Base sa report it Aklan Provincial Epidemiology Surveillance and Response Unit nagsaka sigun it 109 porsyento ro kaso makaron kumpara ku 2018 nga may 84 eang nga ka kaso sa parehas nga peryod.
Ro banwa it Kalibo gihapon ro nagapanguna nga may pinakamaabu nga kaso it dengue nga may 60. Sumunod kara ro Banga nga may 18 ag Malay nga may 14.
Kaabuan sa mga pasyente nga natamaan ku rayang kaso hay nagaedad 1 hasta 10 dag-on. Sangkiri eamang ro deperensiya sa mga numero it pasyente nga eaki kumpara sa baye.
Suno pagid sa datus, sa kada barangay sa Akean may kapin sa tatlo o masobra ka kaso nga nairekord sa nagtaliwan nga apat nga sunod nga dominggo.
Nahisayuran man nga ku nagtaliwan nga dag-on nakarekord Provincial Health Office it 2015 kaso it dengue sa probinsiya mataas it 85 porsyento kumpara ku 2017 nga may 1088 eang.
Pito ro nairekord nga patay umpisa 2017 hasta 2018 bangod sa kaso it dengue iya sa Akean.
Nagapudomdom ro PHO sa tanan nga ipabilin ro kalimpyo it palibot ag panimaeay agud indi pangistaran it namok ag protektahan ro sarili sa namok gamit ro pagsuksok it mahaba ag magbutang it mosquito repellant sa eawas.##
- Kasimanwang Darwin Tapayan, Energy FM Kalibo
No comments:
Post a Comment