anthony Gesulga, at nagpakawala ng suntok pero maswerteng nakailag ang pulis.

Nang arestuhin na ng pulis si Kim Nikki ay nagpagitna naman ang babaeng suspek kaya pati siya ay inaresto rin ng mga kapulisan.

Ang apat ay pansamantalang ikinulong sa Btac police station at nakatakdang sampahan ng kaukulang kaso.

MGA BABAE NAGRAMBOL SA ISANG CLUB SA BORACAY DAHIL SA ISANG ARABO

Nagrambol ang dalawang grupo ng mga babae sa isang club sa brgy. Manocmanoc, isla ng Boracay  dahil sa isang Arabo.

Ayon sa report ng Boracay Tourist Assistance Center (Btac), nagreklamo sa kanilang tanggapan ang isang 24 anyos na babae hinggil sa nasabing insidente.

Kuwento ng babae, pumasok umano siya at ang grupo sa nasabing bar kung saan naka-table nila ang isang Arabo.

Posible umanong nagselos ang isa pang grupo ng kababaehan sa kanilang grupo dahil sa guest nilang dayuhan.

Napag-alaman na ang Arabo ay nakatable ng kabilang grupo sa nakalipas na gabi.

Inabangan umano ng grupo ng mga suspek ang grupong ito ng biktima sa labas kung saan naganap ang rambol.

Lubhang napuruhan ang 24 anyos na babae dahil siya umano ang nakaharutan ng Arabo.

Minabuti naman ng kapulisan na i-refer ang kaso sa barangay justice system para sa kaukulang disposisyon.

TATOO ARTIST SA ISLA NG BORACAY ARESTADO SA PAGTUTULAK NG DROGA

ulat ni Darwin Tapayan, Energy FM 107.7 Kalibo

Arestado ang isang tattoo artist sa isla ng Boracay makaraang maaktuhang nagtutulak ng iligal na droga.

Ikinasa ang buybust operation tanghali kahapon sa brgy. Yapak kung saan naaresto ang suspek na kinilalang si Rafael Badilla, residente ng brgy. Balabag.

Narekober sa poseur buyer ang isang sachet ng pinaghihinalaang shabu.

Sa ginawang body-search sa suspek, nakuha rin ng mga awtoridad ang dalawa pang sachet ng parehong sangkap at ang Php1,100 buy bust money.

Ang operasyon ay ikinasa ng pinagsamang pwersa ng Malay PNP, Boracay PNP, Maritime, at Philippine Army.

Ang naturang lalaki ay pansamantalang nakakulong ngayon sa Boracay Tourist Assistance Center at nakatakdang sampahan ng kasong paglabag sa Republic Act 9165.

KITE BOARDING INSTRUCTOR ARESTADO SA ISLA NG BORACAY SA PAGTUTULAK NG ILIGAL NA DROGA

ulat ni Darwin Tapayan, Energy FM 107.7 Kalibo

Arestado sa buy bust operation ang isang kite boarding instructor sa isla ng Boracay kagabi.

Kinilala sa report ng pulisya ang suspek na si Rodulfo Magar Jr., 28 anyos, tubong Sta. Fe, Romblon pero pansamantalang nakatira sa sitio Bolabog, brgy. Balabag sa nasabing isla.

Naaresto ang lalaki sa sitio proper, brgy. Yapak, Boracay matapos mabilhan ito ng poseur buyer ng isang sachet ng pinaghihinalaang shabu.

Sa body search, narekober ng mga awtoridad ang Php1,100 buy bust money at tatlo pang sachet ng pinaghihinalaang shabu.

Ang operasyon ay ikinasa ng pinagsamang pwersa ng Malay municipal police station, Boracay PNP, 12 Infantry Battalion, TIU, MIG6 at Philippine Drug Enforcement Agency (PDEA) 6.

Pansamantalang ikinulong ang naturang suspek sa Boracay Tourist Assistance Center.

Samantala, inihahanda na ang kasong paglabag sa Batas Pambansa blg. 9165 o “Comprehensive Dangerous Drugs Act of 2002” laban sa suspek.

BINATILYO ARESTADO SA PAGBIBIRO NA MAY BOMBA SA ISANG RESORT SA BORACAY

ulat ni Darwin Tapayan, Energy FM 107.7 Kalibo

Arestado ang isang 19 anyos na lalaki sa isla ng Boracay makaraang magbiro na may bomba sa loob ng isang resort.

Ayon sa report ng Boracay Tourist Assistance Center (Btac), ang suspek ay kinilalang si Suje Negrida, tubo ng brgy Agdugayan, Ibajay.

Pumasok umano nang walang pahintulot  ang suspek sa naturang resort sa brgy. Balabag na napag-alamang nasa ilalim ng kalasingan.

Nang sitahin siya ng guwardiya ay nagbiro umano ito na may itinanim siyang bomba sa loob ng resort bagay na ikinaalarma ng mga nasa loob.

Agad namang humingi ng tulong ang guwardiya ng nasabing resort sa mga kapulisan at pagresponde a y inaresto ang nasabing suspek.

Nakakulong na ngayon ang suspek sa Btac at posibleng sampahan ng kasong paglabag sa Presidential Decree No. 1727 o Anti-Bomb Joke Law.

Ipinagbabawal sa batas na ito ang pagpapakalat ng maling impormasyon tungkol sa presensya ng bomba, pampasabog at mga kahalintulad nito.

BORACAY PNP NANAWAGAN SA TAUMBAYAN KAUGNAY NG PAGPAPAKALAT NG MALING BOMB THREAT

Nagbabala ang mga kapulisan sa taumbayan sa isla ng Boracay na itigil ang pagpapakalat ng maling bomb threat.

Ang panawagang ito ng Boracay Tourists Assistance Center (BTAC) ay kasunod ng maling bomb threat sa Manocmanoc Elementary School.

Sa isang panayam sinabi ni PSInsp. Mark Gesulga, hepe ng Boracay PNP, ang pagpapakalat ng maling bomb threat ay isang criminal offense.

Paliwanag niya, nagdadala ito ng takot sa taumbayan lalu na sa panahon ngayon na laganap ang banta ng terorismo.

Binigyang diin pa ng hepe na ang pagpapakalat ng maling bomb threat, bomb scare o bomb jokes ay posibleng makaapekto sa turismo sa Boracay.

Nanawagan naman siya sa publiko na manatiling mapagmatyag at ireport agad sa mga awtoridad ang anomang kahina-hinalang bagay sa kanilang lugar.

Ipinagbabawal sa Presidential Decree No. 1727 o Anti-Bomb Joke Law, ang pagpapakalat ng maling impormasyon tungkol sa presensya ng bomba, pampasabog at mga kahalintulad nito.

Samantala, patuloy pang iniimbestigahan ng mga kapulisan ang pinagmulan ng kumulat na maling bomb threat sa Boracay kamakailan. (PNA)

MGA ESTUDYANTE AT MAGULANG SA BORACAY NAGPANIC DAHIL SA UMANO’Y BOMB THREAT

ulat ni Darwin Tapayan, Energy FM 107.7 Kalibo

Nagpanic ang mga estudyante at magulang sa Manocmanoc Elementary School sa brgy. Manocmanoc sa Isla ng Boracay kahapon ng umaga dahil sa umano’y bomb threat sa lugar.

Dakong alas-9:00 ng umaga nang makatanggap ng report ang Boracay Tourist Assistance Center (BTAC) na nagkaroon ng panic sa nasabing lugar.

Agad namang nagresponde ang mga kapulisan at nagsagawa ng imbestigasyon kasama ang bomb squad pero napag-alaman na hindi totoo ang nasabing impormasyon.

Isang misis ang inimbitahan sa tanggapan ng pulisya matapos iturong siya ang pinagmulan ng sabi-sabing bomb threat.

Mariin naman itong pinabulaanan ng misis. Nagtanong lamang umano siya sa kanyang mister kung mayroon bang bomb threat sa lugar hanggang sa maipasa ito sa iba pa.

Hindi pa ngayon malaman kung sino talaga ang pinagmulan ng nasabing maling impormasyon.

Nanawagan naman ang mga kapulisan sa taumbayan na iwasan ang pagpapasa ng mga maling impormasyon at makipagtulungan sa kanila kapag may mga kahinahinalang bagay ang mamataan sa kanilang lugar.

MGA EVACUEES SA ISLA NG BORACAY MULA SA MINDANAO, UMABOT NA SA MAHIGIT 50 KATAO AYON SA PNP

Boracay PNP file photo

Umabot na sa mahigit 50 evacuees mula sa Mindanao ang pansamantalang naninirahan ngayon sa isla ng Boracay.

Sa panayam kay PSInsp. Mark Gesulga, hepe ng Boracay Tourist Assistance Center (Btac), nagsimula umano silang magbilang ng mga lumikas nitong Hunyo 4.

Ayon kay Gesulga, karamihan sa mga lumikas ay mula sa Lanao at Marawi na naapektuhan ng kaguluhan o bakbakan doon.Pahayag pa ng hepe, may mga kamag-anak umano ang mga ito sa isla. 

Halos lahat din umano sa mga ito ay mga muslim.

Pinasiguro naman ng hepe na patuloy ang kanilang monitoring sa mga lumikas, katunayan ay sumailalim na sa bio-profiling ang mga ito para birepikahin kung may kaugnayan ito sa mga terorista.

Samantala, nilinaw naman niya na walang kaugnayan ang pamilya Maute na nakatira ngayon sa isla ng Boracay nasa walong taon na sa teroristang Maute sa Marawi.

Nakikipagtulungan rin umano sa kanila ang pamunuan ng Muslim Community sa isla ng Boracay upang siguraduhin na walang makapasok na masasamang tao sa kanilang lugar.

KARAGDAGANG PULIS IDI-DEPLOY SA BORACAY PARA SA DRUG INTEL OPERATION

Kukuha ng 32 karagdagang police officers ang Boracay Tourist Assistance Center (Btac) para tutukan ang mga kaso ng druga sa isla.

Ayon kay PSInsp. Jose Gesulga, tumatayong hepe ng Btac, nakatakdang ideploy ang mga pulis na ito ngayong linggo.

Sinabi pa ni Gesulga itatalaga ang mga ito sa intelligence network para i-track down ang mga drug personalities sa Boracay.

Ito ay kasunod ng pinaigting na kampanya ng kapulisan kontra iligal na droga sa buong rehiyon.

Patuloy rin umano ang ginagawa nilang edukasyon sa taumbayan at sa mga turista kung paano mapigil at masugpo ang pagkalat ng iligal na droga.

Sa kabilang banda, nananatili anyang nakaalerto ang mga kapulisan para masiguro na walang makapasok na terorista sa isla.

Pinaalalahanan rin nila ang mga establisyemento na maging mapagmatyag kasunod ng nangyaring insidente sa Resorts World Manila sa Pasay sa nakalipas na linggo.

Pinasiguro ni Gesulga na lahat ng mga pamantayan ay nakalatag na para mapigilan ang kaparehong scenario sa isla. (PNA)

AKLAN PNP NABABAHALA SA TUMATAAS NA KASO NG NAKAWAN SA BORACAY

Nababahala ngayon ang Aklan Police Provinciall Office (APPO) sa tumataas na bilang ng nakawan sa isla ng Boracay.

Ayon kay SPO1 Nida Gregas, APPO spokeperson, base sa kanilang data, ang Boracay ay nakapagtala na ng 311 kaso ng nakawan sa unang tatlong buwan nitong taon.

Pinasiguro naman niya na ang APPO ay magpapatuloy sa pagmonitor sa mga kaso ng nakawan sa quarter na ito.

Base sa rekord ng kapulisan, ang isla ay nakapagtala ng 251 kaso ng nakawan sa unang quarter ng taong 206; 188 sa ikalawang quarter; at 201 sa pangatlo at 247 sa huling quarter.

Paliwanag ni Gregas, nananatili ang nakawan sa Boracay dahil narin ang mga turistang biktima ay hindi na nagpupursiging magsampa ng kaso.

Nanawagan naman siya sa mga turista na maging mapagmatyag sa kanilang mga kagamitan lalu na kapag naliligo sa baybayin. (PNA)

NOTORIOUS NA GRUPO NG MGA MAGNANAKAW SA BORACAY, ARESTADO NG MGA KAPULISAN

ulat ni Darwin Tapayan, Energy FM 107.7 Kalibo

Kalaboso ang tatlong myembro ng isang notorious gang na ‘Boracay Demons’ sa Isla ng Boracay.

Kinilala ang mga naaresto na sina Janel Tayco Villanueva, 19, tubong Kalibo, Aklan; Reymond Alan Molina, 19, ng so. Ambulong,  brgy. Manocmanoc; at isang menor de edad na si alias Christian, 15, ng so. Tulubhan, brgy. Manoc-Manoc.

Una rito, nagreklamo sa Boracay Tourist Assistance Center (BTAC) ang dalawang boarders matapos silang nakawan ng madaling araw sa tinutuluyan nilang boarding house sa Talipapa Bukid sa nasabing Isla.

Nakuha ng mga suspek na ito ang Flaire F3 mobile phone, Lenovo Tablet, Samsung J2 at GoPro cam.

Nahuli ng kaibigan ng isa sa mga biktima ang menor de edad at itinurn-over sa mga otoridad samantalang ang dalawa pa ay naaresto sa sinagawang follow-up operation ng mga kapulisan.

Narekober naman ng mga kapulisan mula sa mga suspek ang mga ninakaw sa naturang boarding house.

Nakapiit na ngayon sa Aklan Rehabilitation Center sina Molina at Villanueva matapos maharap sa mga kasong theft at robbery samantalang ang menor de edad ay itinur-over sa kustodiya ng municipal social welfare office. 

Napag-alaman na ang ‘Boracay Demons’ ay madalas na naiuugnay sa mga kaso ng pagnanakaw at akyat bahay sa isla.