PAGPAPATUPAD NG ANTI-SMOKING ORDINANCE SA KALIBO PAIIGTINGIN PA

Para mapaigting pa ang pagpapatupad ng anti-smoking ordinance sa Kalibo, isang enforcers seminar and workshop ang muling isinagawa araw ng Martes.

Ayon kay Ramel Buncalan, chairman ng Kalibo Anti-Smoking Task Force (KAST), ang aktibidad ay dinaluhan ng 52 katao kabilang na ang ilang punong barangay.

Bahagi ng isang araw na seminar at workshop ang background patungkol sa epekto ng paninigarilyo, orientation ng ordinance 2016-008, at kung paano hulihin ang mga violators.

Umaasa si Buncalan na sa pamamagitan ng aktibidad na ito ay mapapatupad pa nila ng maigi ang ordenansa at makahikayat ng mga bagong itatalagang enforcers.

Sa ngayon ay mayroon lamang 15 deputized enforcer ang task force ayon pa sa chairman ng KAST.

Napag-alaman na mula ng ipatupad ang lokal na batas noong Mayo 7 umabot na sa 60 ang kanilang nabigyan ng ticket dahil sa mga paglabag.

Tinatakda sa ordinance no. 2016-004 ang pagbabawal sa paggamit, pagbenta, pagdi-distribute at pag-a-advertise ng sigarilyo at iba pang mga produktong tabako, maging ang electronic cigarettes, sa mga pampublikong lugar.

Ang mga lalabag sa batas na ito ay papatawan ng kaukulang penalidad na hindi tataas sa 2, 500 pesos at pagkakulong ng limang araw o pagpapasara sa establisyemento./ Darwin Tapayan, EFM Kalibo

NO SMOKING ORDINANCE NG KALIBO EPEKTIBO NA NGAYONG HUNYO

Ulat ni Darwin Tapayan, Energy FM 107.7 Kalibo

Epektibo na ngayong Hunyo ang municipal ordinance no. 2016-004 o no smoking ordinance ng bayan ng Kalibo.

Ayon kay Dr. Makarius Dela Cruz, municipal health officer ng Kalibo epektibo na ang ordinansa kahapon, Hunyo 13.

Nagpapatuloy anya ang ginagawa nilang education and awareness campaign lalu na sa mga paaralan sa pakikipagtulungan ng Department of Education (DepEd) kaugnay sa nasabing batas.

Magbubukas narin umano ng smoke cessation program ang health office para sa gustong tumigil na sa paninigarilyo.

Nilinaw naman ni Dela Cruz na siya ring vice chairman ng binuong smoke-free council, na wala pa silang gagawing panghuhuli sa mga lumalabag sa ngayon.

Target anya ng lokal na pamahalaan ng Kalibo na bago magtapos ang taon ay mailunsad na nila ang striktong implementasyon ng batas.

Pag-aaralan pa umano ng konseho ang pagbuo ng special task group na nakatutok lamang sa pagpapatupad ng nasabing ordinansa.

SMOKING BAN SA BAYAN NG KALIBO IPINAPATUPAD NA

ulat ni Darwin Tapayan, Energy FM 107.7 Kalibo

Nagsimula na kahapon, Marso 23 ang smoking ban sa mga pampublikong lugar sa bayan ng Kalibo. Ito ang  kinumpirma ni konsehala Cynthia dela Cruz, committee chair on health sa Energy FM Kalibo.

Ang soft implementation umano ay magtatagal nang 90 araw bago ito ganap na maipatupad. Posible anyang sa Hunyo 23 ay strikto nang maipatupad ang batas na ito.

Tinatakda sa ordinance no. 2016-004 ang pagbabawal sa paggamit, pagbenta, pagdi-distribute at pag-a-advertise ng sigarilyo at iba pang mga produktong tabako, maging ang electronic cigarettes, sa mga pampublikong lugar. 

Ang mga lalabag sa batas na ito ay papatawan ng kaukulang penalidad na hindi tataas sa 2, 500 pesos at pagkakulong ng limang araw o pagpapasara sa establisyemento.

Una nang sinabi ni Dela Cruz na ipapatupad ang batas na ito sa lahat ng mga pampublikong lugar maliban sa bahay, at mga designated area sa mga terminal, hotel, at airport.