Lalaki arestado matapos magdala ng baril sa Christmas party ng barangay sa Kalibo

INARESTO NG mga kapulisan ang lalaking ito dahil sa pagdadala ng baril sa Christmas party sa barangay hall ng Andagao, Kalibo.

Kinilala ang suspek na si Randy Reyes, 46-anyos ng nasabing barangay. Nasabat sa kanya ang isang homemade caliber 38 at tatlong live ammunition ng 9mm.

Ayon sa imbestigasyon ng kapulisan bigla umanong pumasok sa barangay hall ang nasabing lalaki at nakipagtalo sa isang tanod.

Pinauuwi umano ng tanod na si Rodencio Mabini nang bantaan niya ito at sinabing "Hueata ninyo ako ay balikan ko kamo."

Umalis umano ang lalaki sakay ng kanyang motorsiklo at bumalik rin matapos ang ilang sandali.

Pagdating umano niya sa barangay hall ay hawak hawak na niya ang baril na nakasukbit sa kanyang baywang.

Dito inaresto ng mga tanod ang nasabing lalaki at tinawagan ng pulis. Inaresto at ikinulong sa Kalibo Police Station ang lalaki.

Posible itong maharap sa kasong paglabag sa Republic Act 10591.##

- ulat ni Kasimanwang Darwin Tapayan, Energy FM Kalibo

SORBETERO NAHULIHAN NG BARIL SA BULWANG, NUMANCIA

ARESTADO ANG lalaking ito sa Brgy. Bulwang, Numancia umaga ng Huwebes makaraang mahulihan ng baril sa kanilang bahay.

Kinilala ang suspek na si Invenzor Nervar y Rampola, 40-anyos, residente ng nabanggit na lugar.

Ikinasa ng Numancia PNP ang operasyon laban sa suspek sa bisa ng search warrant.

Nasabat sa kanilang bahay ang isang 38 revolver at 11 live ammunition.

Inako naman ng suspek na kanya ang baril at wala itong mga kaukulang dokumento. Aniya, minana pa niya ito sa kanyang lolo na yumao na.

Ayon kay Punong Barangay Ferry Templonuevo may mga reklamo umano sa barangay na nagpapaputok ito ng baril.

Inireklamo rin siya sa kapulisan na may tinutukan siya ng baril. Mga dahilan bakit siya binabaan ng search warrant.

Nakakulong na ngayon ang suspek sa Numancia Municipal Politice Station at nakatakdang sampahan ng kasong paglabag sa Republic Act 10591.##

- Kasimanwang Darwin Tapayan, Energy FM 107.7 Kalibo

NEGOSYANTE ARESTADO SA PANGANGALAGA NG BARIL NA WALANG KAUKULANG LESENSIYA

ARESTADO ANG isang negosyante sa kanyang residensiya sa Brgy. Caano, Kalibo dahil sa pangangalaga ng baril nang walang kaukulang permit.

Nasabat ng mga kapulisan sa bahay ng suspek na si Engr. Juan Adante Jr., 56-anyos, ang 22 calibre ng baril at 50 mga bala nito. Aminado si Adante na 2015 pa expires ang kanyang lisensiya.

Depensa niya agad umano siyang nagsumite ng mga kaukulang dokumento sa firearms division ng kapulisan pero hindi umano naibigay sa kanya ang lesinsiya.

Sa kabilang banda, sinabi ni PCInsp. Kenneth Cañete, deputy chief ng Kalibo PNP, ang pag-apply ng search warrant laban sa suspek ay dahil sa mga reklamo na nagpapaputok siya ng baril kapag nakainom.

Ang operasyon ay pinangunahan ng Kalibo PNP sa pamamagitang ng search warrant sa paglabag sa Republic Act 10591 o Firearm Law.

Si Adante ay nakakulong na sa Kalibo Police Station at nakatakdang sampahan ng kaukulang kaso.##

- Darwin Tapayan, Energy FM Kalibo

LALAKI NA BUMUNOT NG BARIL SA ISANG SAYAWAN SA TANGALAN, ARESTADO

Inaresto ng kapulisan ang isang lalaki sa bayan ng Tangalan madaling araw ng Lunes matapos bumunot ng baril sa sayawan sa Brgy. Jawili.

Kinilala ang suspek na si Victoriano Trance y Villanueva, 61-anyos, residente ng Brgy. Panayakan sa parehong bayan.

Nasabat naman ng otoridad mula sa kanyang pangangalaga ang isang 38 revolver na may lamang limang bala at 11 iba pa na nakalagay sa catridge holder.

Ayon sa report ng Tangalan PNP, may naganap umano na komosyon sa labas ng sayawan sa Brgy. Jawili covered court nang bumunot ito ng baril.

Ang suspek ay agad hinuli ng kapulisan na nakabantay sa lugar at pansamantalang ikinulong sa Tangalan PNP Station.

Posibleng maharap sa kasong paglabag sa Republic Act 10591 o "Comprehensive Firearms and Ammunition Regulation Act." | Darwin Tapayan, EFM Kalibo

LALAKI ARESTADO SA ISLA NG BORACAY MATAPOS MAHULIHAN NG BARIL AT KUTSILYO

Isang lalaki ang inaresto ng kapulisan sa Isla ng Boracay matapos mahulihan ng baril at kutsilyo.

Kinilala sa report ng Boracay PNP ang suspek na si Don Visca Salvador, 35-anyos, tubong Sta. Fe, Romblon at residente ng So. Malabunot, Brgy. Manoc-manoc, Malay.

Ayon sa kapulisan, inireklamo umano ang suspek matapos magpakita ng baril sa kanyang mga kapitbahay habang umiinom.

Agad rumesponde ang mga tauhan ng Boracay PNP at naabutan nila ang suspek sa labas ng bahay na umiinom at nakitaan ng baril na nakasukbit sa kanyang baywang.

Nang usisain na umano ng PNP ay itinapon niya sa lupa ang baril na isang Smith and Wesson 357 Magnum revolver laman ang anim na live ammunition.

Nasabat ng kapulisan ang baril at mga ammunition. Walang maipakitang mga kaukulang dokumento ang suspek sa kapulisan. Nasabat rin mula sa kanya ang isang kutsilyo.

Inaresto siya at pansamatalang ikinulong sa Boracay PNP Substation at posibleng sampahan ng kasong paglabag sa RA 10591 at BP 6. | Darwin Tapayan, EFM Kalibo

TATLO ARESTADO SA BAYAN NG BANGA SA ILIGAL NA PAGBEBENTA NG BARIL

Ulat ni Darwin Tapayan / Archie Hilario, Energy FM 107.7 Kalibo

Timbog sa operasyon ng mga kapulisan ang tatlong ito sa bayan ng Banga ngayong hapon dahil sa iligal na pagbebenta ng baril.

Unang naaresto sa entrapment operation ang magkakapatid na sina Ruel Teodosio, 40-anyos, cook sa Aklan State University Banga campus, at Russelle Teodosio, 38, casual employee sa LGU Banga, pawang mga residente ng brgy. Bacan sa nasabing bayan.

Nakuha sa posisyon ni Russel ang isang unit ng carbin rifle, isang long magazine na may lamang 30 live ammunition at isang short magazine na may lamang 11 live ammunition kapalit ng Php45,000. Nasabat naman ng operatiba ang Php500 marked o boodle money.

Sa follow-up operation ng mga kapulisan, naaresto rin ang kanilang tiyo na si Nobel Irader, 62, na siya umanong nag-utos sa kanilang magbenta ng baril.

Isinuko rin ni Irader ang isang homemade magazine type shot gun kasama ang tatlong live ammunition.

Parehong ikinulong ang tatlo sa lock-up cell ng Banga PNP at nakatakdang sampahan ng kasong paglabag sa Republic Act 10591.

2 LASING NA LALAKI NA MAY BITBIT PANG BARIL AT BALA ARESTADO

ulat ni Archie Hilario, Energy FM 107.7 Kalibo

Inaresto ng Kalibo PNP ang isang menor de edad at isang lalaki makaraang sa akto na may bitbit na baril. habang paikot-ikot sa Mabini St. Kalibo banda ala-una ng madaling araw.

Kinilala ang mga ito na sina Jesson,16 anyos at James Gascon, 29 anyos.

Narecover kay Jesson ang isang 38 revolver na may tatlong bala. Samantala siyam (9) na bala naman ng 38 caliber ang narecover kay James.

Sa panayam ng news team itinatanggi ng mga ito na may dala silang baril at bala, hindi raw nila alam kung saan nanggaling ang baril na sinasabi ng pulisya.

Alegasyon ni James sinuntok pa raw ito ng pulis na nakasibilyan habang iniimbestigahan.

Nakakulong na ang dalawang lasing na suspek sa kalibo PNP Station.

KAGAWAD AT ISA PA NAARESTO SA CHECKPOINT SA ALTAVAS MATAPOS MAHULIHAN NG BARIL

file photo (c) Altavas PNP

Arestado sa checkpoint sa bayan ng Altavas ang isang barangay kagawad at isa pang lalaki matapos mahulihan ng mga baril.

Kinilala ng pulisya ang mga naaresto na sina barangay kagawad Rolly Asiong ng Rizal Norte, Tapaz, Capiz at Nolito Dimas ng Aglobocan, Tapaz.

Una rito pinarahan ng mga kapulisan ang tatlong motorsiklo para i-verify dahil wala umano itong mga plate number at para kilalani ang mga sakay.

Sa panayam kay PCInsp. Rogelio Tomagtang Jr., hepe ng Altavas PNP, nang parahan ang nasabing mga motorsiklo, kapansin-pansin umano na hindi mapakali at naging kahina-hinala ang kilos ng iba.

Nakatakbo pa papalayo ang isang suspek pero nahuli rin ng mga kapulisan.

Nang usisain ng mga awtoridad, nahulihan ng caliber 45 na baril si Asiong samantalang si Dimas ay nakunan naman ng improvised shot gun.

Inaresto rin ng mga kapulisan ang pito pa nilang mga kasama na nabatid galing lahat sa Libacao para umattend ng libing at papauwi na sana ng Tapaz, Capiz.

Ayon kay CInsp. Tumagtang, inaalam pa nila kung ang mga ito ay kaanib ng makakaliwang grupo o NPA matapos makatanggap ng mga ulat na nauugnay ang mga ito.

Nakakulong ang mga suspek sa Altavas PNP at nakatakdang sampahan ng kaukulang kaso.

APAT ARESTADO SA ILIGAL NA PAGPAPAPUTOK NG BARIL AT KAGULUHAN SA ISLA NG BORACAY

Inaresto ng mga kapulisan sa isla ng Boracay ang tatlong lalaki at isang babae matapos masangkot ang mga ito sa iligal na pagpapaputok ng baril at kaguluhan.

Kinilala ang mga suspek na sina Rodly Gabinete, 38 anyos; Natanie

l Gareza, 34; Kim Nikki Maming, 24; at Faith Maming, 22, lahat nagtratrabaho sa Milky’s Dive Center at nakatira sa brgy. Balabag sa nasabing isla.

Ayon sa report ng Boracay Tourist Assistance Center (Btac), nangyari ang nasabing insidente dakong alas-11:00 ng gabi sa so. Ibabaw Pinaungon, brgy Balabag.

Nakatanggap umano ng report ang mga kapulisan na may nagpaputok ng baril sa naturang lugar at may nanggugulo roon.

Sa pagresponde ng mga kapulisan nakita nila ang suspek na si Gabinete na nagpaputok ng baril at nang mapansin ang mga kapulisan ay agad itong tumakbo at itinapon ang hawak na baril.

Nasabat ng mga kapulisan ang baril na may lamang magazine na may dalawang live ammunition ng caliber .45.

Nakita rin ng mga kapulisan ang sukbit na baril sa kasama niyang si Gareza bagay na pinusasan rin ito ng mga kapulisan. 

Nang maaresto ang unang dalawang suspek, nagalit ang isa pa nilang kasama na si Kim Nikki at dinuru-duro ang hepe ng Btac na si PSInp. Mark Anthony Gesulga, at nagpakawala ng suntok pero maswerteng nakailag ang pulis.

Nang arestuhin na ng pulis si Kim Nikki ay nagpagitna naman ang babaeng suspek kaya pati siya ay inaresto rin ng mga kapulisan.

Ang apat ay pansamantalang ikinulong sa Btac police station at nakatakdang sampahan ng kaukulang kaso.

PINAGHIHINALAANG GUN FOR HIRE SA AKLAN, BINARIL SA BUY BUST OPERATION NANG MANLABAN SA OPERATIBA

Sugatan ang isang pinaghihinalaang gun for hire nang barilin ng pulis sa isang buy bust operation sa Kalibo dahil nanlaban umano ito.

Kinilala ang suspek na si Raymund Olino, residente ng brgy. Rizal, Ibajay.

Ginawa ang operasyon dakong alas-9:00 ng umaga sa Park Homes 3 sa brgy. Andagao, Kalibo nang pinagsamang pwersa ng Crime Investigation and Detection Group (CIDG) at Kalibo PNP.

Ayon kay PCInsp. Raul Boledo, hepe ng CIDG-Aklan, nanlaban umano ang suspek matapos mapag-alamang pulis ang kanyang nakatransaksiyon.

Nakapaputok umano ito ng makalawang beses sa operatiba dahilan para manlaban ang mga ito kung saan nagtamo ng dalawang sugat ng pagbaril ang suspek sa kanyang kaliwang paa.

Narekober ng mga awtoridad ang isang caliber 45 sa posesyon ng suspek at isa pang caliber 45 sa nangyaring buybust operation kapalit ng Php20 peso bill kabilang na ang Php1,000 marked money.

Pahayag ni Boledo, pinaghihinalaang gun for hire ang suspek at matagal narin umanong minomonitor ng mga kapulisan.

Naka-hospital arrest ngayon ang suspek sa provincial hospital na posibleng maharap sa mga kaukulang kaso.

LALAKI ARESTADO SA RAID NG MGA KAPULISAN SA BRGY. NAVITAS, NUMANCIA SA PAGTATAGO NG MGA BALA NG BARIL

Arestado ang isang lalaki sa ginawang raid ng mga kapulisan sa bahay nito sa Purok 2, brgy. Navitas, Numancia kahapon ng umaga.

Kinilala ang suspek na si Jay Yacub.

Nakuha sa operasyon ang limang live ammunition ng caliber .45, isang live ammunition ng 12 gauge shotgun at isang holster.

Ikinasa ang operasyon ng mga tauhan ng Public Safety Company, Intelligence Branch, Drug Enforcement Unit at ng Numancia PNP dakong alas-7:00 ng umaga.

Una nang inireklamo si Yacub ng pagpapaputok ng baril sa kanilang barangay kamakailan dahilan para babaan siya ng search warrant.

Posibleng maharap sa kasong paglabag sa Republic Act 10591 ang naturang suspek na nakakulong ngayon sa Kalibo police station para sa kaukulang disposisyon.