ulat ni Darwin Tapayan, Energy FM 107.7 Kalibo
Kasalukuyan pang nagpapagaling ngayon sa provincial hospital ang isang 34-anyos na panadero makaraang tagain ng kanyang kapitbahay sa araw mismo ng Pasko sa Brgy. Dalipdip, Altavas.
Sa report ng Altavas municipal police station, kinilala ang biktima na si Judy Dela Cruz, residente ng nasabing lugar.
Dakong alas-4:00 ng hapon umano ng dumating ang suspek sa bahay ng biktima na may dalang itak. Ang suspek na kinilalang si Edgar Flaviano, 44, ay nagtratrabaho bilang tagasibak ng kahoy para sa biktima.
Nang makita ng biktima ay niyaya niya itong kumain gayunman, ang suspek na nasa ilalim ng kalasingan ay agad na tinaga ang biktima na tinamaan sa kaliwang kamay at dumeretso sa dibdib. Sa ikalawang pagtaga ay maswerte namang nakailag ang biktima at nakatakas.
Humingi ito ng tulong sa kanyang tiyuhin na isa ring kagawad na siya namang nagreport sa pulisya. At sa pagresponde ng mga awtoridad ay naaresto ang lalaki at nakapiit na ngayon sa Altavas police station.
Nahaharap ngayon ang suspek sa kasong frustrated homicide.
No comments:
Post a Comment