MAY-ARI NG MGA BARIL NA NAREKOBER SA KOTSE NA NADISGRASYA SA IBAJAY PATULOY NA TINUTUKOY

(update) Patuloy na inaalam ng kapulisan kung sino ang nagmamay-ari ng dalawang baril na narekober sa loob ng nadisgrasyang kotse sa Brgy. Colong-colong, Ibajay gabi ng Linggo.

Ang mga baril na ito ay isang 9mm at 45 caliber. Ayon kay PCInsp. Ariel Nacar, hepe ng Ibajay PNP, wala umanong mga bala ang mga baril na ito nang marekober ng kapulisan.

Sinabi pa ni Nacar na isang retiradong sundalo na hindi na pinangalanan pa ang dumulog umano sa kanilang tanggapan kinabukasan matapos ang insidente at inaangkin ang mga baril na nagpakita rin ng mga dokumento.

Beberipikahin parin umano ang mga ipinakita niyang dokumento. Sa ngayon ay hinihintay pa ng Ibajay PNP ang sagot ng Firearms and Explosive Division ng PNP sa Campo Crame para mapatunayan kung sino ang nag-mamay-ari ng mga ito.

Iginiit rin niya sa panayam ng Energy FM Kalibo hapon ng Miyerkules na hindi pwedeng makasuhan ang driver at isa pang sakay ng kotse dahil hindi narekober ang mga baril sa kanilang posisyon.

Matatandaan na sumalpok sa pader ang kotseng ito na menamaneho ni Adrian Alag kasama ang sakay na si Randy Fernandez, parehong taga-Brgy. Laguinbanwa, Ibajay, at nasa impluwensiya ng nakalalasing na inumin ng maganap ang insidente.

Parehong nagtamo ng mga sugat sa katawan ang dalawa at mabilis na isinugod sa ospital ng rumespondeng mga tauhan ng Municipal Disaster Risk Reduction Management Office (MDRRMO).

Base sa ulat ng Ibajay PNP, hindi kasama sa aksidente ang naturang retiradong army. Itinatanggi naman ng driver at ng sakay nito ang mga nasabing baril. Inaalam rin kung sibo ang nagmamay-ari ng kotse.

Nabatid na ang driver ng kotse ay anak ni dating SB member Ariel Alag at ngayon ay MDRRMO officer sa nasabing bayan. | Darwin Tapayan, EFM Kalibo

MISIS NADUKUTAN NG PHP30K SA KALIBO; SUSPEK SAPUL SA CCTV

ulat ni Darwin Tapayan, Energy FM 107.7 Kalibo

Nadukutan ng nasa Php30,000 ang isang misis habang nasa loob ng isang establisyemento dito sa bayan ng Kalibo.

Kuwento ni Julie Igual-Martinez sa mga kapulisan, magbabayad na umano siya sa counter nang malamang nawawala na ang kanyang pouch sa loob ng bag.

Ayon pa sa 53-anyos na misis na taga-Sta. Cruz, Lezo, laman ng pouch ang nabanggit na halaga ng pera.

Nang usisain ang CCTV footage ng FUS merchandise, makikita ang isang babae na marahang binubuksan ang kanyang shoulder bag at kinuha ang pouch sa loob saka nilagay sa gift wrapper.

Medyo chubby ang babae, nakasombrero, naka-tshirt at nakapants.

Iniimbestigahan na ng Kalibo municipal police station ang pagkakikilalan ng suspek.

PAMPASABOG NATAGPUAN SA BAKURAN NG KAPITAN SA IBAJAY

Ulat ni Darwin Tapayan, Energy FM 107.7 Kalibo

Isang pampasabog o bomba ang natagpuan sa likuran ng bahay ng punong barangay sa Sta. Cruz, Ibajay Huwebes ng hapon (Oct. 12).

Salaysay ni punong barangay Vergelio Dela Cruz sa kapulisan ng Ibajay, una umano niyang nakita ang isang plastic bag na nakausli sa lupa habang naglilinis ng bakuran.

Nang usisain, laking gulat niya nang mapag-alamang isang uri ng pampasabog ang laman nito.

Ayon sa pulisya isa itong 60 mm mortar bomb na hindi pa sumabog. Ayon kay SPO4 Benjie Repedro, Explosives Ordnance Division (EOD), ang nasabing pampasabog ay isa rin umano sa ginagamit na pampasabog sa giyera sa Marawi City.

Nanawagan siya sa taumbayan na kapag nakakita ng ganitong uri ng bomba ay huwag galawin at ireport agad sa mga kapulisan.

Nakatakdang i-dispose ang nasabing bomba.

LALAKI SINAKSAK SA ISANG LAMAY SA IBAJAY, AKLAN PATAY

Ulat ni Archie Hilario, Energy FM 107.7 Kalibo

Patay ang isang lalaki matapos saksakin sa isang lamay sa Barangay Ondoy, Ibajay, Aklan alas-10:00 kagabi.

Kinilala ang biktima sa pangalang Jeorge Ascaño y Nalas, 30-anyos na residente ng nabanggit na lugar.

Naaresto naman ang suspek na si Rosannie Borres y Dalisay, 46-anyos, residente rin ng parehong  barangay.

Sa imbestigasyon ng PNP nasa sugalan raw ang biktima, nagkaroon ng diskusyon ang suspek sa iba pang kasugalan, umawat lamang ang biktima kaya nasaksak ito sa tiyan.

Naisugod pa sa Ibajay District Hospital ang biktima at kalaunan ay inilipat sa Aklan Provincial Hospital kung saan dito na binawiian ng buhay.

DALAWANG LALAKI ARESTADO SA BAYAN NG IBAJAY DAHIL SA ILIGAL NA OPERASYON NG EZ2

ulat ni Darwin Tapayan, Energy FM 107.7 Kalibo

Arestado ang dalawang lalaki sa bayan ng Ibajay dahil sa iligal na operasyon ng EZ2 sa kanilang lugar.

Kinilala ang mga suspek na sina Herminio Espenosa, 66 anyos, at Jemar Alag, 18, parehpng residente ng brgy. Laguinbanwa sa nasabing bayan.

Ginawa ng mga tauhan ng Ibajay municipal police station ang pag-aresto dakong alas-7:00 ng gabi sa nasabing barangay.

Una rito tumaya ang isang tauhan ng pulis kay Alag ng Php50 marked money. Inaresto rin ang kasama niyang si Espenosa kung saan umano niya nireremet ang pera.

Nakakulong na ngayon sa Ibajay PNP station ang dalawang suspek at nakatakdang sampahan ng kasong paglabag sa anti-gambling law.

2 BATA NAIULAT NA NAWAWALA SA BAYAN NG IBAJAY

Nanawagan ngayon si kasimanwang Nida Ramis, 56 anyos ng Brgy. Rizal, Ibajay matapos mawala ang kanyang apo at anak na pawang mga menor de edad.

Ang mga ito ay sina Niña Ramis, 7 year-old at pamangkin niyang si John Michael Escala, 11.

Ayon kay Kasimanwang Nida, huling nakita ng kanyang mga kapitbahay ang dalawa dakong alas-6:00 kagabi sa isang tindahan malapit sa kanilang bahay sa brgy. Rizal.

Simula noon ay hindi na nakita at umuwi ng bahay ang mga bata bagay na ikinababahala ng pamilya.

Photo © Ibajay PNP

Sinabi rin niya sa Energy FM Kalibo na nakipag-ugnayan at pinuntahan na nila ang mga kamag-anak at mga kakilala ng mga bata na pwede nilang puntahan pero negatibo umano.

Umaasa parin ang pamilya na babalik ang dalawa. Paliwanag ni Kasimanwang Nida bagaman napagsasabihan nila ang mga bata ay hindi naman umano nila ito sinasaktan.

Huling nakita ang batang lalaki na nakasuot ng puting tshirt at navy blue na short pants samantalang ang babae ay nakasuot ng medyo kupas na pink na tshirt at bulaklaking short.

Naireport narin ito sa pulisya at ipinakalat na ang impormasyon sa bayan at sa kampo ng pulisya sa probinsiya.

Kung may anumang impormasyon sa kinaroroonan o kalagayan ng mga bata magreport lamang sa pulisya, sa himpilang ito o sa pamilya sa 09121352545.

SEKYU PATAY NANG BUMANGGA ANG MOTORSIKLO SA STOCKPILE SA BRGY. NAILE, IBAJAY

Patay ang isang 24-anyos na sekyu matapos bumangga ang sinasakyang motorsiklo sa stockpile sa brgy. Naile, Ibajay Sabado ng gabi.

Kinilala ng pulisya ang biktima na si Jesther Tagle y Florenso, residente ng Sta. Cruz, Ibajay at nagtratrabaho bilang sekyu sa isla ng Boracay.

Ayon kay PO1 George Regalado, imbestigador ng Ibajay PNP, bumangga sa stockpile sa gilid ng kalsada ang motorsiklo ng biktima.

Paliwanag ni Regalado, medyo madilim ang lugar at kasalukuyang ginagawa ang drainage sa gilid ng kalsada. Mabilis rin umano ang patakbo ng biktima.

Tumilapon umano ang biktima ilang metro mula sa kanyang motorsiklo at sumubsob sa kalsada.

Pinagtulungan naman ng mga opisyal ng barangay at ilang residente ang biktima at isinugod sa district ospital sa Ibajay pero dineklara rin itong dead on arrival.

Nabatid na papunta sana sa brgy. Monlaque, Ibajay ang biktima sa kanyang livein partner dakong alas-9:00 ng gabi nang maganap ang insidente.

ALE NASALISIHAN SA IBAJAY PUBLIC MARKET; MAGKAKAPATID NA MGA SUSPEK ARESTADO

photo (c) The Owner

Nasalisihan ang isang tindera ng isda sa Ibajay Public Market Martes ng umaga samantalang naaresto naman agad ang dalawang suspek.

Nakilala ang biktima na si Divina Soguilon, 54 anyos ng brgy. Bugtong-bato, sa nasabing bayan.

Ayon kay PO1 George Regalado, imbestigador ng Ibajay PNP, abala umano ang tindera sa pakikipag-usap sa babaeng suspek nang siya ay salisihan ng kasamang lalaking suspek.

Nakita umano niya sa kanyang pwesto ang pagtangay ng lalaking suspek sa kanyang shoulder bag.

Agad humingi ng tulong sa mga auxiliary police ang biktima at na nahuli ang lalaki maging ang kasama niyang babae.

Narekober sa lalaki ang itim na bag na naglalaman ng mahigit Php18,000.

Kinilala ang mga suspek na sina Mark Anthony Rosales, 27 anyos, at kapatid umano niyang si Ruby Rosales, 35, pawang mga residente ng Tondo, Manila.

Sinabi ni Regalado, inaalam na nila kung may iba pang kasama ang mga ito at kung may iba na na nabiktima ang mga ito dito sa probinsiya.

Ayon sa imbestigador nakita umano nila sa ticket na may ginamit silang sasakyan na ZAB-268 na posible anyang ginagamit nilang service vehicle.

Sa ngayon nakakulong na ang dalawa sa karsel ng Ibajay PNP station at nakatakdang sampahan ng kasong theft.

BARBERO, HULI SA PAGTUTULAK NG DROGA SA BAYAN NG IBAJAY

Arestado ang isang 39 anyos na barbero sa pagtutulak sa iligal na droga sa brgy. San Isidro, Ibajay madaling araw.

Kinilala ang suspek na si Aldwin Andrade, residente ng nasabing lugar.

Naaresto siya sa kanyang residensya matapos mabilhan ng isang sachet ng pinaghihinalaang shabu kapalit ng Php500 buybust money.

Nakuha rin sa kanyang posisyon at kontrol ang tatlo pang sachet ng parehong sangkap.

Ayon kay PCInsp. Frenzy Andrade, hepe ng Provincial Drug Enforcement Unit, ang suspek ay matagal nang minomonitor bago paman ito nagsurender sa pagsisimula ng Oplan Tokhang.

Pahayag pa ni CInsp. Andrade, bagaman sumuko siya ay bumalik rin ito sa pagtutulak ng droga.

Sinabi pa ng hepe na nag-ooperate ito sa bayan ng Ibajay at may pinagkukunan ng suplay dito lang sa probinsiya.

Ang operasyon ay ikinasa ng pinagsamang pwersa ng PDEU, Ibajay PNP, Philippine Drug Enforcement Agency, Aklan Public Safety Company, at 12IB TIU MIG6.

Ang nasabing suspek ay pansamantalang nakakulong sa Kalibo PNP station at nakatakdang sampahan ng kasong paglabag sa RA 9165.

40 ANYOS NA LALAKI ARESTADO DAHIL SA ILIGAL NA OPERASYON NG EZ2 SA BAYAN NG IBAJAY

Arestado ang isang 40 anyos na lalaki sa operasyon ng mga kapulisan laban sa illegal gambling sa brgy. Tul-ang, Ibajay kahapon ng hapon.

Kinilala ang suspek na si Edito Italia, residente ng Aparicio, Ibajay.

Nakuha sa kanya ng mga awtoridad ang nasa Php21,000 kabilang na ang Php40 na marked money; papel o “koteho” na ginagamit sa pagpapataya.

Nakuha rin sa kanya ang kanyang motorsiklo at pitong live ammunition ng caliber 45.

Nabatid na ang lalaki ay iligal na nagpapataya ng EZ2 sa nasabing bayan dahil hindi ito konektado at otorisado ng Philippine Charity Sweepstakes Office.

Ikinasa ang operasyon ng pinagsamang pwersa ng Aklan Provincial Police Office Trackers Team at ng Ibajay PNP.

Nakakulong ngayon ang suspek sa Ibajay PNP station at nakatakdang samapahan ng kasong illegal gambling at kasong paglabag sa Republic Act 10591.

2 YRS OLD NA BATA INIWAN NG AMA SA ABANDUNADONG RESTAURANT SA AQUINO, IBAJAY

Nasa pangangalaga na ng tiyahin ang batang lalaki na una nang inabanduna sa brgy. Aquino, Ibajay.

Sa panayam ng Energy FM Kalibo kay SPO1 Nemie Alag, admin ng Ibajay PNP, ang 2 years old na bata ay sinundo na ng kanyang tiyahin.

Nabatid na unang nakita ang bata sa abandunadong restaurant dakong alas-11:30 ng umaga na inaakala na may hinihintay lang.

Ikinabahala naman ng mga tao sa lugar nang mapansin ito na naroroon parin bandang alas-3:00 ng hapon kaya inireport nila ito sa PNP.

Agad namang kinuha ng mga pulis ang bata at dinala sa district ospital dahil may mga rushes ito sa katawan.

Itinurn-over ito ng mga pulis sa Municipal Social Welfare and Development Office para pangalagaan

.

Kalaunan ay dumating din ang kanyang tiyahin at kinuha ang bata.

Nagpadala naman ng tulong pinansiyal, mga damit at pagkain ang mga pulis, MSWD, at iba pa sa magtiyahin na patungo na nang Maynila.

Napag-alaman na galing sa Capiz ang magtiya sakay ng bus at pagdating sa brgy. Aquino ay bumaba ang tiya para ibigay ang bata sa kanyang tatay.

Lingid sa kaalaman ng tiyahin at na pagkatapos niyang iwan ang bata sa ama ay iniwan niya rin ito doon.

Dumiretso ang tiya sa Caticlan, Malay dahil tatawid sana itong Maynila para magtrabaho.

Bumalik siya nang mapag-alaman ang nangyari sa bata bago paman siya tuluyang makasakay sa barko.

Nabatid ayon kay SPO1 Alag na patay narin ang nanay ng bata at ang tatay ay nakatira sa Mararison, Antique.

Sinubukan ng tiya na makontak ang tatay ng bata pero hindi na ito sumasagot.

Sa ngayon ay nasa maayos nang kalagayan ang bata.

KAPITAN SA IBAJAY AKLAN ARESTADO SA PAGTUTULAK NG DROGA

ulat ni Archie Hilario, Energy FM 107.7 Kalibo

Arestado ang punong barangay ng Aquino, Ibajay sa ginawang buybust operation ng mga kapulisan sa brgy. Poblacion sa nasabing bayan kahapon ng hapon.

Sa report ng Aklan Police Provicial Office, nabilhan ng isang sachet ng pinaghihinalaang droga si punong barangay Rodel Cambarihan, 44 anyos, kapalit ng Php1,000 buy bust money.

Nakuha rin sa ginawang body search ang apat pang sachet ng parehong sangkap.

Napag-alaman na dadalo sana ng pagpupulong sa munisipyo ng Ibajay si Cambarihan nang maganap ang nasabing operasyon sa public plaza.

Nabatid sa report ng Ibajay PNP station na ang nasabing opisyal ay una nang sumuko sa pulisya sa umano’y paggamit ng iligal na droga.

Mariin namang itinatanggi ni Cambarihan ang alegasyong tulak siya ng droga. Matagal na umano niyang iniwan ang kanyang bisyo.

Ang operasyon ay sinagawa ng Provincial Drug Enforcement Unit, Aklan Public Safety Company, Ibajay PNP station, at Philippine Drug Enforcement Agency 6.

Pansamantalang nakakulong ngayon ang punong barangay sa Kalibo PNP station habang hinahanda na ang kasong paglabag sa RA 9165 na isasampa laban sa kanya.

LALAKING NANONOOD NG TV, BINARIL NG RIDING IN TANDEM SA IBAJAY

ulat ni Archie Hilario, Energy FM 107.7 Kalibo

Sugatan ang isang 44-anyos na lalaki matapos barilin ng riding in tandem bandang alas-8:24 kagabi sa brgy. Aquino, Ibajay.

Kinilala ang biktima sa pangalang Merlu Manokan, residente ng nabanggit na lugar.

Sa inisyal na imbestigasyon ng Ibajay PNP station, nakaupo umano ang biktima sa loob ng bahay ng pagbabarilin ng dalawang hindi pa nakikilalang lalaki sakay ng isang motorsiklo.

Ayon sa pulisya, narekober nila sa lugar ang apat na basiyo ng calibre .45.

Nakaconfine ngayon sa provincial hospital ang biktima matapos magtamo ng sugat ng pagbaril sa tiyan at daplis sa panga.

Inaalam pa ng pulisya ang motibo ng nasabing pamamaril at ang pagkakakilalan ng mga suspek para sa posibleng pag-aresto sa kanila.

1 PATAY; 9 SUGATAN SA KARAMBOLA NG SASAKYAN SA SAN ISIDRO, IBAJAY

Ulat ni Darwin Tapayan, Energy FM 107.7 Kalibo

photo (c) CTTO

Isa ang patay samantalang siyam ang sugatan sa karambola ng tatlong sasakyan sa kahabaan ng national highway sa brgy. San Isidro, Ibajay.

Kinilala ng Ibajay PNP station ang namatay na si Gelu Sumcad, 19 anyos at residente ng brgy. San Isidro driver ng motor sakay ang dalawang pasahero.

Ayon kay PO1 Jimmy Alcayde, umovertake umano si Sumcad dahilan para magkabanggaan ng kasalubong na motorsiklo na menamaneho ni Jerold Templonuevo, 32, ng Tabangka, Numancia, sakay ang tatlong pasahero.

Bumangga naman sa likod ng motorsiklo ni Templonuevo ang isa pang motor na menamaneho naman ni Joshua Castro, 18, ng Laguinbanwa, Numancia, sakay ang dalawang backrider.

Agad namang isinugod sa ospital ang mga biktima pero dineklarang dead on arrival sa Ibajay District Hospital si Sumcad matapos magtamo ng malubhang sugat sa ulo.

Hinihitay pa ng mga kapulisan ang disposisyon ng mga sangkot sa nasabing aksidente.

3 PAMILYA MULA MARAWI CITY, NAGBAKWIT SA AKLAN

Kinumpirma ng Ibajay municipal police station sa Energy FM Kalibo na tatlong pamilya mula Marawi City ang lumikas sa brgy. Aquino, Ibajay sa kasagsagan ng bakbakan doon.

Sa panayam, sinabi ni PInsp. Jose Ituralde, hepe ng Ibajay PNP, dumating umano ang mga nasabing pamilya noon pang Mayo 28.

Ayon sa kanya, si Joy Macadaag, tubong Ibajay, ay nakapangasawa ng taga Marawi at naninirahan na roon kasama ang kanilang mga anak.

Bago paman ang pagsilklab ng bakbakan sa Marawi ay umuwi na si Joy sa Ibajay para dumalo nang alumi homecoming pero hindi na nakabalik sa Mindanao dahil sa nangyari.

Nagdesisyon na lang sila at ang kanyang pamilya na pansamantalang manirahan dito sa Aklan.

Dinala rin ng asawa ni Macadaag ang dalawa niyang kapatid kasama ang kanilang pamilya.

Ayon kay Ituralde, sumailalim sa profiling ang mga evacuees na ito at pinasigurong patuloy ang kanilang monitoring sa mga pamilyang ito.

Balak naman umano ng mga magpapamilya na bumalik sa Marawi kapag humupa na ang kaguluhan roon.

14 ANYOS NA LALAKI PATAY MATAPOS MAAKSIDENTE ANG SINASAKYANG MOTORSIKLO

ulat ni Darwin Tapayan/ Joefel Magpusao, Energy FM 107.7 Kalibo

Binawian ng buhay ang isang 14 anyos na lalaki matapos maaksidente ang sinasakyang motorsiklo sa kahabaan ng barangay road sa Laguinbanwa, Ibajay dakong alas-2:00 ng madaling araw.

Kinilala ang biktima na si Reynante Placio, 14 anyos, residente ng brgy. Agdugayan.

Sakay umano ang biktima sa motorsiklo na menamaneho ng kanyang barkada na si Chander Alocilja, 21 anyos at kasama ang kapatid nito na si Jeremy Alocilja, 18 anyos, mga residente rin ng brgy. Agdugayan.

Galing umano ang mga ito sa bayan at pauwi na sana sa kanilang barangay nang pagdating sa kurbadang bahagi ng brgy. Laguinbanwa ay natumba ang sinasakyang nilang motorsiklo.

Nabatid na pawang mga nakainom ang tatlo.

Isinugod pa sa provincial hospital ang 14 anyos na biktima pero binawian rin ito ng buhay habang ginagamot rito matapos magtamo ng matinding sugat sa ulo.

Naka-confine parin sa ospital si Jeremy samantalang ang drayber ay nakukulong naman ngayon sa Ibajay municipal police station para sa kaukulang disposisyon.

52 ANYOS NA GURO PATAY NANG MABUNDOL NG VAN SA REGADOR, IBAJAY

ulat ni Darwin Tapayan, Energy FM 107.7 Kalibo

Patay ang isang 52 anyos na guro nang mabundol ng van sa national highway ng brgy. Regador, Ibajay kagabi.

Kinilala ang public school teacher at biktima na si Ellanes Ordas, residente ng nasabing lugar.

Sa report ng Ibajay PNP station, hindi umano agad namalayan ng driver ng van ang tumawid na biktima.

Galing ang pribadong van sa brgy. Caticlan, Malay patungong Kalibo na menamaneho ni John Remille Rubio, 34 anyos ng Poblacion, Malinao.

Sa panayam ng Energy FM Kalibo sa driver, may nakasalubong umano itong isang sasakyan na nakahigh ang ilaw kaya hindi na niya nakita ang tumawid na biktima.

Pinagtulungan naman ng mga tao sa lugar at ng driver na maisugod sa ospital sa Kalibo ang biktima pero dineklara itong dead on arrival.

Sumuko naman ang driver sa mga kapulisan at nakakulong na ngayon sa Ibajay PNP station.