Vice Governor Quimpo ipinaliwanag kung bakit umuutang ang gobyerno probinsyal

IPINALIWANAG NI Vice Gov. Reynaldo Quimpo sa isang press conference kung bakit kailangang umutang ng gobyerno probinsiyal.

Ang kaniyang pahayag ay kasunod ng katanungan ng media kung paano matutulungan ng gobyerno probinsiyal ang mga mahihirap na pasyente  na kailangan ipagamot sa labas ng probinsiya.

Sinabi niya na naglaan ng Php50 million ang pamahalaang probinsyal para sa indigency program sa ilalim ng tanggapan nf gobernador para gamitin tulong medikal sa mga mahihirap.

Sa kabila nito aminado si Vice Gov. Quimpo na kulang parin aniya ang pondong ito. Ito aniya ang dahilan kaya umuutang ang probinsiya upang gamitin sa mga proyekto na pwedeng pagkakakitaan.

"Kinahangean naton nga mag-utang agud maayudahan pa gid naton it abu ro aton nga mga kasimanwa nga nagakinahangean it bulig pinaagi sa mga revenue-generating nga mga proyekto," sabi niya.

Kabilang sa mga binanggit ng bise gobernador na mga proyekto ay ang pagtatayo ng panibagong pier sa Caticlan para gamitin ng mga RoRo vessel. Dagdag kita umano ito sa probinsiya.

Mababatid na ang pondong gagamitin rito ay uutangin mula sa Land Bank.

Binanggit rin niya ang planong pagtatayo ng tourist night market sa Boracay para sa mga displaced workers. Ito ay popondohan mula sa uutanging Php1 billion sa Development Bank of the Phippines.

Mababa aniya ang Internal Revenue Allotment dependency ng probinsiya para sa taong 2019 na nasa 53 porsyento dahilan para maghanap ng lokal na mapagkakakitaan ang kapitolyo.

Sinabi rin niya na sa kabila ng pagsara ng Boracay hindi umano nila nilimitahan ang budget para sa social services na nasa 40 porsyento ng mahigit Php2 billion kabuuang budget sa 2019.

"Without fear of contradiction, I can declare nga rayang administrasyon do may minatuod-tuod nga pagkabaeaka, pagtatap sa mga kubos naton nga mga igmanghod," pahayag ng opisyal.##

- ulat ni Kasimanwang Darwin Tapayan, Energy FM Kalibo

Mahigit Php2 billion budget ng Aklan lusot na sa komitiba ng Sangguniang Panlalawigan

Energy FM Kalibo photo

LUSOT NA sa Committee of the Whole ng Sangguniang Panlalawigan araw ng Martes ang pag-apruba sa Php2,045,746,825 annual budget sa susunod na taon 2019.

Ayon kay SP Acting Secretary Josefa Elena Martin ang budget sa 2019 ay mas mataas ng siyam na porsyento o Php184 million kumpara sa kasalukuyang taon.

Sa susunod na regular session ng Sanggunian ay isasalang na sa ikalawa, ikatlo at huling pagbasa ang ordinansa kaugnay rito. Inaasahan na maaaprubahan ito bago magbakasyon ang mga opisyal.

Nabatid na sa kabuuang budget, 53 porsyento (Php1,096,246,825)  ang mula sa Internal Revenue Allotment, walong porsyento ang galing sa Tax and Non-Tax Revenue (Php158,350,000) – mas mataas ng 11 porsyento kumpara sa taong 2018.

Habang ang natitirang 39 porsyento (Php791,150,000) ay mula sa Economic Enterprise. Mas mababa umano ito ng walong porsyento sa 2018 budget sanhi ng anim na buwang pagsara sa Isla ng Boracay.

Sinabi ni Vice Gov. Boy Quimpo na sa kabuuang budget 40 porsyento ang ilalaan para sa serbisyo pangkalusugan o katumbas ng Php817,055,889.

Sinabi pa niya na aabutin pa ng nasa dalawang taon bago makabawi ang gobyerno probinsiyal sa pagbaba ng pondo ng Economic Enterprise Development Department dahil sa pagsara ng Boracay.

Sa lahat ng budget allotment, pinakamalaki ang mapupunta sa pamamalakad ng Dr. Rafael S. Tumbukon Memorial Hospital, sweldo sa mga tauhan at iba pang gastusin – Php448,037,011.

Pangalawa ang tanggapan ng gobernador sa may pinakamalaking ilalaang pondo -- Php308,442,875.25.##

Mahigit Php2 billion - budget ng probinsiya ng Aklan sa 2019

PINAG-AARALAN NGAYON sa Sangguniang Panlalawigan ng Aklan ang pag-apruba sa Php2,045,746,825 annual budget sa susunod na taon 2019.

Ito ang ibinalita ni Vice Gov. Reynaldo Quimpo sa mga media workers sa kanyang mensahe sa KBP-Aklan Broadcaster's Ball 2018 gabi ng Linggo.

Sa kabuuang pondo 61 porsyento umano rito ang regular fund samantalang ang 39 porsyento naman ang Economic Enterprise and Development Department (EEDD) fund.

Ipinagmalaki ni Vice Gov. Quimpo na sa kabuuang budget 40 porsyento nito ang ilalaan para sa serbisyo pangkalusugan o katumbas ng Php817,055,889.

"I don't know which province, which city, which municipality allocates 40 percent of their total budget. I think it is only the province of Aklan," sabi ng opisyal.

"Lately we have spent so much, we have allocated so much to improved our hospital owned and operated by the province of Aklan.

"We have added facilities, we have added personnel and upgraded the status from level one to level two and some infirmaries to level 1 hospital," paliwanag niya.

Kung ikukumpara sa taong ito, doble ang inilaang pondo ng gobyerno probinsiyal para lamang sa Dr. Rafael S. Tumbokon Memorial Hospital. Nasa Php400 million umano ang pondo rito sa 2019.

Samantala, sinabi ng bise gobernador na aabutin pa ng dalawang taon bago makabawi ang gobyerno probinsyal sa kita kasunod na pagsara ng Isla ng Boracay.##

- Kasimanwang Darwin Tapayan, Energy FM Kalibo

PAG-UUTANG NG PHP1 BILLION NG GOBYERNO PROBINSIYAL APRUBADO NA SA SANGGUNIANG PANLALAWIGAN

INAPRUBAHAN NA ng Sangguniang Panlalawigan ng Aklan sa ikatlo at huling pagbasa ang ordenansa kauganay ng Php1 billion proposed loan ng gobyerno probinsiyal.

Pumabor ang lahat ng mga miyembro ng Sanggunian maliban lamang kina board member Atty. Harry Sucgang at Atty Noly Sodusta na negatibo ang mga boto kagaya ng mga unang pagbasa.

Ang nasabing Php1 billion proposed loan sa Developement Bank of the Philippines ay gagamitin umano sa iba-ibang proyekto ng probinsiya.

Kabilang sa mga proposed project na popondohan ay ang pagtatayo ng oxygen plant, pagbili ng medical waste decomposer, at pagsasaayos ng three-storey building ng Dr. Rafael S. Tumbolon Memorial Hospital sa halagang Php100 million.

Ang Php900 million ay mapupunta sa pagsaayos ng Caticlan Jetty Port, pagpapaganda ng Goding Ramos Park, pagpapatayo ng ICT Center sa bisinidad ng DRSTMH, pagtatayo ng night market sa Boracay, programang pang-agrikultura at pagbili at pagsasaayos ng ilang heavy equipment.

Nilinaw ni Vice Gov. Reynaldo Quimpo sa press conference pagkatapos aprubahan ang ordenansa na ang pagpondo sa bawat proyekto ay dadaan pa sa pag-apruba ng appropriation ordinance ng Sangguniang Panlalawigan.

Tiniyak naman ni Vice Gov. Quimpo na mataas ang kakayahan ng probinsiya na mababayaran ang uutangin ng gobyerno probinsiyal mula sa bangko.##
Image may contain: sky and outdoor

VICE GOVERNOR QUIMPO SA STL PANAY: MAGSAMPA NG KASO KONTRA KAY MAYOR LACHICA

Iminungkahi ni vice governor Reynaldo Quimpo sa isang kinatawan ng STL Panay Resources Co. Ltd na magsampa ng kaukulang kaso laban kay Kalibo mayor William Lachica.

Ito ang sagot ng bise gobernador sa sulat-reklamo ni Pablo Ocampo na inirefer ng Presidential Complaint Center sa Sangguniang Panlalawigan para sa kaukulang aksiyon.

Matatandaan na sumulat si Ocampo kay pangulong Rodrigo Duterte na humihingi ng tulong sa umano’y panggigipit ng alkalde sa kanilang dredging project sa Aklan river.

Kinuwestiyon niya kung mayroon bang jurisdiction ang mayor na maglabas ng “cease and desit order” para pahintuin ang sinasabing flood mitigation project ng gobyerno probinsiyal.

Gusto rin ni Ocampo na maipaliwanag sa Sangguniang Bayan ng Kalibo na makakatulong sa mamamayan ng Aklan ang kanilang proyekto at hindi umano para sa STL.

Tugon ni Quimpo, maaring magsampa ng kaso administratibo o kriminal sa Ombudsman, sa Sangguniang Panlalawigan o sa regular courts ang STL laban kay Lachica.

Binanggit din ni Quimpo sa kanyang sulat-tugon na kasalukuyan pang dinidinig sa Regional Trial Court ang hiling ni dating Sangguniang Panlalawigan member Rodson Mayor na pahintuin ang dredging project ng STL./ Darwin Tapayan, EFM Kalibo

PHP700 MILLION PARA SA MGA GOVERNMENT HOSPITAL SA AKLAN ISINUSULONG SA SANGGUNIANG PANLALAWIGAN

ulat ni Darwin Tapayan, Energy FM 107.7 Kalibo

Isinusulong ngayon sa Sangguniang Panlalawigan ang mahigit Php700 milyong badyet para sa mga government owned and operated hospital sa Aklan para sa susunod na taon.

Ito ang pinahayag ni vice governor Reynaldo Quimpo sa isang post sa kanyang facebook account nitong Sabado, Nov. 11.

Sinabi ng opisyal na gagamitin ang perang ito para sa operation ng provincial, mga district at municipal hospitals sa buong probinsya.

Kabilang ito sa kabuuang Php2.011 billion budgetary appropriation ng gobyerno probinsyal para sa susunod na taon.

Nasa Php1.151 bilyon dito ay annual general fund ng probinsya, Php860 million naman para sa Economic Enterprise Development Department. Ang natitirang Php213.35 million ay galing sa Internal Revenue Allotment.

Nabatid na nagsimula na ang committee of the whole ng Sanggunian na talakayin ang nasabing panukala nitong Nobyembre 7 at inaasahan namang matatapos sa Nobyembre 28.

Samantala, pinagmalaki at pinasalamatan rin niya sa parehong post ang mga doktor, nurses at iba pang mga medical practicioners, at mga administrative personnel na napiling maglingkod sa Aklan at sa mga Aklanon.

PHP41M POSIBLENG MALIKOM NG PAMAHALAANG LOKAL NG AKLAN MULA SA BAGONG TAX ORDINANCE

ulat ni Darwin Tapayan, Energy FM 107.7 Kalibo

Tinatayang nasa Php41 milyon ang malilikom ng pamahalaang lokal ng Aklan mula sa bagong tax ordinance ng probinsiya mula sa mga real properties. 

Ito ang sinabi ni provincial treasurer Suzette Pioquid sa  press conference sa Sangguniang Panlalawigan kasunod ng pag-apruba ng tax ordinance no. 2017-001 nitong nakaraang linggo.

Sinabi ni Pioquid na sa nakalipas na taon, nakalikom ang pamahalaang lokal ng Php28 milyon mula sa umiiral na tax ordinance.

Ayon naman kay vice governor Reynaldo Quimpo, bagaman nagtaas ang babayarang amelyar sa bagong ordenansa, sapat lamang anya ito para makober ang administrative expensives ng gobyerno lokal.

Ayon sa nasabing batas, ang kikitaing buwis ay paghahatian ng pamahalaang lokal ng probinsiya (35%), munisipyo (40%), at ng barangay (25%) para sa iba-ibang proyekto.

Ang isa pang bahagi ng binabayarang buwis ay mapupunta sa Special Education Fund (SEF). 

Paliwanag ng mga opisyal, kabilang sa paggagastuhan nito ay ang mga school board teacher, sports program, repair at maintenance ng mga school buildings.

Ang SEF ay paghahatian ng munisipyo at ng probinsiya.

DALAWANG MARKER SA BAGONG LEGISLATIVE BUILDING, INIHAHANDA NA PARA SA INAGURASYON

ulat ni Darwin Tapayan, Energy FM 107.7 Kalibo

Dalawang marker ang nakatakdang i-unveil sa inagurasyon ng bagong legislative building ng Sangguniang Panlalawigan ng Aklan sa darating na Hulyo 27.

Ito ang kinumpirma ni vice governor Reynaldo Quimpo sa huling regular session nila sa lumang legislative building.

Anya, sa isang marker, nakasulat rito ang mga pangalan ng miyembro ng ika-16 na Sanggunian at sa isa naman ay ang mga pangalan ng kasalukuyang miyembro o ika-17 Sanggunian.

Nabatid na ang dating bise gobernador na si Gabrielle Quimpo kasama ang ika-16 Sanggunian ang nagpursiging maitayo ang naturang gusali.

Sa kabilang banda, bago paman ang inagurasyon sa susunod na linggo ay magsasagawa ng isang mock session ang mga miyembro ng Sanggunian sa bagong gusali.

Ito ay kasunod ng kahilingan ni SP member Jose Miguel Miraflores sa plenaryo para anya ma-test ang mga equipment roon at blocking nila.

Ang mock session ay gaganapin sa Lunes ng hapon pero sa umaga ng araw na ito ay magsasagawa pa ng mga committee hearing ang Sanggunian sa luma nilang gusali.

Naghahanda na ang mga opisyal at empleyado ng pamahalaang lokal ng Aklan para sa inagurasyon ng bagong gusali ng Sangguniang Panlalawigan sa darating na Hulyo 27.