Inaresto ng kapulisan ang isang 40 anyos na Australian national matapos ireklamo ng pambubugbog sa 35 anyos na nobya.Sa salaysay ng babae, nakilala raw nito sa facebook ang lalaki, niligawan raw siya nito.
Napakabait, napakamalalahanin at malambing ito noon kaya hindi nagtagal ay naging magkasintahan sila.
Nitong nakalipas na April, pumunta ng Pilipinas ang nobyo at pagdating sa Aklan agad na nagsama sila sa isang bubong, tumira sila sa isang apartment.
Habang tumatagal doon na napansin ng nobya na mahilig pala sa alak ang nobyo,seloso rin daw ito.
Katunayan ang aso raw na nirescue ng ex bf niyang kano sa Boracay ay pinagseselosan din ng nobyo.
Paulit-ulit na raw ang pananakit sa kanya kahit wala namang dahilan.
Kahapon ay sinaktan raw siya ng nobyo,pinainom ng mga tabletang gamot at tinatakot na papatayin.
Ang paulit- ulit raw na sinasabi nito ay ang hinanakit sa mga naging nobya dahil inuubos raw ang kanyang pera.
Habang naninigarilyo sa labas ang suspek nagkaroon ng pagkakataon na makatakas at makapagsumbong sa pulisya ang biktima.
Rumesponde sa lugar ang pulisya at nagmatigas pa ang suspek noong una, kailangan niya raw ng Australian Lawyer at embassy. Pero kalaunan ay sumunod na rin ito sa pulis.
Kahapon ay isinampa na rin ang kasong paglabag sa RA 9262 Violence against women and children, hindi nakapagpiyansa ang suspek kaya nakakulong ito sa Aklan Rehabilitation Center.##
- Archie Hilario, Energy FM Kalibo
No comments:
Post a Comment