Baye nga ginnabdusan ag gintalikdan it eaki naeuwas sa hana nga pagpakamatay

photo https://scandallas.wordpress.com

[Special Report] - Naeuwas sa kamatayon ro sangka baye sa banwa it Numancia matapos nga imaw ra hay mag-inom it bleach para tapuson ro anang kabuhi bangod sa problema sa paghigugma.

Suno sa 21-anyos nga baye, na-depress imaw it tuman tag owa magpakita ro eaki ag ro pamilya para mag-atubang sa ana nga pamilya matapos nga imaw hay magnabdos.

Adlaw nga Dominggo kunta ro kasugtanan it daywa ugaling wa gid mag-abot ro eaki ag ro anang mga ginikanan ag indi eon raya makontak.

Pagkagabii hay nag-inom it bleach ro baye sa sueod ku anang kwarto. Lipong imaw nga gindaea sa sangka pribado nga ospital sa Kalibo ag na-confine.

Nahisayuran nga Martes paeang ku nagtaliwan nga sangdominggo hay nakaagi eon it depresyon ro baye ag makapilang beses eon nga naghana nga magpakamatay ugaling napugngan it anang pamilya.

Gindugo ro baye ag aksidente nga nahueog ro unga.

Nasayuran pa nga masobra tatlong dag-on eon do baye ag ro 18-anyos nga eaki sa anda nga relasyon. Nasayuran eon sigon it andang pamilya ro andang relasyon pero ginatagu-tago ro pagnabdos it baye.

Daya nga istorya hay gindangop it baye sa Energy FM Kalibo agud ipapanawagan ro anang nobyo ag ro anang pamilya. Bukas pa gihapon kuno imaw sa kon ano nga pwede nanda maging kasugtanan.

Suno sa baye malisdan imaw nga maka-move-on bangod sa mabuhay nanda nga pag-iliba it eaki nga nagatuon pa makaron bilang first year college.

Do baye hay graduate eon bag-o eang sa kurso nga education.

Gintinguhaan namon nga makontak ro eaki ag ro anang pamilya para mabue-an it pagpahayag pero unatteded ukon out of coverage pa ro mga linya it andang mga cellphone.##

- report ni Kasimanwang Darwin Tapayan, Energy FM Kalibo