ulat ni Darwin Tapayan, Energy FM 107.7 Kalibo
Nagtamo ng sugat sa mukha at sa iba pang bahagi ng katawan ang isang 20 anyos na motorista makaraang bumangga ang menamanehong motorsiklo sa tricycle sa bagong Numancia-Kalibo bridge Biyernes ng gabi.
Kinilala ang nasabing lalaki na si Philip Delfin y Tipay, residente ng Brgy. Navitas, Numancia.
Ayon sa biktima papauwi na umano siya galing ng Kalibo pasado alas-6:00 ng gabi nang aksidenteng bumangga ang sinasakyang motorsiklo sa tricycle.
Paliwanag ng biktima, bigla nalang umanong huminto ang tricycle sa kanyang unahan at dahil sa pababa ang dulo ng tulay sa Brgy. Bulwang, Numancia ay hindi agad niya nakontrol ang kanyang motorsiklo. Dito bumangga ang biktima at natumba sa konkretong daanan.
Napag-alaman na nakainom rin ang lalaki.
Agad naman siyang sinaklolohan ng mga tao sa lugar at isinugod sa provincial hospital.
Hanggang ngayon ay nagpapagaling pa ang lalaki sa nasabing pagamutan.
Nabatid na madilim ang lugar lalu at wala pang mga nailagay na ilaw sa bagong tulay. Una nang nangako ang DPWH Aklan na lalagyan nila ito pagkatapos ng Ati-atihan.
No comments:
Post a Comment