BAGONG TRAFFIC SCHEME SA MGA PANGUNAHING KALSADA SA KALIBO PLANO NANG ISABATAS

Ulat ni Darwin Tapayan, Energy FM 107.7 Kalibo

Pinagpaplanohan na ngayon ng Sangguniang Bayan ang pagsasabatas sa bagong traffic scheme sa mga pangunahing kalsada o lansangan sa Kalibo.

Pinuna ng ilang miyembro ng Sanggunian na ilang motorista ang sumusuway sa umiiral na dry-run ng rerouting scheme na nagsimula pa sa pangalawang linggo ng Agosto.

Ayon kay SB member Daisy Briones, kailangan nang maisabatas ang scheme para mapatawan na ng kaukulang mga penalidad ang mga lumalabag rito.

Sa pagharap sa regular session ng Sanggunian, sinabi ni SPO3 James Bantigue, chief traffic ng Kalibo PNP, inihahanda na ng traffic and transport management division ang proposal sa Sanggunian para sa pagsasabatas nito.

Ito rin ang hiling ng isang abogado sa kanyang sulat na ipinadala sa Sanggunian. Ayon kay Niobady Marin kailangan umanong maging tuluy-tuloy na ang maayos na daloy ng trapiko; dapat anya ay maisabatas agad ito.

Nakatakda namang magpulong ang committee on transportation ng Sanggunian kaugnay sa nasabing isyu.

MGA TRICYCLE DRIVER AT OPERATOR PABOR SA BAGONG TRAFFIC SCHEME SA KALIBO

Pabor ang Federation of Kalibo Tricycle’s Operators and Drivers Association Inc. (FOKTODAI) sa dryrun ng bagong traffic scheme sa kabiserang ito ng probinsiya.

Ayon kay federation president Johnny Damian, noon pa man ay ito na ang kanilang kagustuhan na maging maayos at malinis ang mga pangunahing kalsada sa Kalibo.

Umaasa umano ang pederasyon na hindi magiging ‘ningas kogon’ ang pagpapatupad ng panibagong traffic scheme. 

Nanawagan naman siya sa mga kasama niyang mga tricycle driver at mga operator na maging disiplinado at sumunod sa ipinapatupad na batas trapiko.

Mapapansin na ang mga pangunahing kalsada sa bayang ito ang maraming signages na ‘no parking’, ‘no entry’ at iba pa dahil sa dry run ng traffic scheme na nasa pangatlong linggo ngayon.

Matatandaan na sinabi ni Traffic and Transport Management Unit head Mary Gay Quimpo-Joel na magpapatuloy ang dryrun hanggang sa maisabatas na ito.

PANIBAGONG TRAFFIC SCHEME IPAPATUPAD NA SA SUSUNOD NA LINGGO

Ipapatupad na sa kabiserang bayan ng Kalibo ang panibagong traffic scheme sa susunod na linggo.

Ito ang kinumpirma ni Traffic and Transport Management Unit (TTMU) head Mary Gay Joel sa Energy FM Kalibo.

Ayon sa kanya, ngayong weeked ay maglalagay na sila ng mga signages sa mga lansangan na maapektuhan ng panibagong eskema. 

Paliwanag ni Joel, ang implementasyong ito ay alinsunod sa umiiral na traffic code ng munusipyo.

Plano ng TTMU na sa Lunes ay magsisimula na sila para sa dryrun nito pero kung aalanganin anya ay pwede rin na sa Miyerkules.

Sinabi pa niya na matagal narin umanong ipinaalam ang panibagong sistemang ito sa iba-ibang toda sa bayan ng Kalibo.

Kabilang sa panibagong traffic scheme na ito ang one way street with one side parking with pay, two way street, overnight parking, no parking, no left turn, no uturn at no entry.

Sa ngayon ay puspusan na ang ginagawang clearing operation ng binuong ‘Task Force Hawan’ sa mga kalsada at lansangan sa bayang ito.

Ang ‘Oplan Hawan’ na ngayon ay nasa ikatlong araw na ay preparasyon ng munisipyo para sa implementasyon ng panibagong traffic scheme.

'TASK FORCE HAWAN' BINUO UPANG LINISIN ANG MGA KALSADA SA KALIBO

Bumuo na ng 'Task Force Hawan' si Kalibo mayor William Lachica upang linisin ang iba-ibang lansangan at kalsada sa bayang ito.

Kasunod ito ng inilabas at nilagdaang executive order ng alkalde at epektibo Agosto 8.

Base sa executive order no. 028, ang clearing operation ay gagawin para sa implementasyon ng traffic code ng munisipyo.

Ayon kay mayor Lachica, naging problema na ang mabagal at pagsikip ng daloy ng trapiko sa bayang ito dahil sa iba-ibang obstraksiyon sa mga kalsada pati na ang national highway.

Ilan sa binanggit ng mayor na obstraksiyon ang paggamit ng mga kalsada bilang parking area ng mga establisyemento komersyal; mga nagtitinda sa tabing kalsada; at over extended terminal ng mga sasakyan.

Kaugnay rito, ang binuong task force ay inatasang magsagawa ng ocular inspection; makipag-ugnayan sa mga business establishment, mga street vendors, at sa mga may-ari o driver ng mga pampubliko at pribadong sasakyan.

Ang task force din ang magpapatupad ng clearing operation para sa implementasyon ng municipal ordinance no. 2005-043 o traffic code ng Kalibo.

Chairman sa task force na ito ang head ng Traffic Transport Management Unit, kasama ang mga tauhan sa tanggapan ng mayor, at ang pulisya.

Kaugnay parin dito, naglabas na ang TTMU ng proposed traffic scheme kabilang na ang one way street with one side parking with pay, two way street, overnight parking, no parking, no left turn, no uturn at no entry.

INTEGRATED TERMINAL PARA SA MGA SASAKYAN SA PROBINSIYA ISINUSULONG NG PAMAHALAANG LOKAL NG KALIBO

photo (c) Double A

Isinusulong ngayon ng lokal na pamahalaan ng Kalibo ang integrated terminal para sa lahat ng mga sasakyang bumibiyahe sa western side ng probinsiya.

Ito ang nakikinitang solusyon ni Mary Gay Quimpo-Joel, head ng Traffic Transport Management Unit (TTMU) ng Kalibo sa lamangan ng pasahero sa mga bumibiyaheng sasakyan.

Ang pahayag na ito ni Joel ay kasunod ng ipinaabot na reklamo ng asosasyon ng mga jeepney operator at driver kaugnay ng pagharang ng mga van sa dapat ay kanilang pasahero.

Gayunman sinabi ni Joel na matagal na itong isinusulong ng pamahalaang lokal katunayan anya ay may badyet na na inilaan para dito.

Pero dahil sa hirap silang makahanap ng lugar na pagtatayuan nito ay naantala ang matagal na dapat na konstruksiyon ng nasabing terminal.

Maoobserbahan na kalat-kalat ang mga terminal ng mga van sa Kalibo bagay minsan na inirereklamo ng mga jeep na nag-aantay ng pasahero sa Oyo Torong.

Pinasiguro naman niya na habang hindi pa nasisimulan ang naturang proyekto ay tuloy-tuloy ang gagawin nilang panghuhuli sa mga van na iligal na nagpapasakay ng pasahero sa Roxas Avenue.