MGA KABATAAN NA SANGKOT SA BANDALISMO NAGSAGAWA NG ‘OPLAN LINIS’

Ulat ni Darwin Tapayan, Energy FM 107.7 Kalibo

Nagsagawa ng ‘Oplan Linis’ ang mga kabataang sangkot sa talamak na kaso ng bandalismo sa bayan ng Kalibo kaninang umaga.

Gamit ang pintura, binura ng mga kabataang ito ang mga ginawa nilang bandal sa mga pribado at pampublikong lugar.

Tumulong rin ang mga tauhan ng Kalibo municipal police station sa nasabing proyekto at mga opisyal ng lokal na pamahalaan.

Una rito, lumagda sa peace covenant ang mga kabataang ito na karamihan ay menor de edad. 

Nangako ang mga kabataang ito sa mga kapulisan at sa lokal na pamahalaan na hindi na uulitin ang kanilang ginawa at hihikayatin ang iba na itigil ang nasabing aktibidad.

Nangako naman ang Kalibo PNP at lokal na pamahalaan na isusulong ang kanilang kapakanan at ikabubuti.

SANGGUNIANG BAYAN NABABAHALA SA TALAMAK NA KASO NG BANDALISMO SA KALIBO

Ikinababahala ng Sangguniang Bayan ng Kalibo ang talamak na kaso ng bandalismo sa mga pampubliko at pribadong istraktura sa bayan ng Kalibo. 

Kaugnay rito, pinatawag ng Sanggunian si PCInsp. Terence Paul Sta. Ana, hepe ng Kalibo PNP, upang pagpaliwanagin sa mga nasabing kaso. 

Ayon kay Sta. Ana, batay sa mga insiyal report, ang mga bandalismo ay kagagawan ng grupo ng mga menor de edad sakay sa motorsiklo. Madalas umanong ginagawa ito tuwing gabi. 

Makikita ang mga bandalismo sa mga pader ng provincial hospital, Kalibo Elementary School at maging sa estatwa ng Gomburza. 

Umapela naman ng kooperasyon ang mga kapulisan sa taumbayan sa posibleng pagtukoy at paghuli sa mga responsable rito.