Kalibo Ostrich Farm pansamantalang bubuksan sa publiko habang inaayos ang legalidad

PANSAMANTALANG BUBUKSAN sa publiko ang Kalibo Ostrich Farm sa Brgy. New Buswang, Kalibo habang nilalakad ng may-ari ang mga kaukulang dokumento sa operasyon nito.

Sa sulat na inilabas ni Kalibo Mayor Lachica Huwebes ng hapon kay Ramon Dio, may-ari ng farm, pinayagan niyang pansamantalang magbukas sa publiko ang farm batay narin sa kahilingan ng huli.

Sa sulat, binigyan ng alkalde si Dio ng 30 araw na palugit para malakad ang Location Clearance ng farm at iba pang mga kaukulang dokumento bago ito makakuha ng Mayor's Permit.

Mababatid na pansamantalang isinara sa publiko nitong mga nakalipas na araw ang nasabing farm kasunod ng pagkadiskubre na wala itong mga kaukulang dokumento o permit mula sa munisipyo.

Iginiit naman ng alkalde sa kanyang sulat-tugon na wala pang closure order ang naturang animal farm.

Sa kabila nito aminado si Mayor Lachica na isa nang atraksiyon sa mga turista sa kabisera ng probinsiya ang nasabing farm.

Matatandaan na una nang itinampok ng himpilang ito ang nasabing farm na may nasa 40 ostrich, at iba pang mga wild animals.##

- Kasimanwang Darwin Tapayan, Energy Fm 107.7 Kalibo

Bagong health center, common terminal sa Kalibo bubuksan na ngayong Ati-Atihan Festival

BINALITA NI Kalibo Mayor William Lachica na bubuksan na ng pamahalaang lokal ng munisipyo ang bagong tayong health center at common terminal building.


Bago ito sinabi niya sa panayam ng Energy FM Kalibo na isang blessing ceremony ang isasagawa sa Enero 18 sa kasagsagan ng Ati-Atihan Festival.

Eastern Terminal / Energy FM Kalibo photo

Ang health center na bubuksan ay makikita sa kahabaan ng N. Roldan St. kung saan magsisilbi rin umano itong birthing facility.

Ang common terminal naman ay sa kahabaan ng San Lorenzo Drive kung saan magsisilbi ito sa mga jeep na bumibiyahe sa eastern side ng probinsiya.

May cutting ribbon rin umano para sa bagong gawa na Bakhaw Norte bridge sa Enero 17 na una nang binasbasan kamakailan.

Habang pinag-aaralan pa aniya ang petsa ng blessing at inagurasyon ng bagong Evacuation Center sa Brgy. Tigayon.

Health and Birthing Center
Energy FM Kalibo photo

Kaugnay rito sinabi ng alkalde na nag-imbita ito ng ilang mga politiko sa nasyonal para maging bahagi ng mga nasabing aktibidad.

Ilan lamang ito sa mga proyektong ipinagmalaki ng alkalde na bunga ng mga binabayad na buwis ng taumbayan at hindi galing sa utang.

Samantala, idinagdag ng alkalde na nagpapatuloy ngayon ang pag-aaspalto ng ilang mga kalye sa Kalibo bilang paghahanda narin sa Ati-Atihan.##

- ulat ni Kasimanwang Darwin Tapayan, Energy FM Kalibo

Kalibo humakot ng parangal mula sa DILG 6

HUMAKOT NG parangal ang bayan ng Kalibo sa katatapos lang na 2018 Excellence in Local Governance Award ng Department of Interior and Local Governance (DILG) region 6.

Mismong si Mayor William Lachica ang tumanggap ng nasabing parangal sa awarding ceremony sa Iloilo.

• Champion - Excellence in Economic Governance (1st - 3rd Class Municipality)
• Champion - Excellence in Local Legislation (1st - 3rd Class Municipality)
• 1st Runner-up - Best Performing 1st - 3rd Class Municipality
• 1st Runner-up - Excellence in Administrative Governance (1st - 3rd Class Municipality)
• 2nd Runner-up - Excellence in Social Governance (1st - 3rd Class Municipality)

Nagkamit rin ng parangal ang pamahalaang lokal ng lalawigan ng Aklan:
• 1st Runner-Up - Excellence in Local Legislation
• 2nd Runner-Up - Excellence in Admin. Governance
• Champion - Excellence in Social Governance

Ganoon rin ang munisipyo ng bayan ng Malinao:
• 2nd Rnunner-up - Ecellence in Local Legislation
• 2nd Runner-up - Excellence in Admin Governance

"Excellence In Local Governance Or Excell is DILG's awards program for LGUs to recognize municipalities, cities and provinces commendable for their efforts in instituting good governance in their respective constituencies.

"It is conceptualized as a continuing project of the DILG VI for best managed local governments in the region showcasing their achievements in governance, administration, social services, economic development and environmental management initiatives."

Mayor Lachica: "Ro Kalibo owa it utang"; inisa-isa ang mga proyekto ng administrasyon

INISA-ISA NI Kalibo Mayor William Lachica ang mga proyekto na nagawa at ginagawa sa kanyang administrasyon mula sa binabayad na buwis ng mga tao.

Kasabay nito ipinagmalaki niya na "ro Kalibo owa it utang" sa kanyang mensahe sa "Iwag it Kalibonhon" sa Pastrana Park gabi ng Sabado.

Kabilang sa mga binaggit ng alkalde ay ang Vibrant Kalibo landmark sa Pastrana Park, konstruksyon ng revetment wall sa Bakhaw Norte at mga karatig barangay.

Ganoon rin ang itinatayong evacuation center sa Brgy. Tigayon, health center para sa mga manganganak, at bagong building ng munisipyo kung saan ang rooftop ay lalagyan ng solar panel.

Nabanggit rin niya ang konstruksyon ng mga housing project sa Brgy. Briones na 1,581 bahay sa loob ng anim na ektarya at ganoon rin sa Brgy. Nalook na may limang ektarya.

Ipinagmalaki rin niya ang mga traffic light at CCTV na ikinabit sa mga pangunahing kalsada. Ibinalita niya na may panibago na namang traffic lights ang ikakabit.

"Dayang kuwarta nga ginabayad niyo sa munisipyo hay amon gid nga ginahaeungan ag ibutang sa proyekto agud kamo mismo makatestify kon siin ro kuwarta nagaadto," sabi ni Mayor Lachica.

"Ginabalik-balik ko, ginakalipay ko ro Kalibo owa it utang! Owa it utang," dagdag pa niya. Katuwang aniya niya ang mga opisyal ng Sangguniang Bayan sa pagpapatupad ng mga proyekto.##

- Kasimanwang Darwin Tapayan, Energy FM Kalibo

VICE GOVERNOR QUIMPO SA STL PANAY: MAGSAMPA NG KASO KONTRA KAY MAYOR LACHICA

Iminungkahi ni vice governor Reynaldo Quimpo sa isang kinatawan ng STL Panay Resources Co. Ltd na magsampa ng kaukulang kaso laban kay Kalibo mayor William Lachica.

Ito ang sagot ng bise gobernador sa sulat-reklamo ni Pablo Ocampo na inirefer ng Presidential Complaint Center sa Sangguniang Panlalawigan para sa kaukulang aksiyon.

Matatandaan na sumulat si Ocampo kay pangulong Rodrigo Duterte na humihingi ng tulong sa umano’y panggigipit ng alkalde sa kanilang dredging project sa Aklan river.

Kinuwestiyon niya kung mayroon bang jurisdiction ang mayor na maglabas ng “cease and desit order” para pahintuin ang sinasabing flood mitigation project ng gobyerno probinsiyal.

Gusto rin ni Ocampo na maipaliwanag sa Sangguniang Bayan ng Kalibo na makakatulong sa mamamayan ng Aklan ang kanilang proyekto at hindi umano para sa STL.

Tugon ni Quimpo, maaring magsampa ng kaso administratibo o kriminal sa Ombudsman, sa Sangguniang Panlalawigan o sa regular courts ang STL laban kay Lachica.

Binanggit din ni Quimpo sa kanyang sulat-tugon na kasalukuyan pang dinidinig sa Regional Trial Court ang hiling ni dating Sangguniang Panlalawigan member Rodson Mayor na pahintuin ang dredging project ng STL./ Darwin Tapayan, EFM Kalibo

STL PANAY GINIGIPIT UMANO NG LGU KALIBO SA KANILANG DREDGING PROJECT

Ginigipit umano ng pamahalaang lokal ng Kalibo ang STL Panay Resources Ltd sa kanilang dredging project ayon sa isang kinatawan nito.

Ito ang reklamong ipinadala ni Pablo Ocampo sa tanggapan ni Pangulong Rodrigo Duterte sa pamamagitan ng Presidential Complaint Center.

"Kami po ay ginigipit ng mayor ng Kalibo, bagama't kumpleto po ang aming mga documents upang makapag-umpisa ng dredging," bahagi ng kanyang sulat-reklamo.

Kaugnay rito, humihingi ng agarang solusyon ang kanilang kompanya kay Duterte upang matuloy anila ang kanilang pag-dredge sa Aklan river.

Kinuwestiyon naman sa isa pang sulat ng STL ang jurisdiction ni mayor William Lachica sa pagpapahinto ng kanilang proyekto base sa inilabas niyang executive order.

Pirmado naman ni Patrick Lim, managing director ng STL, ang sulat na ito sa Pangulo.

Ipinagtataka rin nila kung ano pang mga dokumento ang hin
ahanap ng LGU Kalibo gayung ibingay na umano nila lahat.

Sa kabilang banda, nanindigan naman si mayor Lachica na hindi siya kontra sa dredging project sa kondisyon na malagyan ng revetment wall ang gilid ng ilog.

Inirefer na ng Presidential Complaint Center ang kaso sa Sangguniang Panlalawigan ng Aklan.

Samantala inihahanda na umano ni mayor Lachica ang kanyang sagot sa reklamo address sa tanggapan ni Duterte./ Darwin Tapayan, EFM Kalibo

MAYOR LACHICA AT ILANG RESIDENTE SA KALIBO TUTOL PARIN SA DREDGING NG AKLAN RIVER

Tutol parin si Mayor William Lachica at ilang residente sa bayan ng Kalibo kaugnay ng planong pagbuhay ng dredging project sa Aklan river.

Nanindigan si Mayor Lachica na hindi siya sang-ayon sa dredging project sa Aklan river hanggang walang proteksyon ang ilog.

Ito ang naging pahayag ng alkalde umaga ng Miyerkules sa panayam ng Energy FM Kalibo kaugnay ng balitang sisinulan na ang dredging sa ikalawang linggo ng Abril.

Umaga ngayong araw ay dumating na ang dredging vessel ng STL Panay Resources Co. Ltd. at umaangkorahe sa baybayin ng probinsiya.

Ipinagtataka ni Mayor Lachica kung bakit sa kabila ng pagtutol na ito ng mga residente ay itutuloy parin ng gobyerno provincial at project partner na STL.

Ganito rin ang paninindigan ni Punong Barangay Maribeth Cual ng Bakhaw Norte, Kalibo at ilang residente sa nasabing barangay na direktang apektado ng proyekto.

Matatandaan na naunsyami ang operation matapos na mismong si dating DENR Secretary Gena Lopez ang nag-utos na itigil ang dredging buwan ng Enero ng nakaraang taon.

Kasunod iyon ng mga pangamba ng ilan lalu na ng mga taga-Brgy. Bakhaw Norte, Kalibo na ang nasabing proyekto ay magdudulot ng pagguho ng lupa sa mga tabing-ilog./ Darwin Tapayan, EFM Kalibo

'TASK FORCE HAWAN' BINUO UPANG LINISIN ANG MGA KALSADA SA KALIBO

Bumuo na ng 'Task Force Hawan' si Kalibo mayor William Lachica upang linisin ang iba-ibang lansangan at kalsada sa bayang ito.

Kasunod ito ng inilabas at nilagdaang executive order ng alkalde at epektibo Agosto 8.

Base sa executive order no. 028, ang clearing operation ay gagawin para sa implementasyon ng traffic code ng munisipyo.

Ayon kay mayor Lachica, naging problema na ang mabagal at pagsikip ng daloy ng trapiko sa bayang ito dahil sa iba-ibang obstraksiyon sa mga kalsada pati na ang national highway.

Ilan sa binanggit ng mayor na obstraksiyon ang paggamit ng mga kalsada bilang parking area ng mga establisyemento komersyal; mga nagtitinda sa tabing kalsada; at over extended terminal ng mga sasakyan.

Kaugnay rito, ang binuong task force ay inatasang magsagawa ng ocular inspection; makipag-ugnayan sa mga business establishment, mga street vendors, at sa mga may-ari o driver ng mga pampubliko at pribadong sasakyan.

Ang task force din ang magpapatupad ng clearing operation para sa implementasyon ng municipal ordinance no. 2005-043 o traffic code ng Kalibo.

Chairman sa task force na ito ang head ng Traffic Transport Management Unit, kasama ang mga tauhan sa tanggapan ng mayor, at ang pulisya.

Kaugnay parin dito, naglabas na ang TTMU ng proposed traffic scheme kabilang na ang one way street with one side parking with pay, two way street, overnight parking, no parking, no left turn, no uturn at no entry.