Chinese National sa Boracay ninakawan ng Php200k sa tinutuluyang apartment

ISANG CHINESE National sa Isla ng Boracay ang ninakawan sa kanyang kwarto sa tinutuluyang apartment sa Brgy. Balabag.

Ayon sa Chinese na si Tianqi Hong, 34-anyos, sa Malay PNP, natangay sa kanya ang isang cellphone at wallet laman ang 2100 US dollars at Php80,000.

Salaysay niya, nagulat ito nang pagkagising ay napansin ang isang lalaki na nasa loob na ng kaniyang kuwarto. Tinanong umano niya ito pero agad itong lumabas.

Dito na napag-alaman ng banyaga na nawawala na ang kanyang cellphone at wallet.

Sa follow-up investigation kapulisan sa inuupahang apartment ng biktima, nakita sa CCTV footage ang isang menor de edad na responsable sa pagnanakaw.

Ayon pa sa mga kapulisan na ang menor de edad ay sangkot na sa mga kaso ng nakawan sa Isla ng Boracay.

Pinaghahanap na ngayon ng mga otoridad ang nasabing suspek.##