DALAWANG MANGINGISDA NA UNA NANG NAIREPORT NA NAWAWALA NATAGPUAN NG LIGTAS

Natagpuan na ngayong hapon ang dalawang mangingisda sa bayan ng Ibajay na una ng naireport na nawawala mula pa noong Linggo.

Kinumpirma ito ng Municipal Risk Reduction Management Office ng Ibajay.

Napag-alaman na napadpad ang dalawa sa tabing-dagat ng Brgy. Tagbaya at Brgy. Ondoy sa parehong bayan.

Sina Alvin Refulgente, 34-anyos at Salito Sudlon, 37, mga residente ng Brgy. San Isidro ay pumalaot hapon noong Linggo para mangisda.

Subalit naiulat na nawawala ng kanilang pamilya kahapon matapos na hindi na nakauwi ang dalawa.

Nabatid na nasira ang kanilang sinasakyang bangka habang nasa laot sa araw ding iyon nong umalis sila.

Nagpalutang-lutang umano ang dalawa sa dagat hanggang sa mapadpad sila sa tabing-dagat at tinulungan ng mga tao sa lugar at ng mga tauhan ng MDRRMO.

Isinugod ang dalawa sa ospital sa Ibajay at inoobserbahan doon pero wala umanong dapat ipag-alala dahil nasa ligtas na ang kanilang kalagayan.