Retiradong pulis nagsauli ng mahigit Php17,000 halaga ng pera na napulot

KALIBO, AKLAN - Isang retiradong pulis ang nagsauli ng malaking halaga ng pera sa pamamagitan ng Energy FM Kalibo Martes ng umaga.

Siya si SP02 Harold Maribojo  (retired police) ng Brgy Andagao, Kalibo. Nakita raw nito ang pouch sa labas ng Land Bank sa parking area at nakapatong ito sa motor na kanyang pagmamay-ari.

Kaya agad nitong isinauli dito sa himpilan.

Nang suriin walang anumang identication card na nakalagay sa pouch maliban sa pera na nagkakahalaga ng Php17,020 at resibo ng transaksiyon sa ATM ng nabanggit na bangko.

Ayon kay Maribojo first time niyang makaesperyensya nito.

Agad nakipag-ugnayan ang Energy FM Kalibo sa opisina ng bangko para matukoy ang may-ari ng pera kung saan ipinakita ng news team ang resibo para kanilang masuri.

Matapos ang verification process ng Land Bank Kalibo, nakilala ang may-ari na si Mario Rey Iquiña, Election Officer II ng Malinao, Aklan.

Pinuri, pinasalamatan, at hinangaan ni Mr. Iquiña ang katapatang ipinakita ni Retired SP02 Maribojo.##

- Kasimanwang Archie Hilario, Energy FM Kalibo

EXCLUSIVE: Mahigit Php150K ibinalik ng 14-anyos na batang Aklanon sa isang Chinese

KALIBO, AKLAN - Nagsauli ng napulot na bag ang isang 14-anyos na #HonestAklanon na pagmamay-ari ng isang Chinese National laman ang mahigit Php150,000 halaga ng pera.

Kinilala ang bata na si LJ Alejandro, residente ng Brgy. Pook, Kalibo at Grade 8 student sa Kalibo Institute. Habang ang may-ari ng pera ay si Yihe Yhong, lalaki, 33-anyos.

Nakita ng bata ang pera sa public CR sa bisinidad ng Kalibo International Airport. Kasama ang kanyang nanay ay isinauli nila ito sa airport police.

Kuwento ni LJ sa panayam ng Energy FM Kalibo, nakita umano niya ang bag na naiwan sa loob ng CR nang iihi sana siya. Ibinigay niya sa kanyang barkada ang bag dahil sa takot niya at humingi ng tulong sa kanyang ina.

Binalikan ito ng kanyang ina na si Jean at ibinalik nilang dalawa sa kapulisan. Ilang minuto lang ang nakalipas ay dumulog sa kapulisan ang may-ari.

Tuwang-tuwa ang Chinese national nang malamang naroon ang kanyang mga pera na kinabibilangan ng Philippine money at Yuan. Laman din ng bag ang iba pang gamit ng banyaga.

Nagpasalamat siya sa kabaitan ng bata at nagbigay ng pabuya sa kanya, sa kanyang ina at sa kanyang mga kaibigan.

Naganap ang insidente noong Hunyo 24 pasado alas-9:00 ng gabi.##

- Kasimanwang Darwin Tapayan, Energy FM Kalibo

Aklanon nagsauli ng Php25,000 at mga pasaporte ng magpamilyang Chinese

ISA NA namang Aklanon ang nagpamalas ng katapatan makaraang isauli niya ang pera at gamit ng isang banyaga.

Siya si Renan Pastrana, taga-Brgy. Cawayan, New Washington, empleyado ng 7-Eleven sa Kalibo International Airport.

Nabatid na naiwan ng magpamilyang Chinese ang isang bag sa nabanggit na convenient store nang makita ito ni Pastrana.

Dinala ni Pastrana ang bag sa aviation police sa naturang paliparan. Laman ng bag ang nasa Php25,000 halaga ng pera at tatlong pasaporte.

Napag-alaman na nakaalis na patungong Boracay ang magpamilya nang malaman nilang nawawala ang kanilang bag.

Binalikan ito ng tatay sa airport para maclaim araw na ng Linggo. Nagpasalamat naman ito sa katapang pinamalas ng Aklanon.

Natutuwa rin si Renan Balbastro, may-ari ng convenient store sa ginawa ng kanyang empleyado.##

- Kasimanwang Darwin Tapayan, Energy FM Kalibo

Aklanon sa Dubai nagsauli ng mahigit Php350,000 na naiwan ng kostumer sa pinagtratrabuhang coffee shop

[Update] ISANG AKLANON sa Dubai ang nagpamalas ng katapatan nang magsauli ito ng bag na naiwan ng isang Armanian National sa pinagtratrabuhang  coffee shop laman ang mahigit Php350,000.

Si Ralph Gregor Mopia ay tubong Ibao, Lezo at nasa apat na taon nang nagtratrabaho abroad. Baresta siya ngayon sa Caribou Coffee sa nasabing bansa.

Kasalukuyan siyang nasa trabaho nang mapansin niya ang bag na naiwan sa outside dining area ng coffee shop. Kinuha niya ito at ibinigay sa kanilang manager saka binuksan.

Kalaunan ay tumawag umano ang may-ari at nagtanong kung nandoon sa kanilang shop ang kaniyang bag. Binalikan ito kalaunan ng may-ari na si Artur Hayrapetyan na regular na pala nilang kostumer.

Laman ng bag ang 24,500 Dirham o pera ng UAE o katumabas ng nasa 357,500 Pesos. Kasama rin sa bag ang cellphone at passport ng may-ari  kaya gayon nalang ang kanyang pasasalamat sa Aklanon.

Dahil sa katapatan na ipinamalas niya sa trabaho ay binigyan siya ng reward ng kanyang kompanya.

"Bisan pobre basta may intigridad para ikapabugae ako sang asawa ag mga unga," mensahe niya sa isang chat conversation sa Energy FM Kalibo. "Eabi gid do mga taga-Ibao, Lezo ag ang mga pamilya una, taga-Aklan ag bilog nga Pilipino."

Nabatid na ang kanyang misis na si Cristina ay nagtratrabaho rin sa Dubai sa ibang coffee shop. Ang mag-asawa ay may dalawang anak na nag-aaral sa Kalibo Pilot Elementary School at sa Aklan Catholic College.

Si Kasimanwang Ralph ay dati nang nagtrabaho noon bilang nursing attendant sa Dr. Rafael S. Tumbukon Memorial Hospital saka naging lineman sa Aklan Electric Cooperative.

"Proud Aklanon da. Nagapasalamat gid ako sa mga Aklanon nga proud gid kakon," dagdag pa niya.##

- Kasimanwang Darwin Tapayan / Energy FM Kalibo

AKLANON BUS DRIVER PINARANGALAN NG LTFRB DAHIL SA PAGSAULI NG PHP200K CASH SA ISANG KOREANO

PINARANGALAN NG Land Transportation Franchising and Regulatory Board (LTFRB) 7 ang Aklanon tourist bus driver na si Ricardo Ratay dahil sa kanyang katapan.

Matatandaan na unang naibalita sa Energy FM Kalibo na ang 44-anyos na driver na taga-Kinalangay Viejo, Malinao ay nagsauli ng nasa Php200,000 na pera ng Koreano niyang pasahero.

Setyembre 3 nang makita ni Ratay ang wallet ng dayuhan sa kanyang menamanehong coaster. Ang foriegner ay nagbabakasyon sa Bohol kasama ang asawa kung saan nangyari ang insidente.

Agad na inireport ni Ratay ang insidente sa kanyang supervisor na si Daniel Pastrana para makontak ang foriegner bagay na naibalik sa may-ari na si Mark Dae Hyun ang nasabing wallet.

Bilang pasasalamat binigyan ng dayuhan ng Php1,000 ang coaster driver na pansamantalang inilipat ng Southwest sa Bohol mula sa Aklan dahil sa pagsasara ng Isla ng Boracay.

Nitong Lunes iginawad ni LTFRB 7 Director Eduardo Montealto Jr ang certificate of commendation sa Aklanon driver bilang pagkilala sa kanyang katapatan.##

- Darwin Tapayan, Energy FM Kalibo

TRICYCLE DRIVER NAGSAULI NG PITAKA NG KANYANG PASAHERO LAMAN ANG PHP24K

ISANG TAPAT na Aklanon, tricycle driver ang nagsauli ng pitaka na pinaniniwalaang naiwan ng isa niyang pasahero laman ang nasa Php24,000 halaga ng pera.

Kinilala ang driver na si Rexes Zapico Villorente, 30-anyos, tubong Brgy. Sibalew, Libacao at kasalukuyang nakatira sa Brgy. Andagao, Kalibo.

Maliban sa malaking halaga ng pera, laman din ng wallet ang mga ATM cards, mga ID, at iba pang mahahalagang mga dokumento.

Nabatid na ang wallet ay pagmamay-ari ni Mary Jane Asma, 32, residente ng Brgy. Tugas, Makato at guro sa Tibyawan Elementary School sa parehong bayan.

Ayon sa driver, isang pasahero ang nakakita ng nasabing wallet at ipinaalam sa kanya.

Agad siyang nagtungo sa police station ng Kalibo para isurender ang wallet ilang sandali lamang matapos nagpablotter din ang may-ari.

Nabatid na nasa tatlong taon nang nagdidrive ng tricycle si Villorente. May asawa ito at isang maliit na anak.

"Basta bukon akon sir nga kinabudlayan hay ginabalik ko gid ron," aniya sa panayam ng Energy FM Kalibo.

Naibalik na sa guro ang pera at labis itong nagpapasalamat sa katapan ng driver. "Sana dumami pa yong mga honest driver na gaya nya," sabi niya sa Energy FM.##

- Darwin Tapayan, Energy FM Kalibo

PHP24K IBINALIK NG TRICYCLE DRIVER SA ISANG MALAYSIAN NATIONAL SA PAMAMAGITAN NG ENERGY FM

Naibalik na sa Malaysian National na si Muhammad Syafiq ang bag na naiwan niya sa isang tricycle sa isla ng Boracay.

Matatandaan na ang bag ay dinala ni April John Flores sa Energy FM Kalibo. Siya ang driver ng tricycle na sinakyan ng foriegner sa isla ng Boracay.

Kabilang sa laman ng bag na ito ang passport ng turista, Php24,000, mga Malysian money, ATM cards at iba pang mahahalagang gamit.

Agad nakipag-ugnayan sa tanggapan ng pulisya sa Boracay ang himpilang ito at maging sa immigration gayunman wala silang impormasyon kaugnay sa foreigner.

Nakipag-ugnayan rin kami sa Yes FM Boracay (KBP member station) at saktong nasa tanggapan nila ang foriegner para manawagan sana hinggil sa nawawala niyang bag.

Ipinaalam namin na nasa himpilang ito ang kanyang bag. Agad naman siyang nagtungo rito sa Kalibo mula sa Boracay para makuha ang kanyang bag.

Bagaman hindi na nagkaharap ang dalawa, ipinaabot ng turista ang lubos niyang pasasalamat sa tricycle driver sa katapatang ipinamalas.

Nag-abot naman ng pabuya ang foreigner sa driver.

Kami sa Energy FM ay sumasaludo kay April John Flores sa katapatang ipinamalas niya sa bisita!

MGA MAHUHUSAY NA AKLANON, BINIGYAN NG PAGKILALA SA SANGGUNIANG PANLALAWIGAN

Ulat ni Darwin Tapayan, Energy FM 107.7 Kalibo

Ilang mga Aklanon ang sunod-sunod na nag-uwi ng karangalan sa probinsiya mula sa iba-ibang larangan ang kinilala sa Sangguniang Panlalawigan.

Sa regular session ngayong araw sa Sanggunian, binigyang pagkilala ng mga opisyal si Alyssa Kaye Visto matapos mag-ikaanim sa Radiologic Technologist Licensure Examination.

Nakatakda namang gawaran ng pagkilala sina:

1) Kathlen Sinag Paton ng Laserna, Nabas matapos tanghaling Miss Teen International 2017 sa Bangkok, Thailand nitong Setyembre;

2) Claire Calizo ng Colongcolong, Ibajay matapos magkamit ng bronze at silver medal sa swimming competition sa 9th Asean Para Games na ginanap sa Kuala Lumpur, Malaysia;

3) Russ Patrick Perez Alcedo bilang “Pinoy of the Year” sa larangan ng sayaw sa kauna-unahang Golden Balangay Awards, isang search para sa mga mahuhusay na Filipino-Canadian;

4) Karl Philip Lumio Avillo ng Poblacion, Kalibo na nag-top 3 sa katatapos lang na Physician Licensure Examination;

5) Eleonora Valentina Laorenza ng Polo, New Washington sa pagiging 2nd runner-up sa katatapos lang na (Eat Bulaga) Miss Millenial Philippines; at sina

6) Darlyn Lachica at Mark Niño Retiro, pawang mga taga-Kalibo matapos magsauli ng napulot na pera na nasa Php70,000.

Umaasa ang mga miyembro ng Sanggunian na sa pamamagitan nito ay marami pang Aklanon ang mahikayat at mabigyang inspirasyon na magsumikap sa pagkamit ng kanilang mga pangarap sa buhay.

PHP75K HALAGA NG PERA ISINAULI NG DALAWANG TAPAT NA MGA AKLANON

"Indi pagbueon do bukon it imo (Huwag kunin ang hindi sayo)".

Ito ang pumasok sa isipan ng dalawang Aklanon na ito matapos makakita at makapulot ng nasa Php75 libo halaga ng pera sa kalsada sa Kalibo.

Ang perang ito ay isinauli nina Darlyn Lachica, 27 anyos ng J. Magno st., Poblacion, Kalibo at Mark Niño Retiro, 24 anyos ng brgy. Andagao, Kalibo at pawang nagtratrabaho sa Aguila's Garment sa Kalibo Shopping Center.

Napulot umano nila ang mga bundle ng perang ito sa M. Lacerna st., Kalibo na katunayan ay nagkalat na ang mga ito.

Pinagpupulot umano nila ito at kalaunan ay inireport at ibinalik ito sa Kalibo Police Station.

Photo (c) SPO4 Reynaldo Macario
/ Kalibo PNP

Una rito ay nagparekord na sa tanggapan ng pulisya ang may-ari na si Teresita Rose ng brgy. Fulgencio, Balete.

Salaysay ni Teresita, ididiposito na sana niya ang nasabing pera sa bangko nang mapag-alamang bukas na ang dala niyang bag at nawawala ang Php80 libong pera na nahulog umano sa tricycle.

Pawang may pamilya ang dalawa at una umanong pumasok sa kanilang isip na huwag kunin ang hindi kanila at isauli agad ang nakita.

Sa inyo Darlyn at Mark saludo kami dito sa Energy FM Kalibo!

PERA NA NAPULOT NG BATA SA LOOB NG MALL NAIBALIK NA SA MAY-ARI

Ulat ni Archie Hilario, Energy FM 107.7 Kalibo

(Update) Naisauli na po ng batang si Allen Ross Ramos ang perang Php9 libo na napulot nito sa loob ng World of Fun sa Gaisano mall sa Kalibo.

Ang may-ari ng pera ay kinilala sa pangalang Joey laureano na taga-brgy. Cabilawan, Madalag. 

Dahil sa labis na tuwa inimbitahan nito ang bata kasama ang tita at mga pinsan na mananghalian sa isang fastfood restaurant. 

Matapos ang pananghalian bago tuluyang maghiwa-hiwalay ay inabutan ni Joey ng pera para pambaon sa pagpasok sa school.

Ayon kay Joey hindi nito inaasahang maibabalik pa ang pera. Kaya labis itong natuwa sa kabaitan at katapatan ng bata nawa ay tularan raw ito ng karamihan.

BATA NAGSAULI NG MALAKING HALAGA NG PERA NA NAKITA SA LOOB NG MALL

ulat ni Archie Hilario, Energy FM 107.7 Kalibo

Isang tapat na bata ang nagsauli ng malaking halaga ng pera matapos makita at mapulot sa loob ng isang kilalang mall dito sa bayan ng Kalibo.

Siya si Allen Ross Ramos, 10 anyos, na taga-Linabuan Norte, Kalibo, na nagpakita ng katapatan.

Dakong alas-6:00 umano kahapon ng hapon kasama ng kanyang tita at pinsan nagtungo sila sa World of Fun sa Gaisano para maglaro. 

Habang nasa lugar sila isang tatay na nakaupo sa isang bangko na nagbabantay rin sa anak na naglalaro, makikita sa CCTV, na dumukot sa kanyang bulsa . Hindi nito namalayan na nahulog ang perang Php9,000 na nakatupi.

Pagkatapos umalis ang lalaki patungo sa anak na naglalaro, dumating naman si Allen Ross at kausap nito ang mga batang pinsan, doon na nakita ang pera. 

Makikita sa cctv na nagulat ang bata, pero agad na dinampot ang pera at patakbong tumungo sa cashier at isinauli ang pera.

"Ang palaging bilin ng nanay at tatay namin paghindi amin wag naming angkinin," tugon ng bata ng tanungin ng news team.

FOREIGNER NAGPASALAMAT SA TAPAT NA DRIVER SA AKLAN NA NAGSAULI NG CELLPHONE

ulat ni Archie Hilario, Energy FM 107.7 Kalibo

Nagpost ng pasasalamat sa facebook  ang isang turista  na taga Doha Qatar dahil sa ipinakitang  katapatan ng drayber na Aklanon na nagsauli ng kanyang cellphone na naiwan sa isang tourist bus. 

Kinilala ang tapat na driber sa pangalang Ernesto Soco, matapos makita ay ibinigay nya raw ito kay  Francis Launio, kapwa driber ng Southwest Tourist bus. 

Sa facebook post ng Foreigner, kalakip ang larawang nakasaad ang ganito:

Edel Gangat and Francsis launio from southwest transportation located at Boracay island... I can't thank you enough for helping me retrieving my LOST phone!!!

To anyone traveling to Boracay island, I strongly recommend riding with southwest as they are really honest and respectful people. 

I might have never got my phone back if not for them. 

THANK YOU!!!

Nakapanayam namin si Edel Gangat at sinabi nito na siya ang nasa larawan, kwento nito na naiwan raw ng bisita ang cellphone nito sa bus. Hindi na raw umaasa noon ang turista na maibabalik pa ang kanyang cellphone, pero labis ang pasasalamat nito nang bumalik ang driber sa Caticlan para isauli ang nakitang cellphone.

Sinusubukan pa naming kunan ng pahayag ang tapat na drayber.

PHP20K NA PERA ATBPNG DOKUMENTO, NAPULOT AT IBINALIK NG ISANG KAP MEMBER

ulat ni Darwin Tapayan, Energy FM 107.7 Kalibo

Richard Cerezo

Masweteng napulot ng isang tapat na Kalibo Auxiliary Police (KAP) member ang isang wallet na naglalaman ng mahigit Php20,000 at iba pang mga dokumento sa gitna ng kalsada habang nasa kasagsagan ng trabaho Biyernes ng umaga.

Matapos mapulot ni Richard Cerezo, 42 anyos, ang nasabing wallet sa kanto ng Oyotorong st. at Roxas ave. ext. at malamang naglalaman ito ng malaking halaga ng pera ay walang anuman na dinala nya ito sa Kalibo police station.

Nang usisain, laman ng nasabing wallet ang 17 piraso ng Php1000, anim na Php500, isang Php100, at limang Php20. Maliban rito, naglalaman rin ito ng sari-saring government identification card na nakapangalan kay Isidro “Oris” Eulogio ng Ureta road, brgy. Andagao, Kalibo.

Sa panayam ng Energy FM Kalibo, ipinaabot ni tay Oris sa KAP member ang labis niyang pasasalamat sa pagkakabalik ng kanyang wallet at mga laman nito. Anya, nahulog ito habang sakay siya sa tricycle patungong hard ware shop para bumili sana ng mga materyales na gagamitin sa kanyang wilding shop.

Sinabi rin sa Energy FM ni Cerezo na wala siyang intensyon na angkinin ang hindi kanya at hindi rin naghahangad ng kapalit. Para sa kanya ginagampanan lamang niya ang kanyang trabaho at nanawagan sa kanyang mga kasama na tuluran ang kanyang ginawa.

Si Cerezo ay may limang anak at lahat nag-aaral.