Pasyente na may mental illness tumakas sa ospital, tumalon sa tulay

Kalibo-Numancia bridge / file photo by Kas Darwin  Tapayan

ISANG LALAKI ang tumalon sa tulay kagabi sa Kalibo-Numancia bridge matapos tumakas sa Dr. Rafael S. Tumbokon Memorial Hospital.

Batay sa hospital report ni Kasimanwang Joefel Magpusao, nariscue ng mga residente ang 38-anyos na lalaki at agad ibinalik sa ospital.

Nabatid na ang lalaki ay nakakaranas ng mental illness at una nang isinugod sa ospital matapos maglaslas sa tiyan kahapon sa kanilang residensya sa Makato.

Subalit ilang sandali lamang matapos itong maconfine ay tumakas umano nang hindi namalayan ng kaniyang pamilya at ng mga staff ng hospital. Huli nalang nalaman na tumalon na ito sa tulay.

Nabatid pa na una na itong tumalon sa tulay sa kanilang barangay sa Makato pero nailigtas rin.

Posible umanong dalhin nalang sa mental health center sa Pototan, Iloilo ang nasabing lalaki.##

Pasyente, bantay tinakawan it 2 ka cellphone sa Provincial Hospital

TINAKAWAN IT daywa ka cellphone ro sangka pasyente ag bantay it iba pang pasyente sa Dr. Rafael S. Tumbukon Memorial Hospital.

Ginkilaea ro mga tinakawan nga sanday Kimberly Ordas, pasyente, ag Alex Valencia, bantay it pasyente.

Suno kay Kimberly, naka-charge kuno ro daywa nga cellphone sa idaeom it anang folding bed sa hall way it medicare ward kabii.

Habugtaw kuno imaw kaina it agahon tag mapa-uhan na ag pati man ro anang mama ag papa nga naduea eon ro mga nasambit nga cellphone.

Ginaimbestigahan eon it mga guwardiya it hospital ro nasambit nga insidente pati man ku Kalibo PNP.##

- Kasimanwang Darwin Tapayan, Energy FM Kalibo

Mahigit Php2 billion budget ng Aklan lusot na sa komitiba ng Sangguniang Panlalawigan

Energy FM Kalibo photo

LUSOT NA sa Committee of the Whole ng Sangguniang Panlalawigan araw ng Martes ang pag-apruba sa Php2,045,746,825 annual budget sa susunod na taon 2019.

Ayon kay SP Acting Secretary Josefa Elena Martin ang budget sa 2019 ay mas mataas ng siyam na porsyento o Php184 million kumpara sa kasalukuyang taon.

Sa susunod na regular session ng Sanggunian ay isasalang na sa ikalawa, ikatlo at huling pagbasa ang ordinansa kaugnay rito. Inaasahan na maaaprubahan ito bago magbakasyon ang mga opisyal.

Nabatid na sa kabuuang budget, 53 porsyento (Php1,096,246,825)  ang mula sa Internal Revenue Allotment, walong porsyento ang galing sa Tax and Non-Tax Revenue (Php158,350,000) – mas mataas ng 11 porsyento kumpara sa taong 2018.

Habang ang natitirang 39 porsyento (Php791,150,000) ay mula sa Economic Enterprise. Mas mababa umano ito ng walong porsyento sa 2018 budget sanhi ng anim na buwang pagsara sa Isla ng Boracay.

Sinabi ni Vice Gov. Boy Quimpo na sa kabuuang budget 40 porsyento ang ilalaan para sa serbisyo pangkalusugan o katumbas ng Php817,055,889.

Sinabi pa niya na aabutin pa ng nasa dalawang taon bago makabawi ang gobyerno probinsiyal sa pagbaba ng pondo ng Economic Enterprise Development Department dahil sa pagsara ng Boracay.

Sa lahat ng budget allotment, pinakamalaki ang mapupunta sa pamamalakad ng Dr. Rafael S. Tumbukon Memorial Hospital, sweldo sa mga tauhan at iba pang gastusin – Php448,037,011.

Pangalawa ang tanggapan ng gobernador sa may pinakamalaking ilalaang pondo -- Php308,442,875.25.##

CHIEF OF HOSPITAL NAG-INHIBIT SA IMBESTIGASYON NG MAGPUSAO VS DR. MAGHARING CASE

NAG-INHIBIT SI Dr. Paul Macahilas, chief of Dr. Rafael S. Tumbokon Memoral Hospital, sa pag-iimbestiga ng reklamo ni Kasimanwang Joefel Magpusao kontra kay Dr. Karen Magharing.

Ito ang isinaad ni Macahilas sa kanyang sulat-tugon kay Magpusao sa pagfollow-up ng kanyang reklamo. Paliwanag ng chief of hospital, ang hakbang na ito ay para maiwasan umano ang biases.

Sa halip idinulog niya ang reklamo ng Energy FM Kalibo reporter na si Magpusao at ang sagot ni Dra. Magharing sa tanggapan ng gobernor sa pamamagitan ng provincial administrator para sa imbestigasyon.

Matatandaan na inireklamo ni Magpusao ang doktora nang pambabastos sa kanya sa loob ng hospital habang nagsasagawa ng imbestigasyon sa pagkamatay ng isang sanggol.

Ayon sa reporter dinuru-duro di umano siya ng doktora at pinatatawagan ng guwardiya - mga bagay na mariing pinabulaanan ng doktora sa inihain niyang affidavit.

Ang sulat-tugon ni Macahilas ay ipinadala rin sa Civil Service Commission kung saan una nang nagpadala ng kanyang reklamo si Magpusao.##

HOSPITAL STAFF PINABULAANAN ANG ALEGASYON NG GUWARDIYA

PINABULAANAN NI Larry Gerardo, hospital staff ng Dr. Rafael S. Tumbokon Memorial Hospital ang alegasyon na minura at tangka niyang suntukin ang guwardiya na si Archie Cañete.

Ayon sa dental aide dumating umano siya sa entrance ng ospital na masama ang tingin sa kanya ng guwardiya at pinagsabihan niya ito. Hindi umano totoong nagtangka siyang suntukin si Cañete.

Naganap ang insidente umaga ng Huwebes. Ang pangyayari ay ipinarekord ng guwardiya sa Kalibo police station.

Paniwala ni Gerardo, nag-ugat ang sama ng loob ng guwardiya sa kanya noong Agosto 17 nang pababa na siya sa tricycle sa harap ng Emergency Room ng ospital.

Muntikan na umano siyang madisgrasya nang pag-apak ng kanyang isang paa mula sa tricycle para bumababa ay biglang pinituhan ng guwardiya ang tricycle dahilan para umarangkada ito.

Maswerte aniyang nakahawak siya sa bubong ng tricycle at pagbaba ay kinompronta niya ang guwardiya. Sabi umano ng guwardiya sa kanya bawal ang bumaba doon.

Katwiran naman niya bakit hindi sinita ng guwardiya ang mga kotse na nagpapark doon sa lugar. Sinabihan umano niya ng guwardiya na ayusin ang kanyang trabaho.

Ipanarekord narin niya ang kanyang bersiyon sa Kalibo PNP Station habang ang kaso ang inirefer ng kapulisan sa pamunuan ng ospital.##

- Darwin Tapayan, EFM Kalibo

STAFF SA PROVINCIAL HOSPITAL INIREKLAMO NG GWARDIYA MATAPOS SIYANG MURAHIN, TANGKANG SUNTUKIN

NAGREKLAMO SA kapulisan ang isang guwardiya sa provincial hospital makaraang murahin umano siya at tangkang suntukin ng isang staff sa dental clinic ng parehong ospital.

Salaysay ni Archie Cañete, 38-anyos, residente ng Brgy. Tigayon, Kalibo naganap ang insidente umaga ngayong araw ng Huwebes sa entrance ng ospital.

Reklamo ng guwardiya, dumating umano si Larry Gerardo at pinagwikaan siya ng "ang sama ng tingin mo sa akin. Gag* ka!" nang walang malamang dahilan. Tinangka pa umano siyang suntukin.

Hindi umano ito pinansin ng guwardiya sa kabila na napahiya ito.

Kinuwento pa niya na noong Agosto 17, habang nag-aassist siya ng trapiko sa harap ng Emergency Room pinituhan di umano niya ang isang tricycle kung saan sakay si Gerardo. Nagalit umano ang hospital staff at nagsabing “bil*t in* mo ka ha! Dali lang ay mabalik ako!"

Makaraang magtime-in si Gerardo binalikan umano niya ang nagrereklamo at dinuru-duro sinasabing “ayusin mo ang trabaho mo dito!”

Inirefer ng Kalibo PNP ang kaso sa pamunuan Dr. Rafael S. Tumbukon Memorial Hospital.##

- Darwin Tapayan, Energy FM Kalibo

DR. MAGHARING PINABULAANAN ANG REKLAMO SA KANYA NI MAGPUSAO; MAGSASAMPA NG KASO SA PAGPAPARATANG SA KANYA

Naglabas na ng sinumpaang-salaysay si Dr. Karen Magharing kaugnay ng reklamo ni Kasimanwang Joefel Magpusao, reporter ng Energy FM Kalibo.

Matatandaan na una nang naibalita na inireklamo ni Magpusao si Dr. Magharing sa pamunuan ng Dr. Rafael S. Tumbokon Memorial Hospital sa umano’y pambabastos sa kanya at sa reporter na si Romy Cahilig ng Brigada News FM Kalibo.

Mariing pinabulaanan ni Magharing na hindi umano niya binastos si Magpusao.

Sa affidavit ng doktora, isinalaysay nito na binati niya lamang si Magpusao ng, "Uy, dito na naman kayo. ‘Di ba ikaw si Magpusao? ‘Di ba taga-Ibajay ka rin? Magkababayan pala tayo.” Maayos at pangiti niya din umano itong sinabi sa reporter.

Hindi rin umano niya dinuru-duro si Magpusao kagaya ng reklamo ng reporter. Maayos umano niyang kinuwestiyon ang reporter kung bakit ito magsasagawa ng pag-interview ng walang pahintulot sa management ng ospital.

Sinabi pa niya na si Magpusao ang nagtaas ng boses sa kanya.

Anya, para sa kanya ay wala siyang ginawang mali kaya ganoon na lang ang kanyang pagkagulat ng maibalita sa ilang radio stations sa probinsya at maging sa mga social media ang reklamo ni Magpusao. Partikular niyang pinangalanan ang Energy FM Kalibo at ang Todo Radyo.

Magsasampa umano siya ng kaso sa mga sangkot sa pag-aakusa sa kanya ng walang katotohanan at sa pagsasapubliko ng mga paratang.##

- Darwin Tapayan, Energy FM Kalibo

MGA REPORTER NA MAG-IINTERVIEW "BINASTOS" NG DOKTORA SA AKLAN PROVINCIAL HOSPITAL

Dinuru-duro ng isang OB-Gyn at binantaan pa na tawagan ng guwardiya sa loob ng provincial hospital.

Ito ang naranasan ng reporter ng Energy FM Kalibo at hospital beat reporter na si Joefel Magpusao.

Saksi rin sa parehong karanasan si Romy Cahilig, reporter ng Brigada News FM.

Ang dalawa ay mag-iinterview sana sa doktora na nagpaanak upang mag-imbestiga sa namatay na sanggol batay sa reklamo ng isang ina.

Habang nasa nurse station ay dinuru-duro umano sila ni Dr. Karen Magharing at pinatatawagan ng gwardiya.

Aminado si Magpusao na nagkaroon umano sila ng sagutan ng doktora kalaunan. Iginiit niya na maayos ang kanilang pagtungo roon.

Sa panayam ng Energy FM Kalibo, sinabi ng reporter na si Cahilig na hindi niya nagustuhan ang pag-uugali ng doktora.

Matatandaan na una nang inireklamo sa himpilan ding ito si Magharing ng malpractice dahil sa pagkamatay ng isang baby.

Idinulog na ni Magpusao ang nangyaring "pambabastos" ni Magharing sa kanila bilang media sa Kapisanan ng mga Brodkaster ng Pilipinas - Aklan Chapter.

Pormal rin umano niyang irereklamo sa pamunuan ng ospital ang nasabing doktor. | EFM Kalibo