Sambilog patay sa banggaan it pampasahero nga van ag multi cab sa banwa it Nabas

PATAY RO sangka eaeaki matapos bumangga ro ana nga ginamaneho nga multi-cab sa sangka pampasaherong van sa Buenasuerte, Nabas kaina it aga-aga.

Ginkilaea sa report it kapulisan ro namatay nga si Jhonald Amacio y De Asis, 29-anyos, residente it Brgy. Gibon sa parehas nga banwa.

Sakay sa nasambit nga multi-cab ro daywa pa. Halin ra sa banwa it Malay paadto it Kalibo nga direksyon tag makabangaan ro sangka pampasaherong van halin sa pihak.

Ginkilaea ro driver it van nga si Redzel Berdonar y Tumbukon, 38, residente it Toledo, Nabas. Sakay na ro tatlo ka pasahero kaibahan eon ro daywa ka mga Koreano nga magabakasyon kunta sa Isla it Boracay.

Parehos nga ginpangdaea sa ospital ro mga driver ag sakay it mga nasambit nga saeakyan. Masubo nga ro driver it multi-cab hay owa makahingabot nga buhi bangod sa grabe nga lastro sa eawas.

Sa paghinakop man eon it kapulisan ro driver it van samtang nagapadayon pa ro imbestigasyon sa insidente.##

- report ni Kasimanwang Darwin Tapayan, Energy FM Kalibo