Sucgang sa mga kasama sa konseho: huwag magpadikta batay sa political affiliation

photo: SP-Aklan

NANAWAGAN SI Opposition Board Member Harry Sucgang sa kanyang mga kasama na huwag padidikta batay sa kanilang political affiliation.

Ito ay bahagi ng speech ng opisyal sa kanilang inaugural session nitong Lunes. "Because once we are dictated by our political affiliation we cannot dispense with justice and truth," giit niya.

Nanawagan rin ang abogadong board member sa gobyerno probinsiyal na maging patas ang benipisyong ibinibigay sa bawat miyembro ng Sanggunian.

Aniya, kung ano mang benipisyo ang ini-enjoy ng karamihan sa Sanggunian ay dapat rin aniyang ibigay sa maynoriya.

Mababatid na una nang ipinahayag ni Sucgang sa Energy FM Kalibo na siya at ang incumbent Board Member na si Immanuel Sodusta ay hindi binigyan ng pondo ni Governor Joeben Miraflores noong nakaraang termino.

Si Sucgang at Sodusta ay parehong tumakbo kontra sa grupo ni Gov. Miraflores.

Ang regular presiding officer ng Sanggunian na si Vice Governor Reynaldo Quimpo at ang natitira sa mga board member ay tumakbong kasama ni Miraflores.

Sa kabilang banda, pinasiguro ni Sucgang sa taumbayan na maglilingkod ito ng may katapatan  at integridad.

Binigyang-diin naman ni Board Member Sodusta sa kanyang mensahe sa inaugural session ang kahalagahan ng maynoriya sa Sanggunian.

Si Sucgang ay nahalal bilang chairman ng Committee on Human Rights habang si Sodusta ay nahalal bilang chairman ng Committee on Labor and Employement, mga komitiba na hinawakan rin nila noong nakaraang termino.##

- Kasimanwang Darwin Tapayan, Energy FM Kalibo

Sucgang naging emosyonal sa gitna ng usapin sa Php1 billion loan facility

NAGING EMOSYONAL si Board Member Atty. Harry Sucgang sa diskusyon sa Sangguniang Panlalawigan kaugnay ng kontrobersiya sa Php1 billion loan facility ng Aklan sa bangko.

Matatandaan na naghain ng motion for reconsideration ang opisyal kasama si Board Member Atty. Noly Sodusta kung saan pinapabawi nila ang boto ng mayorya sa utangin.

Paliwanag ni Sucgang, hindi dumaan sa tamang proseso ang pag-apruba ng ordinansa kaugnay rito. May mga paglabag aniya ito sa mga internal rules ng Sanggunian at maging sa konstitusyon.

Nakasagutan niya si Board Member Jay Tejada sa isyu na ang inaprubahang ordenansa ay walang numero. Ayon kay Tejada kapag ang isang ordinansa ay inaprubahan ng mayorya lahat ng mga pagkakamali ay maaayos.

Nais pa sanang balikan ng Board Member ang loan terms and condition pero pinigil siya ng regular presiding officer Vice Governor Reynaldo Quimpo na aminadong nagtaas ng boses nagsasabing "out of order" si Sucgang.

Sa kanilang sagutan ay naging emosyonal ang Board Member. "Ginahinyo ko malang ro akon nga mga miyembro it Sangguniang Panlalawigan basi kon bayluhan nanda ro andang pinuino hay may akon man nga mga grounds kara nga sa akon nga pagpati hay balido man," maluha-luha niyang pagkasabi.

Sa botohan, siyam ang hindi pabor sa motion for reconsideration nina Sucgang at Sodusta. Samantala, sa kanyang privilege speech nanindigan si Sodusta na hindi na kailangang umutang ng gobyerno probinsyal.

Ang uutanging Php1 billion mula sa Development Bank of the Philippines base sa kahilingan ng gobernador ay gagamitin umano sa pagpopondo sa iba-ibang proyekto ng gobyerno probinsiyal.##

- Kasimanwang Darwin Tapayan / Energy Fm 107.7 Kalibo

Motion for reconsideration inihain para muling pag-aralan ang Php1 billion na uutangin ng probinsiya

NAGHAIN NG pormal na kahilingan sina Board Member Atty. Harry Sucgang at Atty. Noly Sodusta na muling pag-aralan ang inaprubahang ordinansa kaugnay ng Php1 billion na uutangin ng probinsiya.

Sa kanyang privilege speech binasa ni Sucgang ang inihain nilang motion for reconsideration sa regular session ng Sangguniang Panlalawigan araw ng Lunes.

Matatandaan na boto ang mga miyembro ng Sanggunian sa nasabing loan facility maliban lamang sa mga nabanggit na board members.

Katuwiran ng dalawang abogado sa kanilang inihaing dokumento, ilang internal rules ang nilabag sa pag-apruba ng ordinasa.

"We cannot change our rule any time at the whims of majority or tyranny of members otherwise there will be chaos, anarchy, and disorderly proceedings," sabi ni Atty. Sucgang.

Kabilang sa binanggit ay ang huling pagpapadala ng mga kopya ng balangkas ng ordinansa sa kanila bago isalang sa huli at ikatlong pagbasa.

Depensa nila, labag ito sa internal rules na nagsasabing ang mga dokumento ay dapat ipadala tatlong araw bago ang session.

Labag rin aniya ang umano’y pag-amyenda ni Board Member Andoy Gelito sa isang salita na nilalaman ng ordenansa kaugnay sa uutanging halaga mula sa Development Bank of the Philippines sa huling pagbasa.
Ang uutanging Php1 billion base sa kahilingan ng gobernador ay gagamitin umano sa pagpopondo sa iba-ibang proyekto ng gobyerno probinsiyal.

Walang binanggit sa regular session ang regular presiding officer at Vice Governor Reynaldo Quimpo kung pagdedebatehan sa susunod na sesyon ang motion nina Sucgang at Sodusta.##

- Kasimanwang Darwin Tapayan / Energy Fm 107.7 Kalibo

PHP1.53 BILLION LOAN FACILITY NG PROBINSIYA KINUKUWESTIYON NI BOARD MEMBER SUCGANG

IPAPATAWAG UMANO ni Board Member Hary Sucgang ang mga kinatawan ng Development Bank of the Philippines kaugnay ng Php1.53 billion loan facility ng pamahalaang lokal ng Aklan.

Ito ang mariing sinabi ng opisyal sa panayam ng Energy FM Kalibo araw ng Huwebes. Aniya, nais umano niyang pagpaliwanagin ang bangko sa naturang usapin.

Kinukuwestiyon ni Sucgang bakit umabot sa ganito kalaki ang uutangin ng probinsiya samantalang ang hiling lamang aniya ni Gov. Florencio Miraflores sa Sanggunian na aprubahan ay Php153 million.

Mababatid na lumagda sa kasunduan ang pamahalaang panlalawigan sa pamamagitan ng gobernador at ang nasabing bangko para sa Php1.53 billion loan facility.

Ipinagkaloob rin sa gobyerno probinsyal ang Php153 million initial availment para gamitin umano sa mga iba-ibang proyekto at gastusin.

Ang reklamo na ito ni Sucgang ay sinagot na ni Vice Governor Boy Quimpo sa isang press conference na hindi dinagdagan ng Sanggunian ang uutangin.

Aniya bago ipagkaloob ng bangko ang Php153 million na uutangin ay kailangang maaprubahan muna ang Php1.53 billion loan facility. Pinaliwanag ni Quimpo na hindi pa utang ang loan facility.

Sinabi pa ng bise gobernador na ang usapin sa Php1.53 billion loan facility ay lumabas umano sa pagdinig ng komitiba sa Sanggunian kung saan ipinatawag ang DBP. Wala umano sa pagdinig si Sucgang.

Nang isalang rin sa plenaryo ang pag-apruba nito ay hindi rin nagkuwestiyon ang board member.

Pinuna ni Quimpo ang umano'y mga misinformation na pinalalabas ni Sucgang sa mga radio station sa probinsiya. Pag-aaralan pa umano ng Sanggunian kung pwedeng ma-sunction ang board member.

Inaasahan na sa Lunes sa regular session ng Sanggunian ay bubuksan ni Sucgang ang nasabing usapin at ang kanyang pakay na ipatawag ang mga kinatawan ng nasabing bangko.##

- Energy FM Kalibo

MGA AIRLINE COMPANY SA AKLAN IPAPATAWAG NG SP MEMBER DAHIL SA HINDI MAGANDANG TRATO SA KANYA SA EROPLANO

Planong ipatawag ni Sangguniang Panlalawigan member Hary Sucgang ang mga airline company para sa isang pagdinig sa mga karapatan ng mga pasahero.

Kasunod ito ng hindi magandang karanasan kung saan hindi umano inasikaso ng mga stewardess ang kanyang bagahe at hinayaan lamang umano sa gitna ng eroplano.

Paliwanag ni Sucgang, karapatan umano niya bilang senior citizen ang alalayan siya. Naniniwala ang opisyal na hindi lamang siya ang nakaranas ng mga inconvenience na ito kabilang na ang mga delayed flight.

Kaugnay rito, naghain ng resolusyon si Sucgang para ipatawag ang mga airline company, pati na ang CAB at CAAP sa isang pagdinig sa Sanggunian para ipaliwanag ang karapatan ng mga senior citizen, may mga kapansanan at mga buntis na pasahero.

Ito ay para anya maprotektahan ang kanilang mga karapatan at mabigyang kaalaman ang mga pasahero lalu na ang mga apektado na walang kakayahang magsampa ng kaso sa korte.

Bago pa man siya naghain ng resolusyon, tinanggihan na ng mga kasamahan niya sa Sanggunian na dinggin ang nangyari dahil personal umano ito at ang nararapat niyang gawin ay magsampa ng kaso.

Umaasa naman siya na sa susunod na sesyon ay papabor na sa kanya ang kanyang mga kasama para sa interes ng publiko.

ISYU SA AKLAN HYMN PINAGDEBATEHAN SA SANGGUNIANG PANLALAWIGAN

Ulat ni Darwin Tapayan, Energy FM 107.7 Kalibo

Pinagdebatehan sa joint committee hearing ng Sangguniang Panlalawigan ang isyu tungkol sa partikular na linya ng Aklan Hymn Lunes ng umaga (Oct. 23).

Kasunod ito ng pagpuna ni SP member Harry Sucgang na mali ang linyang “May Ati ka, bantog sa kalibutan (May Ati ka, tanyag sa mundo)”. Paliwanag ng opisyal, hindi ang “ati” ang sikat kundi ang Ati-atihan festival.

Humarap sa nasabing pagdinig ang nagsulat na si Dr. Jesse Gomez at nanindigan na walang mali sa nasabing linya. Paliwanag niya, gumamit siya ng matalinhagang salita na tinatawag na “metonymy” sa linyang ito at ang salitang ati ay tumutukoy rin sa Ati-atihan.

Sinabi pa ni Gomez, bukas siya sa posibilidad na baguhin ang kanyang akda kapag nagdeklara ang Sanggunian na “erroneous” o mali ang partikular na linya.

Napag-alaman na noong Oktubre 2010, nagsulat rin sa Sanggunian si Sumra Dela Cruz-Rojo, anak ng namayapang manunulat na si Roman Dela Cruz, para punain ang parehong linya ng kanta. Ito ay matapos nang maisabatas ang “Among Akean” bilang opisyal na himno ng probinsiya. Bagaman dumaan sa mga pagdinig ang isyung ito noon, ayon kay Gomez, nakumbinsi naman umano si Rojo sa kanyang paliwanag.

Napagkasunduan naman sa pagdinig  ng mga committee on culture and the arts at ng laws and ordinances sa pangunguna ni SP Soviet Dela Cruz na idudulog na lang sa plenaryo naturang usapin.

Pinagpapasa naman ng bagong recording ng kanta si Sucgang kung saan gagamitin ang salitang Ati-atihan sa halip na ati sa nasabing linya ng Aklan hym.

‘WALANG MALI SA AKLAN HYMN’ AYON KAY DR. GOMEZ; REBESYON MULING GAGASTUSAN

Ulat ni Darwin Tapayan, Energy FM 107.7 Kalibo

Handa si Dr. Jesse Gomez na humarap sa Sangguniang Panlalawigan upang magpaliwanag sa isyu sa sinulat na Aklan hymn.

Una nang naghain ng resolusyon si SP member Harry Sucgang sa Sanggunian na ipatawag ang may akda ng “Among Akean” para pagpaliwanagin sa isang partikular na linya ng awit.

Kinukuwestyon ni Sucgang ang umano’y ‘hindi wastong’ linya na “May Ati ka, bantog sa kalibutan” (May Ati ka, tanyag sa mudo). Paliwanag ng opisyal, hindi tanyag ang mga Ati sa Aklan dahil sa diskreminasyon sa kanila at pagpapalayas sa kanilang mga tirahan.

Iminugkahi pa ni Sucgang sa kanyang resolusyon na palitan ng salitang “Ati-atihan” ang salitang “Ati” dahil ito naman anya ang tanyag sa mundo.

Sa panayam ng Energy FM Kalibo, sinabi ni Gomez na ang partikular na linya ay gumamit ng metonymy, isang uri ng matalinhagang salita. Nilinaw ng nagsulat na ang salitang “Ati” ay tumutukoy sa Ati-atihan, isang taunang pagdiriwang sa Kalibo.

Nanindigan si Gomez na walang mali sa nasabing linya gayunman sang-ayon rin ito sa posibleng rebesyon ng awit. Anya, gagastos na naman ang pamahalaang lokal sa produksiyon ng bagong Aklan hymn.

Pag-uusapan pa sa sesyon ng Sanggunian kung ipapatawag ba si Gomez para sa isang pagdinig kaugnay ng nasabing isyu.

Ang “Among Akean” ay dineklarang opisyal na Aklan hymn alinsunod sa provincial ordinance no. 2010-005.

‘DI WASTONG’ LYRICS SA AKLAN HYMN PINUNA SA SANGGUNIANG PANLALAWIGAN

ulat ni Darwin Tapayan, Energy FM 107.7 Kalibo

Pinuna ng miyembro ng Sangguniang Panlalawigan ang umano’y hindi wastong lyrics sa Aklan hymn sa sesyon ng Sanggunian ngayon araw.

Partikular na pinuna ni SP member Harry Sucgang ang linyang “May ati ka, bantog sa kalibutan / Ag kulturang ginapabugae, eabi sa tanan.” (May ati ka, tanyag sa mundo / At kulturang ipinagmamalaki, higit sa lahat). 

Ani Sucgang, kung tutuusin ay hindi ati ang sikat sa mundo kundi ang “ati-atihan”, isang taunang selebrasyon sa Kalibo at sa iba pang bayan sa probinsiya. 

Binigyang diin pa ng opisyal na sa halip na ipinagmamalaki ay dini-discriminate pa nga ang mga Ati sa probinsiya na katunayan ay mga unang naninirahan sa Aklan.

Nais ipa-summon ni Sucgang ang may akda ng awit upang pagpaliwanagin sa partikular na linya. Sinabi naman ni vice governor Reynaldo Quimpo na kailangang maghain muna siya ng amendatory ordinance.

Walang pang pahayag si Sucgang kung maghahain ito ng ordinansa upang amyendahan ang “Among Akean” na sinulat ni Dr. Jesse Gomez.

Ang “Among Akean” ay dineklarang opisyal na provincial hymn base sa provincial ordinance no. 2010-005.