MGA NATIONAL ISSUE PINAG-USAPAN SA MAKASAYSAYANG MEDIA FORUM SA AKLAN

ulat ni Darwin Tapayan, Energy FM 107.7 Kalibo

photo (c) Nida Lachica Gregas

Sumentro sa mga usaping pambansa ang mga topiko sa makasaysayang media forum sa Aklan na dinaluhan ng mga kilalang opisyal ng gobyerno.

Ang unang media forum na ito na ipinangalan sa yumaong dating kongresista ng Aklan na si Allen Quimpo ay dinaluhan ng nasa 200 katao mula sa media, estudyante, guro, mga opisyal ng lokal na pamahalaan, at iba pang sector.

Sa kanyang mensahe sinabi ni local government undersecretary John Castriones na ang pagresolba sa suliranin ng droga sa bansa ay trabaho ng lahat kabilang na ang mga ordinaryong tao.

Ayon kay Castriones, na simula ng maupo si pangulong Rodrigo Duterte, nasa 1.4 milyon na ang sumuko sa ilalim ng Oplan Tokhang. Ipinagmalaki rin niya ang pagpapatayo g mga rehabilitation center para sa mga surrenderers na ito.

Binigyag diin rin ni Castriciones na ang malaking tulong ang pederalismo sa Aklan.

Sa kabilang dako, sinabi naman ni tourism assistant secretary Frederick Alegre na ang Aklan ay nangunguna parin sa mga tourist destinations sa bansa at sa buong mundo.

Tinalakay naman ni dating senador Heherson Alvarez ang kahalagahan ng Paris Agreement kung saan hinikayat niya ang taumbayan na makipagtulungan para masulba ang problema sa climate change.

Ang media forum na ito ay inorganisa ng Aklan Press Club sa tulong ng iba pang organisasyon at ng lokal na pamahalaan ng Aklan. (PNA)

MAKASAYSAYAN MEDIA FORUM SA AKLAN PLANTSADO NA; MGA BIGATING BISITA KUMPIRMADONG DARATING

Ulat ni Darwin Tapayan, Energy FM 107.7 Kalibo

Plantsado na ang tinaguriang makasaysayang media forum sa probinsiya ng Aklan na binuo ng Aklan Press Club kasabay ng pagdiriwang ng pista ng San Juan.

Ang media forum na ipinangalan sa yumanong dating congressman ng Aklan na si Atty. Allen S. Quimpo ay dadaluhan ng mga kilalang personalidad na bihasa sa pagtalakay ng mga napapanahong isyu.

Ayon kay Odon Bandiola, presidente ng nabanggit na organisasyon, kabilang sa magiging tagapagsalita si chief legal counsel Salvador Panelo na tatalakay sa isyu ng martial law.

Dadalo rin umano bilang tagapagsalita si Department of Interior and Local Government undersecretary John Castriciones na tatalakay naman sa isyu ng federalism at anti-illegal drug’s campaign.

Tatalakayin naman ni Finance Secretary Carlos “Sonny” Dominguez III ang usapin sa Dutertenomics.

Ang libreng forum na gaganapin sa Aklan training ceter ay dadaluhan ng mga local at national media, mga estudyante at guro, mga opisyal ng pamahalaan at iba pang sector.

PANELO DARATING SA AKLAN PARA SA ISANG MAKASAYSAYANG MEDIA FORUM

Darating sa Aklan si presidential legal counsel adviser Salvador Panelo para sa isang makasaysayang media forum na inorganisa ng Aklan Press Club.

Ito ang kinumpirma sa Energy FM Kalibo ni Jhonny Dayang, chairman emeritus ng nasabing organisasyon.

Isa umano sa panauhing tagapagsalita si Panelo sa Allen Salas Quimpo memorial media forum na tatalakay sa paksa ng federalismo.

Si Panelo ay isang malapit na kaibigan ng yumaong si Atty. Quimpo, dating alkalde ng Kalibo at congressman ng Aklan. 

Si Quimpo ay kilalang tagapagtaguyod ng educational reforms, environment, press freedom, ASEAN economic integration, at humanitarianism.

Maliban kay Panelo, ang iba pang mga tagapagsalita ay bihasa sa mga paksa tungkol sa Dutertenomics, food security and agriculture, tourism, press freedom, martial law, climate change at environment. 

Gaganapin ang forum sa na dadaluhan ng mga lokal at national media, mga estudyante at mga opisyal ng pamahalaan sa Aklan training center sa Kalibo sa darating na Hunyo 24.

BAKHAWAN ECO-PARK, PINAPURSIGING IPANGALAN SA YUMAONG SI ATTY. QUIMPO

ulat ni Darwin Tapayan, Energy FM 107.7 Kalibo 

Pursigido ang Kalibo Save the Mangrove Association (KASAMA) na ipangalan sa yumaong si Atty. Allen Salas Quimpo ang  Bakhawan Eco-Park.

Ito ang kinumpirma sa Energy FM Kalibo ng kanyang anak at ngayon ay chairman ng asosasyon na si Allan Angelo Quimpo.

Sinabi ni Angelo na ngayon ay ginagamit na nila sa kanilang mga opisyal na komunikasyon ang pangalang Allen Salas Quimpo (ASQ) Bakhawan Eco-Park.

Sinabi rin ni Angelo na nakatakda naring palitan ang mga palatandaan sa mangrove forest park sa pangalan ng yumaong si Atty. Quimpo, tagapagtatag ng KASAMA at nagpasimula ng pagtatanim ng bakhawan sa nasabing lugar.

Sa ngayon ay nakikipag-ugnayan na umano sila sa Department of Environment and Natural Resources sa hakbang na ito.

Matatandaan na una nang isinulong ng lokal na pamahalaan ng Kalibo ang resolusyong nagpapangalan ng eco-park sa yumaong si Atty. Quimpo.

Gayunman iginiit ni Angelo na ang Bakhawan ay pinamamahalaan ng non-government organization at hindi ito saklaw ng pamahalaang lokal ng Kalibo.

MANGROVE PARK, STATE UNIVERSITY IPAPANGALAN SA YUMAONG SI ATTY. QUIMPO

ulat ni Darwin Tapayan, Energy FM 107.7 Kalibo

Maaaring ipangalan ang multi-awarded Bakhawan Eco-Park at Aklan State University sa yumaong si Atty. Allen Salas Quimpo.

Ito ang proposal ni Aklan Press Club chairman emeritus Juan “Johnny” Dayang sa kanyang naging mensahe sa isinagawang necrological service ng nabanggit na organisasyon para kay Atty. Quimpo kahapon ng umaga sa ABL Sport Complex.

Si Atty Quimpo ang nagpasimula ng pagtatanim ng bakhawan sa maputik na tabing-dagat sa Brgy. New Buswang noong 1990. Sa ngayon ay isa na itong reforestation site para makapigil sa pagbaha at storm surge sa komunidad.

Ang mangrove park na ito ay isa na sa mga matagumpay na reforestation project at nakatanggap ng ilang mga pagkilala sa UN.

Samantala, si Quimpo rin ang naging daan upang maitatag ang Aklan State University (ASU)  noong siya ay naglilingkod pa bilang kongresista. Ito rin ang dahilan kung bakit siya tinaguriang “Ama” ng nasabing eskwelahan (RA 9055).

Nabanggit rin ni Dayang ang kanyang proposal na ipangalan rin ang School of Mass Communication sa dating presidente ng Northwestern Visayan Colleges.

Paliwanag ni Dayag, ito ay isang paraan upang bigyang parangal at alalahanin ang mga nagawa ni Quimpo sa lalawigan.

Matatandaan na si Quimpo ay binawian ng buhay sa edad na 71 noong Disyembre 14 habang ginagamot sa sakit na pancreatic cancer sa isang ospital sa Manila. 

PAKIKIRAMAY SA NAIWANG PAMILYA NI ATTY QUIMPO, BUMUHOS

ulat ni Darwin Tapayan, Energy FM 107.7 Kalibo

Bumuhos ang pakikiramay sa naiwang pamilya ni dating kongresista at alkalde ng Kalibo na si Atty. Allen S. Quimpo bago siya inihatid sa kanyang huling huntungan ngayon araw.

Kahapon ay inilipat ang labi ni Atty. Quimpo sa ABL Sports Complex sa kapitolyo mula sa kanilang ancestral house. Dito ay sunud-sunod ang mga idinaos na necrological service ng iba-ibang grupo kabilang na ang lokal na pamahalaan ng probinsiya. Nagbigay-daan ito sa lahat na masilayan ang kanyang labi bago siya ilibing.

Kabilang sa mga dumalaw ay ang malapit na kaibigan na si Atty. Salvador Panelo, presedintial legal counsel adviser at dating kaklase sa University of the Philippines, sa isinagawang necrological service ng Aklan Press Club sa kanilang yumaong legal adviser.

Nagsagawa rin ng hiwalay na necrological service ay munisipyo ng Kalibo, at Joycees club.

Nagpaabot rin ng kani-kanilang resolusyon ng pakikiramay sa pamilya ang mga opisyal ng mga lokal na pamahalaan. 

Sa kanya namang mensahe, malaki ang pasasalamat ni governor Florencio Miraflores sa itinuturing na niyang kapatid na aniya marahil ay wala siya sa politika kung wala si Atty. Quimpo.

Si Atty. Quimpo ay inilibing ngayong araw sa Medalla Milagrosa cemetery makaraan ang huling mesa para sa kanya na idinaos sa St. John the Baptist Cathedral.

FUNERAL MASS IDARAOS PARA KAY ATTY. QUIMPO SA BIYERNES

ulat ni Darwin Tapayan, Energy FM 107.7 Kalibo

Nakatakda isagawa ang isang funeral mass sa darating na Biyernes para sa dating kongresista at dating alkalde ng Kalibo na si Atty. Allen S. Quimpo. Gaganapin ito sa St. John the Baptist Cathedral, Poblacion, Kalibo dakong alas-9:00 ng umaga.

Pagkatapos ng misa ay nakatakda siyang ilibing sa Medalla Milagrosa Cemetery sa Kalibo.

Ang labi o abo ng namayapang si Atty. Quimpo ay nakahimlay ngayon sa kanilang ancestral house kalapit ng NVC Carmen hotel.

Samantala, sa araw naman ng Huwebes ay may gaganapin ring Requiem Mass at Necrological Service sa ABL Sports Complex sa kapitolyo banda alas-8:00 ng umaga.

Inaasahan na dadaluhan ito ng mga Northwestern Visayan Colleges (NVC) alumni, faculty and staff at mga estudyante.

Si Atty. Quimpo ay naglingkod na presidente ng NVC bago siya pumanaw sa edad na 71 sa sakit na pancreatic cancer nong Disyembre 14.

Bago paman siya binawian ng buhay ay gumaganap na ang kanyang anak na si Allan Angelo Quimpo, NVC human resource officer, bilang kahalili niya.

ENERGY SPECIAL REPORT: KUNG PAANO NAGING DOCTOR SI ATTY. ALLEN S. QUIMPO

ulat ni Darwin Tapayan, Energy FM 107.7 Kalibo

Marami parin ngayon ang nalilito kung bakit tinatawag na doctor si Atty. Allen S. Quimpo. Paano nga ba siya naging doctor?

Dahil sa mga hindi matatawarang naiambag sa taumbayan, si Atty. Quimpo ay ginawaran ng Doctor of Humanities o Honoris Causa ng Aklan State University (ASU) noong nakaraang Marso 31, 2015. Ginawa ito sa kasagsagan ng Commencement Exercise ng ASU Banga Campus sa kanilang Ampi Theatre.

Napag-alaman na sa buong bansa ay dalawa lamang siya na nagawaran ng ganitong pagkilala. Ang isa pa ay ang batikanang brodkaster na si Jessica Soho.

Sa panayam ng tagapagsulat na ito noong nabubuhay pa siya, sinabi ni Atty. Quimpo na malaki ang pasasalamat niya sa mga taong  binibigyang halaga ang kanyang mga ginagawa. Paliwanag niya na marahil malaki ang pagkilala ng ASU sa kanyang mga nagawa bikang Chairman of Education sa kongreso. Sinabi niya na sa pamamgitan niya ay naitatag ang ASU.

Naniniwala siya na ang “Pilipino ay magaling na lahi, mamtalinong lahi”. Ang bansa anyang ito ay isa sa mga pinakamayaman bansa sa buong mundo. “Kung hindi man naging maganda ang kalagayan natin ngayon, it was due to depicts in policies, hindi sa nature o character natin,” paliwanag pa niya.

Sa kung anong dapat itawag, sinabi niya na maaari siya tawaging doctor sa akademikong katungkulan niya pero pwede siyang tawaging attorney sa kakayahan niyang maglingkod sa mga tao. Sinabi pa nito na wala namang problema kung sa kung ano ang itawag sa kanya.

Si Quimpo ay nagtapos sa University of the Philippines kung saan niya nakamit ang degre sa abogasiya.

ABO NG NAMAYAPANG SI ATTY. QUIMPO, IUUWI SA AKLAN SA SABADO

Sumailalim na sa cremation ang labi ng namayapang si Atty. Allen Salas Quimpo kahapon ng hapon.
Matapos ang cremation ay inilagak sa Christ the King Parish sa Quezon City ang mga abo ng namayapang dating kongresista ng Aklan at mananatili dito hanggang bukas, Disyembre 16.

Nakatakda namang iuwi dito sa Kalibo, Aklan ang mga abo ni Atty. Quimpo sa Disymebre 17, araw ng Sabado.

Matatandaang binawian ng buhay ang dating kongresista kahapon, Disyembre 14, bandang alas-2:00 ng madaling araw habang nasa isang ospital sa Metro Manila sa edad na 71-anyos dahil sa pancreatic cancer.

Naulila nito ang kanyang asawa, limang anak, mga apo at mga kapatid.

Si Atty. Quimpo ay dating naglingkod bilang presidente ng Northwestern Visayan Colleges (NVC) at nagsulong upang mabuo ang Aklan State University.

Siya rin ay naging alkalde ng Kalibo noong 1990 at naging kongresista noong 1992 hanggang 2001, at isa sa mga nagtatag ng political party na TIBYOG Aklan.

Nagsilbi din ito bilang dating chairman ng Kalibo Save the Mangrove Association (KASAMA).