KOLUROM NA TRICYCLE TUMAKAS SA POLICE CHECKPOINT, NADISGRASYA 3 PASAHERO NASUGATAN

Sugatan ang tatlong pasahero kasama ang isang taong gulang na bata matapos tumaob ang tricycle na ito.

Sa imbestigasyon ng traffic division ng Kalibo PNP nagsasagawa raw ng checkpoint ang mga otoridad sa Mabini St. nang mapadaan sa lugar ang tricycle, sa halip huminto ay pinaharurot nito ang tricycle.

Hinabol siya ng PNP hanggang sa makarating sa bahagi ng M. Laserna kung saan tumaob ang tricycle. Pagkataob ay sinubukan pa raw ng driver na si Leofe Mijarez na takasan ulit ang mga pulis.

Naisugod naman agad sa hospital ang mga pasahero.

Nakakulong naman sa Kalibo PNP ang suspek. | Archie Hilario, EFM Kalibo

5 YEARS OLD NA BABAE NABUNDOL NG TRICYCLE SA MALAY, PATAY

ulat ni Darwin Tapayan, Energy FM 107.7 Kalibo

Patay ang isang 5-anyos na batang babae makaraang mabundol ng tricycle sa brgy. Balusbos, Malay.

Kinilala ang biktima na si Daniela Kate Tad-y, residente rin ng nasabing lugar.

Ayon sa report ng Malay PNP, kinilala ang driver na si Rodelio Galay, 45 anyos, residente ng Poblacion, Malay.

Kuwento ng driver, nakasalubong nya ang isang sasakyan nang biglang tumawid ang bata mula sa kaliwang bahagi ng kalsada.

Isinugod pa sa Motag hospital ang bata pero dineklara ring dead on arrival ng attending physician.

Sumuko naman ang driver sa mga kapulisan at nakakulong na ngayon sa Malay municipal police station.

Posibleng maharap sa kasong reckless imprudence resulting to homecide ang driver.

MOTORSIKLO SUMALPOK SA POSTE SA BAYAN NG NUMANCIA; DRIVER PATAY

ulat ni Darwin Tapayan / Joefel Magpusao, Energy FM 107.7 Kalibo

Patay ang 24-anyos na lalaki nang sumalpok ang menamanehong motorsiklo sa poste sa brgy. Laguinbanwa East, Numancia ala-1:00 ng madaling araw kanina.

Kinilala ang biktima si Rannie Fernando y Mortalla, 24 anyos, residente ng brgy. Dongon West, Numancia.

Ayon sa inisyal na report ng Numancia PNP, binabaybay ng biktima ang kahabaan ng national highway mula Poblacion, Numancia patungong Kalibo.

Nawalan umano ng kontrol ang biktima at bumangga sa konkretong poste sa kurbadang bahagi ng kalsada sa pinangyarihan ng aksidente.

Naisugod pa sa provincial hospital ang lalaki pero dakong alas-4:00 ng umaga ay binawian rin ng buhay dahil sa malubhang sugat na tinamo sa ulo.

Sa tindi ng pagbangga, wasak ang unahang bahagi ng motorsiklo at pansamantalang nasa disposisyon ngayon ng mga kapulisan.

MOTORSIKLO BUMANGGA SA BAKA, 2 SUGATAN; BAKA, PATAY

Dalawang motorista ang sugatan matapos bumangga ang sinasakyang motorsiklo sa isang baka sa national highway ng brgy. Laguinbanwa East, Numancia.

Kinilala ang mga biktima na sina Niel Narciso at Melanio Tambong, kapwa bente-uno anyos, magpinsan at mga residente ng Cayangwan, Makato.

Sa imbestigasyon ng Numancia PNP, pasado ala-1:00 ng madaling araw ay binabaybay ng dalawa ang kahabaan ng national highway mula Kalibo pauwi sa kanila nang bigla umanong tumawid ang isang batang baka kung kaya’t nabangga nila ito.

Nabatid na tumilapon ang dalawa at nagtamo ng matinding sugat sa ulo ang back rider na si Melanio Tambong. Patay naman ang baka na tinatayang nasa dalawang buwang gulang.

Isinugod sa provincial hospital ang dalawa kung saan na-confine ang backrider, samantalang outpatient naman ang driver.

Ayon din sa report ng pulis, nakatali ang ina ng batang baka sa gilid ng kalsada.

Nakilala naman ang may-ari ng baka na si Jose Gonzales, 51 anyos ng Bulwang, Numancia.

Pinabulaanan niya na siya ang nagtali ng baka malapit sa kalsada.

Pansamantalang nasakustodiya ng Numancia PNP ang lalaki para sa kaukulang disposisyon.

12 ANYOS NA BABAE NABUNDOL NG BUS SA BAYAN NG NABAS

ulat ni Darwin Tapayan, Energy FM 107.7 Kalibo

Nabundol ng rumaragasang bus ang isang 12 anyos na babae sa national highway sa brgy. Rizal, Nabas.

Kinilala ang nasabing biktima na si Nadine Colindon, residente  rin ng nasabing lugar.

Ayon sa report ng Nabas municipal police station, tumawid umano ng kalsada ang biktima kasama ang pinsan matapos makalagpas ang isang bus nang hindi namalayan na may kasunod pa pala itong isa ring bus.

Agad na nakaiwas ang kanyang pinsan pero dahil sa gulat ay hindi na nakaalis sa gitna ng kalsada ang biktima at nabundol ito ng sasakyan.

Nagtamo ng malubhang sugat sa ulo ang dalaga at nabatid na dinala na ito sa isang prominenteng ospital sa Iloilo para sa intensibong paggamot.

Sumuko naman sa kapulisan ang lalaki at ikinulong sa Nabas municipal police station at posibleng maharap sa kaukulang kaso.

KALIWA’T KANANG AKSIDENTE SA KALSADAHIN SUMAILALIM SA IMBESTIGASYON NG SP-AKLAN

ulat ni Darwin Tapayan, Energy FM 107.7 Kalibo

Sumailalim na sa pagdinig ng Sangguniang Panlalawigan ng Aklan ang kaliwa’t kanang mga aksidenteng nangyayari sa mga kalsadahin sa probinsiya na nagiging dahilan ng kamatayan ng iba.

Sa kanyang ulat sa plenaryo, sinabi ni SP member Nemisio Neron, na karamihan umano sa mga naaaksidente ay mga nagmamanehong lasing at hindi sumusunod sa mga batas-trapiko.

Nabanggit din sa kanyang committee report na may kakulangan rin ang Department of Public Works and Highway (DPWH) sa paglalagay ng mga safety reminders at signages. Plano na rin umano ng DPWH na maglagay ng signages na “slow moving vehicle, keep right” para sa mga four lane na kalsada.

Aminado rin anya ang pamunuan ng Land Transportation Office (LTO) na hindi sila nagiging istrikto sa pagpapatupad ng batas-trapiko dahil narin anila sa kakulangan ng mga law enforcers nila.

Una na itong sumailalim sa pagdinig noong Pebrero 20 na pinangunahan ng committee on public works, housing, land use and urban relocation at ng committee on energy, public utilities, transportation and communications.

Sa kabilang banda, pasado na sa Sanggunian sa unang pagbasa ang panukalang batas na inihain ni SP member Jay Tejada na nagtatakda ng mga pulisiya sa road accident prevention at safety awareness scheme, at pagbuo ng task force kaugnay sa implementasyon nito.