Nagtas it 10.04 persyento ro numero it pag-abot it mga turista sa isla it Boracay sa nauna nga buean it 2018, hara hay base sa rekord it Aklan Provincial Tourism Office.Suno sa APTO, nagbaton ro isla it kabilugan nga 186,893 ka mga turista halin Enero 1 asta 31 it hara nga dag-on; kung siin hara hay mataas it 17,050 kumpara sa ginbaton it Boracay ko Enero 2017.
Sa kabilugan nga narekord nga turista sa nauna nga buean it hara nga dag-on, ro foreign tourists kara hay 125,910; samtang ro domestic tourists hay 55,216; ag ro Overseas Filipinos hay 5,767.
Ro nahambae nga mga turista hay nakaprodyus it total nga P5,948,343,105.60 tourism receipts; kung siin P4,962,853,459.20 kara hay halin sa foreign tourists ag Overseas Filipinos; ag ro P985,489,646.40 mat-a hay sa domestic tourists.
Samtang, ro mga Chinese ag Koreans mat-a ro nagapabilin nga may pinakakaabo nga pagbisita sa hanay it mga foreign tourist sa isla ko Enero nga may narekord nga 54,615 ag 44,458 nga pag-abot.
Kaibahan man sa top 10 foreign visitor list ro mga turista halin sa United States of America nga may 2,567 nga pag-abot; Russia 2,360; Australia 2,107; Taiwan 1,915; United Kingdom 1,820; Malaysia 1,385; Saudi Arabia 1,351; ag Canada 1,205.
Sa isaea mat-a ka press release, ro Department of Tourism-Boracay naghambae nga nagatarget it 17 ka mga international cruise ship calls ro Boracay halin Enero asta Hunyo it hara nga dag-on; nga kung siin hara hay ginatan-aw nga makadaea it kabilugan nga 58,000 ka mga turista sa isla. - PIA-Aklan
No comments:
Post a Comment