LOKAL NA PAMAHALAAN NG KALIBO MAGLALAAN NG TULONG SA MARAWI CITY

ulat ni Darwin Tapayan, Energy FM 107.7 Kalibo

Maglalaan ng tulong pinansiyal ang lokal na pamahalaan ng Kalibo sa lokal ng Marawi City kaugnay ng nagaganap na krisis doon.

Ito ay matapos magpasa ng resolusyon ang Sangguniang Bayan dito na magbigay ng tulong lalu na sa mga kapatid na naiipit sa bakbakan sa Marawi.

Napagkasunduan sa plenaryo na ang ibibigay na tulong ay hindi bababa sa Php100 libong peso.

Sinabi ni SB Philip Kimpo Jr., ang paglaan ng ganitong uri ng tulong sa ibang lokal na pamahalaan ay magiging daan para makahingi rin ng tulong ang Kalibo sa ibang pamahalaang lokal kung kakailanganin.

Inihalimbawa naman ni SB Mark Quimpo ang tulong ng iba-ibang lokal na pamahalaan na inilaan matapos ang pananalasa ng bagyong Yolanda.

Ang resolusyong ito ay inihain nina SB Cynthia  dela Cruz at Buen Joy French.

Samanatala, pag-aaralan pa ng mga lokal na mambabatas kung bibigyan rin ng tulong ang mga sundalong nakikibaka sa bakbakan sa Marawi kasunod ng mungkahi ni SB Daisy Briones.

Paliwanag ni Briones sa regular sesyon, maaaring kakailanganin ng mga sundalo ang mga gamit o kasuotan.

EMPLEYADO NG LGU NEW WASHINGTON, ARESTADO SA PAGPAPAPUTOK NG BARIL

Arestado ang isang empleyado ng munisipyo ng New Washington matapos itong magpaputok ng baril.

Kinilala ang suspek na si Ladie Magalit, 40 anyos, residente ng brgy. Poblacion sa nasabing bayan.

Ayon sa inisyal na report, hinuli ng mga kapulisan ang suspek matapos na magpaputok ng baril sa kanilang lugar.

Naabutan pa ng mga rumespondeng pulis ang lalaki na itinapon ang kanyang ginamit na baril.

Narekober sa lugar ang isang revolver na walang serial number at limang empty fired catridges.

Nabatid na lasing ang nasabing suspek nang magawa niya ang pagpapaputok ng baril.

Ang suspek ay nasa kostudiya na ng New Washington municipal police station at posibleng maharap sa kasong paglabag sa Republic Act 10591.

BORACAY PNP NANAWAGAN SA TAUMBAYAN KAUGNAY NG PAGPAPAKALAT NG MALING BOMB THREAT

Nagbabala ang mga kapulisan sa taumbayan sa isla ng Boracay na itigil ang pagpapakalat ng maling bomb threat.

Ang panawagang ito ng Boracay Tourists Assistance Center (BTAC) ay kasunod ng maling bomb threat sa Manocmanoc Elementary School.

Sa isang panayam sinabi ni PSInsp. Mark Gesulga, hepe ng Boracay PNP, ang pagpapakalat ng maling bomb threat ay isang criminal offense.

Paliwanag niya, nagdadala ito ng takot sa taumbayan lalu na sa panahon ngayon na laganap ang banta ng terorismo.

Binigyang diin pa ng hepe na ang pagpapakalat ng maling bomb threat, bomb scare o bomb jokes ay posibleng makaapekto sa turismo sa Boracay.

Nanawagan naman siya sa publiko na manatiling mapagmatyag at ireport agad sa mga awtoridad ang anomang kahina-hinalang bagay sa kanilang lugar.

Ipinagbabawal sa Presidential Decree No. 1727 o Anti-Bomb Joke Law, ang pagpapakalat ng maling impormasyon tungkol sa presensya ng bomba, pampasabog at mga kahalintulad nito.

Samantala, patuloy pang iniimbestigahan ng mga kapulisan ang pinagmulan ng kumulat na maling bomb threat sa Boracay kamakailan. (PNA)