Panibagong pier sa Caticlan Jetty Port itatayo mula sa utang ng probinsiya sa bangko

MAGTATAYO NG panibagong pier ang gobyerno probinsyal ng Aklan sa Caticlan Jetty Port mula sa utang sa Land Bank.

Sa pagdinig araw ng Martes sa Sangguniang Panlalawigan, kinumpirma ni Provincial Engineer Ederzon Magalit ang konstruksyon ng nasabing pier.

Aniya manggagaling ang pondo sa proyekto sa Php300 million sa kabuuang Php420 million na uutangin ng gobyerno probinsyal sa nabanggit na bangko.

Sumailalim na aniya sa bidding process ang proyekto at ang nanalo ay ang IBC company sa contract amount na Php176,800,000 para sa phase 1 ng proyekto.

Sinabi ni Jetty Port administrator Niven Maquirang na ang pagtatayo ng panibagong pier para sa mga RoRo vessels ay mahalaga sa industriya ng turismo sa probinsiya.

Kinuwestiyon naman nina Board Member Atty. Harry Sucgang at Atty. Noly Sodusta ang paglalaan ng panibagong pondo sa pag-sasaayos ng Caticlan at Cagban Port mula naman sa planong utangin sa Development Bank of the Philippines.

Pero ayon kay Maquirang wala pang plano para sa iba pang improvement sa mga port na ito bagaman kasama ito sa posibleng pondohan ng uutanging Php1 billion mula sa DBP.

Inaprubahan ng Committee of the Whole ang kahilingan ng gobernador sa affirmation ng naturang proyekto.##

MAS PINAGANDANG CAGBAN PORT BUBUNGAD SA MGA TURISTA SA PAGBUBUKAS NG ISLA NG BORACAY

ISANG MAS pinagandang Cagban Jetty Port ang sasalubong sa mga turista sa pagbubukas ng Isla ng Boracay sa darating na Oktobre 26.

Ayon kay Department of Environment and Natural Resources (DENR) USec. Benny Antiporda, magiging highlight ng Boracay Soft Opening ang ribbon cutting ng bagong mukha ng port.

Sa isang pagkakataon, ipinasilip ni Caticlan-Cagban Jetty Port Administrator Niven Maquirang sa Energy FM Kalibo ang pagpapaganda at pagsasaayos ng nabanggit na port isang linggo bago ang Boracay Opening.

Binawalan muna ni Maquirang ang mga media na kunan ng litrato at video ang jetty port. Nais kasi ng provincial government at ng Boracay Inter-Agency Task Force na maging supresa ito.

Ilan sa mga pagbabago ng port ay ang mas malawak na entrance exit ng mga sasakyan. May mga solar panel narin na ikinabit sa port na siyang magiging source ng kuryente sa buong port.

Pagpasok ng mga turista sa port ay bubungad sa kanila ang malaking pangalang "Boracay" at malaking billboard na nagpapakita ng bagong mukha ng Isla.

Ayon kay Maquirang posibleng gamitin na ang port simula Oktobre 26.##

-Kasimanwang Darwin Tapayan/ Energy Fm 107.7 Kalibo

JETTY PORT ADMINISTRATOR PINABULAAN ANG "NO COMELEC ID, NO ENTRY" SA BORACAY

PINABULAANAN NI Jetty Port Administrator Niven Maquirang na sa kanila galing ang "No Comelec ID, No Entry" sa Isla ng Boracay.

Ito ang nilinaw niya sa programang Prangkahan sa Energy FM Kalibo umaga ng Martes.

Ayon kay Maquirang ang mga worker ay dadaan sa separadong lane sa jetty port kung saan hahanapan sila ng company ID at terminal pass.

Dapat rin aniya na compliant ang establisyemento na pinagtratrabahuhan ng mga workers na papasok sa Boracay.

Kaya hindi umano totoo na kapag walang Comelec ID ang mga worker sa Isla ay hindi sila makapasok.

Ang mga residente naman ay kinakailangang magpakita ng valid goverment ID, kabilang na ang Comelec, na magpapatunay na sila ay residente sa Isla.

Samantala, sinabi ni Maquirang na pinag-aaralan ngayon ng Inter-Agency Task Force ang pagkakaroon ng access bracelet.

Aniya, layunin ng bracelet na ito na mamonitor ang mga turista sa Isla ng Boracay.##

-Kasimanwang Darwin Tapayan, Energy Fm 107.7 Kalibo

FRONT BEACH MAGIGING DAUNGAN NG MGA BUMIBIYAHENG BANGKA SA PAGBUBUKAS NG BORACAY

GAGAMITIN BILANG daungan ng mga bumibiyaheng bangka ang front beach ng Boracay sa muling pagbubukas ng Isla sa Oktobre 15 para sa dry run.

Sa panayam ng Energy FM Kalibo kay Aklan Jetty Port Administrator Niven Maquirang umaga ng Biyenes sinabi niya na ang mga station 2 at 3 at ang Cagban Port ay magiging entry at exit point.

Aniya ang mga turista at mga residente sa Isla ay dadaan sa main building ng Caticlan Jetty Port samantalang ang mga workers ay dadaan sa reclaimed area malapit sa port.

Ang mga bangka aniyang biyahe ay may mga pangalan na kaagad kung saan ito dadaong. Dadaan parin umano sa pagbusisi ang mga pasahero.

Hindi muna aniya papayagang mag-operate ang mga welcome center ng mga resort at hotel sa Caticlan.

Ang panukalang pagbabago umanong ito sa biyahe ng mga bangka ay pansamantala lamang dahil patuloy pang inaayos ngayon ang main road sa Isla.

Samantala, planong ipatupad ang "no booking, no entry" policy sa Isla. Sisiguraduhin ng Department of Tourism na ang mga bisita ay nakabook na sa mga compliant establishment lamang bago payagang makapasok sa Boracay.

Sasailalim pa sa finalization ng Boracay Inter-Agency Task Force ang mga pagbabagong ito.##

- Kasimanwang Darwin Tapayan, Energy FM Kalibo

PANININGIL NG MGA FEE SA ILANG AKLANON SA CATICLAN JETTY PORT NAIS USISAIN NG SANGGUNIANG PANLALAWIGAN

Nakatakdang ipatawag ng Sangguniang Panlalawigan ng Aklan ang pamunuan ng Caticlan Jetty Port kaugnay sa usapin ng paniningil ng environmental at terminal fee.

Kasunod ito ng pahayag ni SP member Lilian Tirol sa sesyon ng Sanggunian araw ng Lunes hinggil sa mga reklamo sa kanya ng ilang Aklanon na pinapabayad rin ng mga nasabing fee.

Ayon kay Tirol, may mga tubong Aklanon anya na nagtratrabaho na sa ibang lugar na nagbabakasyon sa isla ang sinisingil parin ng mga fee dahil sa walang Aklanon identification card na maipakita.

Alinsunod sa umiiral na municipal ordinance, ang mga residente at turista ay magbabayad ng Php75 na environmental fee at Php100 na terminal fee. Exempted sa mga bayaring ito ang mga Aklanon.

Ang usapin ay sasailalim sa pagdinig ng committee on tourism.

Sinabi ng opisyal na nais niyang malaman kung paano ipinapapatupad ang nasabing ordenansa at kung may kailangan bang baguhin dito.

Samantala, napag-alaman na plano ngayon ng Sangguniang Bayan ng Malay na taasan ang environmental fee mula Php75 sa Php100. / EFMK

MGA POULTRY PRODUCTS HINIHIGPITAN SA CATICLAN JETTY PORT

Mahigpit ngayon ang pinapatupad na seguridad sa Caticlan Jetty Port para masigurong walang makapasok na anumang poultry products mula sa Luzon.

Ito ang ipinahayag ni jetty port admistrator Niven Maquirang sa panayam ng Energy FM Kalibo kaugnay ng epedimya ng bird flu sa Pampanga.

Sinabi ni Maquirang nagbaba na ng memorandum ang Bureau of Quarantine upang higpitan ang mga pumapasok na poultry products sa probinsiya lalu na sa isla ng Boracay.

Ayon sa administrator, nakikipag-ugnayan naman umano ang mga tauhan ng quaritine sa Caticlan jetty port para inspeksyunin ang mga produktong dumaraan dito.

Sinabi pa ni Maquirang na nitong mga nakalipas na araw ay hidi nakalusot sa port ang kahon-kahong mga balot na lulan ng RoRo mula sa Luzon at ipinabalik ang mga ito.

Dumadaan rin umano sa mabusising inspeksyon ang mga produktong itinatawid sa world-tourist destination na isla ng Boracay.

Nakikipag-ugnayan rin umano siya sa mga coastguard para masigurong ang iba sasakyang pandagat ay dadaan lamang sa Caticlan jetty port para mamonitor.

ITATAYONG JETTY PORT SA BRGY. YAPAK, BORACAY PINAG-AARALAN NA

ulat ni Darwin Tapayan, Energy FM 107.7 Kalibo

Cagban Jetty Port

Pinag-aaralan na ngayon ng pamahalaang lokal ng Aklan ang pagtatayo ng panibagong jetty port sa isla ng Boracay.

Sinabi sa programang “Prangkahan” ni jetty port administrator Niven Maquirang, under study na ang nasabing proposal.

May nakikinita narin umano sila na pagtatayuan ng panibagong port.

Isinusulong ng port administrator ang pagtatayo ng port sa brgy. Yapak para anya maibsan ang siksikan sa port sa Cagban.

Makakatulong rin anya ito para matutukan pa ang seguridad sa kabilang bahaging ito ng isla.

Magsisilbi rin umano itong port para sa mga pribadong kompanya at resort.

Sa kabilang banda, nilinaw ni Maquirang na walang kinalaman ang proposed project sa pagbulldoze ng gubat sa brgy. Yapak kamakailan.

Ang paglilinaw ng port administrator ay kasunod ng mga ispikulasyon ng ilan na ang clearing ay bahagi ng nakatdang pagtatayo ng port.