Magkakapatid na Aklanon nag-uwi ng gintong medalya sa kanilang mga imbensiyon

Nag-uwi ng gintong medalya ang magkakapatid na mga Aklanon sa katatapos lang na Kaohsiung International Invention and Design Expo 2018 sa International Convention Center Kaohsiung, Taiwan.

Sila ang magkakapatid na sina Marian Regina, 15-anyos at Grade 10, at Macaila Ricci Taran, 14-anyos at Grade 9, na nag-aaral sa Manila Science High School.

Kinatawan nila ang Pilipinas sa international event na ito ng World Invention Intellectual Property Associations (WIIPA) at ng Taiwan Invention Products Promotion Association (TIPPA) mula Disyembre 7 hanggang 9.

Si Marian Regina B. Taran ay may invention/research title Na Betacyanin in Dragonfruit Peels Extract as Tracking Dye for Gel Electrophoresis.

Habang si Macaila Ricci ay may research paper/invention na The Anthocyanin in Butterfly Ternatea Flower Tea as an Indicator in Acid-Base Titration.

Nabatid na ang event na ito ay nilahukan ng 20 mga bansa na may 363 na mga imbensyon sa buong mundo.

Ang magkakapatid ay anak nina Richard Misplacido Taran at Atty. Marites Barrios Taran na mga taga-bayan ng Lezo at Malinao sa Aklan.##

- Kasimanwang Darwin Tapayan, Energy FM Kalibo