Basura sa Caticlan, Malay pwedeng ipamalit ng bigas

KALIBO, AKLAN - Hinihikayat ngayon ng mga opisyal ng Barangay Caticlan sa bayan ng Malay ang kanilang nasasakupan na ipalit ng bigas ang nakolekta nilang basura.

Sa inilabas na panuntunan ng Barangay, ang isang kilo ng mga ginupit na plastic sachets o isang kilo ng mga mapapakinabangan pang mga plastic bottle ay pwedeng ipalit ng isang kilong bigas sa barangay hall.

Pero paalala ng Barangay na ang offer na ito ay para lamang sa mga taga-Caticlan at ang isang household ay maaari lamang makakuha ng limang kilong bigas bawat buwan.

Dapat din na nakagupit sa maliliit na piraso ang mga basurang plastik kagaya ng mga sachet samantalang ang mga plastic bottle naman ay malinis at maaari pang gamitin o iresiklo.

Pwedeng tanggihan ng person in-charge sa "Plastic Barter Store" ang mga basura na malalaman na kinolekta sa labas ng Brgy. Caticlan. Habang padadalhin rin ng eco-bag ang mga magpapalit ng basura para lagyan ng bigas.

Nananawagan ang Sangguniang Barangay sa mga nais suportahan ang inisyatibong ito sa pamamagitan ng pag-donate ng bigas o "any goods" sa tanggapan ni Punong Barangay Ralf Tolosa.##

- Kasimanwang Darwin Tapayan, Energy FM Kalibo

Operatives arrest habal-habal driver for possession of illegal drugs

[Updated] A habal-habal driver was arrested in a successful buy-bust operation staged at around 11:00PM of July 13, 2019 in Crossing Cubay Norte, Malay, Aklan.

The suspect was identified as Christopher Benignos, 25 years old, single, a Habal-habal (single motorcycle) driver from Brgy Dumlog, Malay, Aklan.

The operatives were able to recover from the possession and control of Benignos a zip-locked plastic containing suspected marijuana leaves, seeds and stem; buy-bust money, cash and cell phone.

This is a joint operation of Malay MPS, Aklan PDEU, PIB Aklan-PPO, HPG-Aklan, and PDEA-6.

Suspect will be charged for violations of Section 5&11 of R.A.9165 “The Comprehensive Dangerous Drugs Act of 2002”. (PSMS Christopher Mendoza, PCR PNCO)/Malay PNP

Misis na una nang naibalitang nawawala natagpuang wala nang buhay sa Malay

NAAAGNAS NA na bangkay nang matagpuan si Evelyn Sombilon ng Brgy. San Isidro, Ibajay matapos itong mawala noon pang Hunyo 25.

Ayon sa kanyang anak na si Roque Sombilon, natagpuan ng mga residente ang bangkay ng kanyang ina sa Brgy. Sambiray sa bayan ng Malay hapon ng Martes.

Sinabi niya na isasailalim pa sa post mortem ang bangkay ng ina para malaman kung ano ang sanhi ng kanyang pagkamatay.

Nabatid na umalis noong Hunyo 25 ang 59-anyos na misis sakay umano ng van patungong Brgy. Caticlan, Malay saka sumakay ng tricycle patungong bayan.

Huli umano siyang nakita ng mga tao Hunyo 26 sa Brgy. Caticlan.

Ayon sa anak, pinatingin umano nila ang ina sa Manila at sinabi ng doktor na mayroon itong Alzheimer's disease o maagang pagkawala ng memorya.

Ayon sa kanyang anak, dalawa lamang silang mag-asawa sa kanilang bahay.##

- Kasimanwang Darwin Tapayan, Energy Fm 107.7 Kalibo

Mayor Cawaling balik opisina matapos muling mahalal sa pwesto

BALIK OPISINA si Mayor Ceciron Cawaling bilang alkalde ng Malay dakong alas-12:01 ng tanghali kanin kasunod ng muling pagkahalal niya sa pwesto.

Matatandaan na noong Abril 15, 2019 ay nagbaba ng desisyon ang Ombudsman na i-dismiss sa serbisyo si Cawaling bilang alkalde dahil sa mga kaso kaugnay ng kapabayaan sa Isla ng Boracay.

Ang desisyon ay lumabas anim na buwan matapos makapaghain ng kandidatura si Cawaling at pinalad siya sa eleksyon sa parehong pwesto.

Sa kanyang pag-upo sa pwesto ipinakita niya sa mga media ang mga dokumento na nagpapatunay umano na pwede siyang umupo sa katungkulan.

Kabilang sa mga dokumentong ito ay ang proklamasyon ng Comelec na nanalo siya sa eleksyon, ang panunumpa niya sa katungkulan.

Naglabas rin siya ng memoradum sa lahat ng mga department head ng munisipyo na nagsadabing umupo na siya bilang alkalde.

Sa kabila nito, batay sa advisory ng Department of Interior and Local Government Region 6 na nitong Hunyo 17, hindi umano pwedeng gamitin ang Aguinaldo at Condonation Doctrine.

Nanindigan ang DILG 6 na executory at epektibo parin ang decision ng Ombudsman matapos iserbe sa kanya ang dismissal sa pwesto noong Abril 24.

Samantala, sa panayam kay Malay Municipal Local Government Operation Officer Mark Delos Reyes, hindi nila tatanggapin ang pag-upo ni Cawaling at maging ano mang nilagdaan niyang mga dokumento ay magiging walang saysay.

Hihintayin pa umano ng kampo ni Cawaling ang hard copy ng advisory ng DILG.

- Kasimanwang Darwin Tapayan, Energy FM Kalibo

'Sex' sa beach front ng Boracay pinaiimbestigahan na ng Malay PNP Chief

NAHULI NG mga tao na nagsi-sex umano ang isang lalaki at isang babae sa beach front ng Isla ng Boracay sa station 2.

Ayon kay John Villanueva, isa sa mga nakasaksi at nakakuha ng mga larawan sa nasabing eksena, naganap ang insidente kaninang madaling araw dakong alas-3:00.

Sinabi niya na marami rin umano ang nakasaksi sa dalawa at pinanood lang ng mga tao hanggang sa may isang guwardiya na nakasaksi at binulabog ang mga ito.

Mula umano sa bar ang magkasintahan at pinaniniwalaang mga nakainom. Paniwala niya foriegner umano ang mga ito.

Ipinost ito ni Villanueva sa kanyang facebook account at umani ng mga samu't saring negatibong reaksiyon. Sabi ng ilang netizen hindi dapat nila ito ginawa sa beach dahil iba ang kultura ng Pilipino sa mga banyaga.

May iba na nagsasabi na hindi na dapat ipinost pa ito sa facebook.

Tumawag kami sa Boracay PNP at ayon sa kanila wala umanong ganitong reklamo na nakarating at nairekord sa kanilang tanggapan.

Sa isang text sinabi PSupt. Antonio Dizon, hepe ng Malay PNP, inatasan na niya ang kanyang mga tao para mag-imbestiga sa nasabing insidente.##

Municipal agriculturist pinabulaanan na may nahuling dolphin sa bayan ng Malay

PINABULAANAN NG municipal agriculturist office (MAO) ang kumakalat na facebook post na may nahuling dolphin sa bayan ng Malay.

Ayon sa agriculturist na si Denric Sadiasa ang mga larawan ng dolphin sa nasabing facebook post ay kuha pa noong December 3, 2016 sa Brgy. Caticlan.

Napadpad umano sa tabing dagat malapit sa Caticlan jetty port ang naturang dolphin at patay na. Ibiniyahe ito ng mga Bantay Dagat sakay sa isang tricycle at inilibing sa Sitio. Tabon.

Lumabas din sa pagsisiyasat ng kanilang tanggapan na ang tricycle na makikita sa mga larawan na kinargahan ng dolphin ay pagmamay-ari ng isa sa mga tauhan ng Bantay Dagat.

Napag-alaman na ang taong nakaapo sa loob ng tricycle sa mga larawan ay isa pang miyembro ng Bantay Dagat sa bayan ng Malay.

Inamin ng 20-anyos na babae ang kanyang pagkakamali at humingi ng tawad sa mga otoridad.

Napag-alaman na nadaanan lamang niya ang tricycle na may kargang dolphin at kinuhanan ito ng larawan. Kagabi ay na nakita umano niya sa memory ng kanyang cellphone ang mga larawan at naingganyong ipost ito.

Nilagyan niya ito ng caption na "dakop ka gid" o "huli ka" ang facebook post bagay na umani ng mga negatibong reaksiyon.

Bagaman binura na ng babae ang kanyang post mabilis ito nascreenshot ng ibang mga netizen at ipinost sa social media hanggang sa makarating ito sa tanggapan ng MAO.

Pinatawad ng opisyal ang nagpost.##

Motorsiklo sumalpok sa tricycle sa Malay, isa malubha

MALUBHA NGAYON ang lagay ng isang 16-anyos na babae makaraang sumalpok ang menamanehong motorsiklo sa tricycle sa Brgy. Argao, Malay hapon ng Huwebes.

Si Clarissa Antaran, 16-anyos, residente ng Brgy. Sambiray sa nasabing bayan ay patuloy na ginagamot sa intensive care unit ng Dr. Rafael S. Tumbokon Memorial Hospital.

Mabilis umano ang patakbo ng menor de edad sa motorsiklo dahilan para mawalan ito ng kontrol at sumalpok sa kasalubong na tricycle.

Ang tricycle ay menamaneho ni Rene Samson Santuyo, 31, residente ng Brgy. Caticlan, Malay.

Sa lakas ng impact tumilapon ang driver ng motorsiklo at ang backrider niya na si Roeil Duhaylongsod, 25, ng Iligan City, Mindanao.

Nawalan ng malay ang driver ng motorsiklo at agad isinugod sa ospital.  Confine din sa Aklan Baptist Hospital ang kanyang backrider.

Nabatid na parehong lasing ang dalawa nang maganap ang insidente.##

LOLO ARESTADO SA MALAY SA KASONG FRUSTRATED MURDER

ISANG 66-ANYOS na lolo ang inaresto ng mga kapulisan sa Brgy. Motag, Malay dahil sa kasong frustrated murder.

Kinilala sa report ng kapulisan ang akusado na si Wenceslao Delgado Taunan Jr., residente ng nasabing lugar.

Ang akusado ay inaresto sa bisa ng warrant of arrest sa ilalim ng criminal case no. 2216 na nilagdaan ni Judge Romulo Arellano, RTC Branch 6.

Ikinasa ng kapulisan ang operasyon araw ng Huwebes sa pangunguna ng Aklan Trackers Team.

Pansamantala siyang ikinulong sa Kalibo PNP Station bago dinala sa kaukulang korte.##

- Darwin Tapayan, Energy FM Kalibo

BARANGAY KAGAWAD SA CATICLAN MALAY ARESTADO SA BUYBUST OPERATION!

Arestado ang isang barangay kagawad na ito sa ikinasang drug buy bust operation ng Philippine Drug Enforcement Agency at  Provincial Drug Enforcement Unit.

Kinilala ang suspek sa pangalang Cielo Tolosa, 35-anyos, kagawad ng Caticlan, Malay, Aklan.

Nakuhanan ng isang sachet ng hinihinalang shabu  ang suspek sa pamamagitan ng buybust operation kapalit ng Php500.00.

Isa pang sachet ng pinaghihinalaang shabu ang nakuha umano sa body search.

Mariin namang itinanggi ng suspek ang pagkakasangkot niya sa iliga na droga./ Archie Hilario, EFM Kalibo

NO. 3 MOST WANTED PERSON SA MALAY, AKLAN NA MAY KASONG RAPE ARESTADO SA BULACAN

Arestado ang tinuturing na no. 3 most wanted person sa Malay, Aklan sa Hagunoy, Bulacan gabi ng Martes.

Ang akusado ay nakilalang si Roderick Domingo y Torres, 48-anyos, at residente ng Brgy. Iba, Hagunoy.

Nahaharap siya sa two counts ng kasong Rape Under Paragraph 2 Article 266-A.

Ikinasa ng Hagonoy PNP at ng Regional Intelligence Unit 6 ang nasabing operasyon sa bisa ng warrant of arrest.

Ang kanyang kaso ay nilabas ng Regional Trial Court Branch 3 dito sa Kalibo, Aklan noon pang Abril 26, 2011.

Php240,000 ang itinakdang pyansa ng korte para sa kanyang pansamantalang kalayaan.

Nakatakdang dalhin sa Aklan ang nasabing akusado para harapin ang kanyang kaso sa nasabing korte.
Napag-alaman na mismong anak niya ang kanyang biktima. | EFM Kalibo

TULAK NG DROGA SA BORACAY, ARESTADO SA MAINLAND MALAY

photo (c) PDEU

Arestado ang lalaking ito kagabi sa bayan ng Malay matapos maaktuhan na nagtutulak ng iligal na droga.

Kinilala ng mga kapulisan ang suspek na si Antonio Oczon Jr. alyas "Jojo", 41-anyos, residente ng Cubay Sur, Malay.

Nasabat mula sa suspek sa buybust operation ang isang sachet ng pinaghihinalaang shabu kapalit ng Php2,000 buybust money.

Tatlo pang sachet ng parehong sangkap ang narekober mula sa suspek sa isinagawang body search.

Ayon kay PCInsp. Frensy Andrade, hepe ng Provincial Drug Enforcement Unit, kumukuha umano ito ng suplay sa Isla ng Boracay.

Bago anya magsara ang Isla ay sa Boracay ito nagbebenta lalu na sa mga turista dito.

Nakakulong na ngayon ang suspek sa Malay municipal police station at nakatakdang sampahan ng kaukulang kaso./ Darwin Tapayan, EFM Kalibo

CONSTRUCTION WORKER PINAGPAPALAKOL SA ISLA NG BORACAY, PATAY

photo (c) RB Bachiller

Patay ang construction worker na ito matapos siyang pagpapalakulin ng kanyang kainuman sa Brgy. Balabag, sa isla ng Boracay Linggo ng hapon (Nov. 12).

Kinilala ang biktima na si Jimmy Quintua, tubong Laguna. Kinilala naman ang suspek na si Henry Tumaque, taga-Caloocan City na nagtratrabaho rin sa nasabing isla.

Nabatid na habang nasa kasagsagan ng inuman ay may naganap na mainitang pagtatalo sa dalawa. Sa galit ng suspeka ay kumuha umano ito ng palakol at makailang beses na hinataw ang biktima.

Matapos ang insidente ay mabilis na tumakas ang suspek. Isinugod naman sa Don Ciriaco S. Tirol Hospital ang biktima pero binawian rin ito ng buhay.

Pinaghahanap na ng mga kapulisan ang suspek sa nasabing insidente.

TINATAYONG KONKRETONG PIER SA BULABOG BEACH SA BORACAY, KINAGULAT NG PAMAHALAANG LOKAL NG MALAY

Kinagulat ng pamahalaang lokal ng Malay ang  tinatayong pribadong pier na ito malapit sa Ati Village sa Bulabog beach sa Brgy. Manocmanoc, Boracay.

Ayon kay Sangguniang Bayan member at committee chairperson on environment Nenette Aguirre Graf, pinatigil na ito ng pamahalaang lokal pero bumalik rin pagkalipas ng ilang araw.

Nang usisain umano niya ang mga nagtratrabaho rito upang ipakita ang mga kaukulang dokumento ay wala silang maipakita. Wala rin umanong kaalam-alam ang konseho ng barangay ukol rito.

Ayon kay Graf, pagmamay-ari umano ito ng isang resort sa nasabing isla.

Samantala, kinumpirma ni Rowen Aguirre sa office of the mayor, na ngayong araw ay ipapatibag agad nila ang nasabing konstruksyon at paiimbestigahan ang nasabing kaso.

SIMULATION DRILL NAUWI SA AKSIDENTE: SEKYU NABARIL NG POLICE SA CATICLAN AIRPORT

ulat ni Darwin Tapayan, Energy FM 107.7 Kalibo

Nhick Tanan / FB

Malubhang sugatan ang 27-anyos na sekyu matapos aksidente umanong nabaril ng aviation police Byernes ng gabi (Oct. 27) sa Caticlan Airport.

Kinilala ang nasabing biktima na si Nhick Tanan, tubong Iloilo at kasalukuyang nakatira sa Nabas.

Ang suspek ay kinilala namang si PO2 Benedicto De Jorge Etrata.

Nagkaroon ng counter-terrorism simulation exercise ang kapulisan kasama ang nasabing gwardiya. Nabatid na ang biktima ay umaaktong terorista.

Tinamaam ng bala ng 9mm ang nasabing gwardiya sa kanyang dibdib. Unang isinugod sa ospital sa Malay ang gwardiya matapos ang nasabing insidente.

Nabatid na hindi naalis ang bala ng baril bago ang naturang simex.

Pansamantalang nasa kostudiya ngayon ng Airport Police ang suspek samantalang iniimbestigahan na ng Malay municipal police station ang insidente.

Samantala patuloy na ginagamot sa intensive care unit ng pribadong ospital sa Kalibo ang nasabing gwardiya.

Ayon sa pamilya ng biktima, stable na ang kanyang kalagayan.

PAWIKAN NATAGPUANG PATAY SA BAYBAYING SAKOP NG BORACAY

photo (c) Malay MDRRMO

Patay na ang pawikang ito ng matagpuan sa baybaying sakop ng isla ng Boracay umaga ng Huwebes (October 26).

May basag na ang shell ng nasabing pawikan nang ito ay matagpuan.

Base sa report ng Municipal Disaster Risk Reduction and Management Office (MDRRMO) ng Malay, ito ang data ng pawikan:

Length - 143cm

Width- 90cm

Circumference - 179cm

80 to 100 Kilos

Nagbabala naman ang MDRRMO sa taumbayan sa kanilang facebook post: "When they are gone, when every last life has been stolen, how will you remember them? EXTINCTION IS FOREVER".

GRO NA TULAK NG DROGA SA ISLA NG BORACAY, ARESTADO SA BUYBUST OPERATION

Arestado ang isang GRO sa pagtutulak ng iligal na droga sa sitio Bolabog, Brgy. Balabag, Boracay Huwebes ng umaga.

Kinilala ang suspek na si Maribeth Bandiez, 21 anyos, tubong Bagong Silang, Caloocan City at temporaryong nakatira sa nabanggit na lugar sa Boracay.

Inaresto ng mga kapulisan ang babae matapos maaktuhang nagtutulak umano ng droga.

Nasabat ng awtoridad mula sa babae ang dalawang sachet ng pinaghihinalaang shabu kapalit ng Php1,500 na marked money.

Ikinasa ng mga tauhan ng Malay Special Drug Enforcement Team ang nasabing operasyon kasama ang Philippine Drug Enforcement Agency at ng Boracay Tourist Assistance Center (BTAC).

Nakatakdang sampahan ng kasong paglabag sa Republic Act 9165 o Comprehensive Dangerous Drugs Act. / EFMK

BORACAY NAKIISA SA PAGDIRIWANG IKA-50 TAON NG ASEAN; 6-FOOT LANTERN INILAWAN

photo (c) Desiree Segovia

Inilawan kagabi sa isla ng Boracay ang six-foot fiberglass lantern bilang isa sa mga landmark ng Association of Southeast Asian Nations (ASEAN).

Ang pagpapailaw sa lantern sa plaza ng brgy. Balabag sa nasabing isla ay pinangasiwaan ng Malay Municipal Tourism Office.

Dumalo sa naturang aktibidad ang ilang lokal na opisyal, mga kinatawan ng iba-ibang ahensiya ng pamahalaan at mga nagboluntaryo sa ASEAN meeting sa Boracay.

Ang Boracay ay isa sa 50 mga lugar sa Pilipinas na nagkaroon ng iconic ASEAN landmarks sa pagsisilbing isa sa mga venue ng mga regional bloc's meetings at mga aktibidad.

Ang isla ay naghost ng dalawang ASEAN meeting kabilang na ang 23rd meeting ng ASEAN Intergovernmental Commission on Human Rights (AICHR) mula Pebrero 13 hanggang 15 at Foreign Ministers Retreat mula Pebrero 19 hanggang 21.

Ang landmark lighting ay isa sa mga aktibidad sa pagdiriwang ng ika-50 taon ng ASEAN kung saan ang pagpapailaw ay sabay-sabay na isinagawa alas-7:00 ng gabi sa 50 mga lugar sa buong bansa.

Ang makulay na lantern na may 80 incandescent bulb na may 10-watt at logo ng ASEAN ay mananatiling nakailaw hanggang sa Nobyembre ngayong taon.

MONITORING SA MGA ILIGAL NA SEWAGE LINE SA BORACAY, NAGPAPATULOY

photo (c) LGU Malay file

Patuloy ngayo ang ginagawang monitoring ng pamahalaang lokal ng Malay sa mga iligal na kumokonekta sa storm drainage sa Boracay.

Katunayan bumuo na ang LGU Malay ng Bulabog Task Force para magsagawa ng clearing operation sa drainage sa nasabing isla.

Ayon kay Rowen Aguirre, executive assistant ng LGU-Malay, layunin ng operasyon na matumbok ang mga business at residential area na iligal na kinokonekta ang kanilang sewage line sa drainage.

Sinabi ni Aguirre na ilang mga lumabag na ang napatapawan ng penalidad ng pamahalaang lokal simula ng clearing operation noong Hulyo.

Nabatid na ang drainage line  ay binuksan na sa main road sa Station 1 at magpapatuloy pa umano hanggang Station 2 at 3.

Ipinagbabawal sa ordinansa ng Malay blg. 307 ang paglalabas ng wastewater at sewage sa paligid ng isla at maging sa drainage system nito.

Maliban sa kaukulang penalidad na ipapataw ng lokal na batas, posible ring mapatawan sila ng penalidad mula sa Department of Environment and Natural Resources. (PNA)

MGA ESTABLISYEMENTONG LUMALABAG SA BORACAY IPAPASARA NG PAMAHALAANG LOKAL

photo (c) LGU Malay file

Muling aarangkada ngayong buwan ang pamahalaang lokal ng Malay sa pagpapasara ng mga lumalabag na establisyemento komersyal sa isla ng Boracay.

Ayon kay Rowen Aguirre, executive assistant IV ng LGU Malay, simula noong Hunyo, 20 mga establisyemento na ang napasara ng pamahalaang lokal.

Karamihan umano sa mga lumabag na ito ay hindi nakakuha ng mayor’s permit samantalang ang iba ay hindi sumusunod sa mga lokal na ordenansa.

Gayunman nilinaw ni Aguirre na ang mga establisyementong ito ay nakabalik na sa kanilang operasyon matapos ma-comply ang mga kaukulang dokumento at multa.

Sa susunod na buwan ay mag-iinspeksyon ang pamahalaang lokal sa mga establisyemento sa Boracay para masigurong sumusunod ang mga ito sa batas.

Paliwanag ni Aguirre, layunin ng hakbang na ito mapaganda ang imahe ng mga negosyo sa isla at mapanatiling lehitimo ang kanilang operasyon. (PNA)

DATING KONSEHAL NG MALAY, KALABOSO SA PAGTUTULAK NG DROGA

Arestado sa isang buy bust operation ang dating konsehal ng Malay at ngayon ay empleyado ng lokal na pamahalaan ng bayan.

Ayon kay PCInsp. Frenzy Andrade, hepe ng Provincial Drug Enforcement Unit (PDEU) - Aklan, kinilala ang naaresto na si Leny Sacapaño, 39-anyos at administrative assistant for transportation ng LGU Malay.

Nakuha mula sa suspek sa buy bust operation ang isang sachet ng pinaghihinalaang shabu.

Narekober naman sa ginawang body search ang lima pang sachet ng parehong sangkap, buy bust money at pera na nakuha sa kanyang bag na nasa mahigit Php100,000.00.

Si Sacapaño ay kasama sa listahan ng mga high value target ng mga kapulisan at dati nang nagsurender sa Malay PNP noong nakaraang taon.

Pinangunahan ng Provincial Drug Enforcement Unit (PDEU) ang nasabing operasyon.

Dinala ang suspek sa Kalibo municipal police station kung saan siya pansamantalang nakakulong ngayon habang inihahanda na ang kasong isasampa sa kanya.

Posibleng maharap ang suspek sa kasong paglabag sa sec. 5 at 11 ng Republic Act 9165 o Comprehensive Dangerous Drugs Act of 2002.