Lalaki pinatay ng sariling anak sa bayan ng New Washington; suspek arestado

PATAY ANG isang lalaki makaraang makaraang pasakan ng damit ng sariling anak ang kanyang bunganga sa Brgy. Candelaria, New Washington Huwebes ng gabi.

Kinilala ang biktima na si Haidee Prado, 59-anyos, habang ang suspek ay nakilala namang si Ger Prado, 31, pawang mga residente ng nabanggit na lugar.

Batay  sa ulat ng New Washington PNP, nagkaroon umano ng mainit a pagtatalo ang mag-ama na parehong nakaiom. Nabatid na palagi nang nagtatalo ang dalawa.

Itinali umano ng suspek ang paa at kamay ng ama gamit ang rattan at pinasakan ng damit ang bunganga.

Matapos ang insidente, mismong ang suspek ang nagsumbong sa kanyang step sister hinggil sa ginawa niya sa ama. Sumuko naman ang suspek sa mga otoridad.

Isinugod pa sa Dr. Rafael S. Tumbokon Memorial Hospital ang biktima pero dineklara rin itong dead on arrival.

Inaalam pa ng kapulisan ang malalim na motibo sa insidente.

Kulong ang suspek sa New Washington PNP station at nakatakdang sampaha ng kasong parricide.##

FOREIGNER ARESTADO MATAPOS MABARIL ANG ISANG MENOR DE EDAD SA NEW WASHINGTON, AKLAN

Arestado ang isang 61-anyos na foreigner sa bayan ng New Washington makaraang mabaril ang isang 11-anyos na batang lalaki .

Kinilala ang suspek na si Lewis France Sanderson na isang American national at pansamantalang nakatira sa brgy. Fatima sanabing bayan.

Sa report ng New Washington PNP, nakatanggap sila ng reklamo mula sa isang concerned citizen na may naganap na pamamaril sa nabanggit lugar.

Agad namang rumesponde ang mga kapulisan sa pangunguna ni PO2 Rolan De Mateo at agad na naaresto ang suspek.

Isinugod naman sa provincial hospital ang biktima na kinilalang si J-Mar Naplaza para malapatan ng kaukulang lunas.

Napag-alam na nangunguha lamang ng bunga ng Indian  mango ang bata kasama ang iba pa ng madaplisan siya ng bala ng baril sa kanyang kamay.

Naniniwala naman ang pamilya ng biktima na walang intensiyon na barilin ng foreigner ang bata.

Posible anyang namamaril lang sa fishpond ang foreigner nang aksidenteng madaplisan ng bala ng sinasabing airsoft gun ang menor de edad.

Pansamantalang nakakulong ngayon ang foreigner sa New Washington PNP station habang umuusad pa ang imbestigasyon sa nangyari.  

EMPLEYADO NG LGU NEW WASHINGTON, ARESTADO SA PAGPAPAPUTOK NG BARIL

Arestado ang isang empleyado ng munisipyo ng New Washington matapos itong magpaputok ng baril.

Kinilala ang suspek na si Ladie Magalit, 40 anyos, residente ng brgy. Poblacion sa nasabing bayan.

Ayon sa inisyal na report, hinuli ng mga kapulisan ang suspek matapos na magpaputok ng baril sa kanilang lugar.

Naabutan pa ng mga rumespondeng pulis ang lalaki na itinapon ang kanyang ginamit na baril.

Narekober sa lugar ang isang revolver na walang serial number at limang empty fired catridges.

Nabatid na lasing ang nasabing suspek nang magawa niya ang pagpapaputok ng baril.

Ang suspek ay nasa kostudiya na ng New Washington municipal police station at posibleng maharap sa kasong paglabag sa Republic Act 10591.

DALAWA ARESTADO SA MAGKAHIWALAY NA BUYBUST OPERATION SA PROBINSYA

Arestado ang dalawang lalaki sa magkahiwalay na buybust operation sa probinsiya ng Aklan kagabi. 

Sa bayan ng Nabas naaresto ng mga tauhan ng Nabas municipal police station ang isang tourist guide na nagtutulak ng droga sa brgy. Union, Nabas.

Kinilala ang suspek na si Julio Perucho, 32, residente ng nasabing lugar.

Nabilhan ang lalaki ng isang sachet ng pinaniniwalaang shabu kapalit ng Php500 marked money.

Maliban rito, narekober rin ng mga awtoridad ang tatlong sachet marijuana.

Sa bayan naman ng New Washington, naaresto naman ng mga tauhan ng Provincial Drug Enforcement Unit ang isang 35 anyos na lalaki na tinuturing na High Value Target.

Kinilala ang suspek na si Jerson Menoto Jr., alyas Jaya, residente ng Poblacion, New Washington.

Sa operasyon na ginawa sa nabanggit na lugar, nabilhan ng 1 sachet ng pinaghihinalaang shabu ang suspek kapalit ng Php1,000 buybust money.

Narekober din sa kanya ang dalawa pang sachet na naglalaman ng sinasabing droga.

Kapwa itinanggi ng dalawa ang akusasyong nagtutulak sila ng iligal na droga.

Parehong nakakulong na ngayon ang mga suspek at inihahanda na ang kasong isasampa sa kanila sa paglabag sa Republic Act 9165.

ENERGY SPECIAL REPORT: Talabahan sa New Washington, isang “booming economy” sa Aklan

NI DARWIN TAPAYAN AT JODEL RENTILLO, ENERGY FM 107.7 KALIBO
Photo: (c) opensnap.com

Hanap niyo ba ay "one to sawang" masasarap na talaba?

Kilala ngayon ang bayan ng New Washington, Aklan diyan. Matatagpuan ang dalawang kilometrong talabahan, o hilera ng mga nagtitinda ng mga talaba, at iba pang mga seafoods.

Sa panayam ng Energy FM Kalibo kay
New Washington Mayor Shimonette Francisco, sinabi niyang tila mga kabuteng nagsi-sulputan ang mga ito sa tabing-dagat at provincial road.

Anya, maituturing ito na booming economy sa munisipalidad. Nagbibigay umano ito ng kabuhayan sa mga tagaroon. Nagsimula lamang anya ang mga ito sa simpleng barbeque-han, ihawan at maliliit na tindahan ng mga seafoods pero ngayon ay kapansin-pansin anya na nakaka-enggayo ang ginagawa nilang pagpapaganda ng kanilang pwesto.

Dagdag pa ng mayora, tinutulungan nilang umangat ang industriya ng talaba sa kanilang lugar. Napag-alaman na kamakailan lamang ay nagsagawa ang lokal na pamahalaan ng isang consultative meeting para doon sa mga stall owners at oyster growers kung paano mai-angat ang kanilang mga negosyo.

Sa ngayon, hindi pa sila required na kumuha ng mayor’s permit. Gayunman, mahigpit naman anya ang lokal na pamahalaan sa sanitation permit, safety and security.

Dahil sa paglago ng talabahan sa lugar ay nae-engganyo na ang ilang mga negosyante sa Kalibo na magtayo ng mga restaurant sa naturang lugar.

Marami na umano ang dumarayo sa lugar at nakaplano na ang paglalagay ng street light sa lugar at ang pagkakaroon ng parking area para sa mga bisita.

Dalawa arestado sa magkahiwalay na drug buy bust operation sa Aklan

NINA ARCHIE HILARIO AT DARWIN TAPAYAN, ENERGY FM 107.7 KALIBO

Dalawang lalake ang naaresto ng mga awtoridad sa magkahiwalay na drug buy bust operation na isinagawa ngayon araw sa Aklan.

Kaninang umaga naaresto ng operatiba sa Poblacion, Kalibo si Roderick Pelayo, 33-anyos, residente ng Brgy. Poblacion, Buruanga. Nakuha sa suspek ang isang sachet na naglalaman ng pinaghihinalaang shabu kapalit ng buy bust money na P1,000.00.

Nabatid na isang high-value target ang nasabing lalake at una ng nagsurender sa mga kapulisan sa kasagsagan ng Oplan Tokhang.

Samantala, arestado rin kaninang hapon sa Poblacion, Banga ang isang lalake na kinilalang si Reynante Yu, 27-anyos, residente ng Mabilo, New Washington.

Nasawata sa operasyon ang isang sachet na naglalaman ng pinaghihinalaang shabu at P2,000.00 na buy bust money.

Parehong nakakulong ngayon ang mga suspek at nahaharap sa kasong paglabag sa RA 9165 o Comprehensive Dangerous Drugs Act of 2002.

Mariin namang itinatanggi ng dalawa na tulak sila ng droga.