BIYAHE NG ILANG BANGKA SA NABAS PINATITIGIL NG COASTGUARD

Kasunod ng pagsara ng bahagi ng national highway sa Tulingon, Nabas ilang bangka na ang sinamantala ang pagbyahe bilang alternatibong paraan ng transportasyon.

Pero sinabi ni Lt. Com. Joe Luvis Mercurio ng Philippine Coastguard - Aklan na for safety reason ay hindi ito pinapayagan maliban nalang kung mayroon na silang special permit mula sa Marina.

Dalawang motorbancas sa araw ng Huwebes ang binigyan nila ng violation report at binalaan na ihinto ang ferrying activities. "They were given stern warning. Same future violations will result to more severe legal actions," giit niya.

"Hopefully po mag cooperate sana sila at maintindihan na we are doing our functions hindi para pahirapan sila kundi for safety and security reasons po," paliwanag ni Mercurio.

"Rest assured na kapag may mga kaukulang dukomento na sila para makapagbyahe ng Nabas area ay magpapadala po kami nang mga tao sa area para i-assist cla at mabigyan ng clearance," dagdag pa niya.

Nabatid na may mga ilang maliliit na bangka ang nagpapasakay ng pasahero mula Gibon hanggang Unidos o vice versa sa bayan ng Nabas kapalit ng umano'y Php30 hanggang Php50 na pamasahe.

Matatandaan na isinara sa lahat ng mga sasakyan ang bahagi ng highway sa Tulingon, Nabas para bigyang-daan ang rehabilitasyon ng gumuhong bahagi ng kalsada.

Kaugnay rito kailangan dumaan pa sa Pandan at Libertad, Antique ang mga bibiyahe patungong Caticlan, Malay o vice versa bagay na malayo at dagdag pamasahe sa mga bumibiyahe.##

- Darwin Tapayan, Energy FM Kalibo

KARAGDAGANG COASTGUARD STATION PLANONG BUKSAN SA AKLAN

Kinumpirma ni Philippine Coastguard-Aklan commander Ramil Palabrica sa Energy FM Kalibo na for approval na ang kanyang planong magbukas ng dalawang dagdag na Coastguard station sa probinsiya.

Anya, ilalagay ito sa mga bayan ng Buruanga at Ibajay.

Sa kasalukuyan ang mga coastguard station sa Aklan ay sa Dumaguit, New Washington at Caticlan, Malay kabilang na ang sub-station Boracay.

MGA BUMIBIYAHE SA DAGAT PINAG-IINGAT NG COASTGUARD-AKLAN DAHIL SA HABAGAT

Pinag-iingat ngayon ng Philippine Coastguard-Aklan ang mga maliliit na sakayang pandagat na maglayag dahil sa nararanasang sama ng panahon.

Ayon kay PCG-Aklan commander Ramil Palabrica, delikado ang pumalaot para sa mga maliit na bangka dahil sa umiiral na habagat sa ating bansa.

Dahil rito sinisiguro umano ng mga coastguard na nakabantay sa mga port na ang mga sakayang pandagat ay sumusunod sa pamantayang pangkaligtasan.

Bago maglayag ang isang bangka sinisiguro umano nila ito na hindi overloaded, nasa kondisyon, at ang mga nakasakay ay nakasuot ng life jacket.

Samantala, kinumpirma naman ni Palabrica na Martes ng umaga isang babae ang nahulog sa karagatan mula sa sinasakyang bangka mula sa Isla ng Boracay patawid sana ng San Jose, Romblon dahil sa lakas ng alon.

Patay na nang matagpuan ang biktima sa baybaying sakop ng Carabao Island sa Romblon. Maswerte namang nakaligtas ang dalawa niyang kasama sa bangka.

Nabatid na nakalusot ang bangkang ito sa ipinagbabawal na lugar sa Boracay. Dumaan umano ito sa So. Malabunot sa Balabag na klarong paglabag sa "One Entry, One Exit" policy.

Sa kabila nito, ilang bangka na anya ang kanilang nahuling lumabag sa nasabing provincial ordinance bilang paghihigpit kaugnay ng ginagawang rehabilitasyon sa Boracay. | Darwin Tapayan, EFM Kalibo

PARAW SA BORACAY, LUMUBOG SAKAY ANG 6 MGA CHINESE NATIONAL

Lumubog ang isang Paraw sakay ang anim na mga Chinese national sa baybaying sakop ng isla ng Boracay kahapon dakong alas-4:00 ng hapon.

Ayon kay SN2 Lanto Maulana, ng Philippine Coastguard Boracay, nabali umano ang katig ng nasabing bangka dala ng malakas na hangin at alon kaya ito tumaob.

Agad namang nakaresponde ang mga taga-Coastguard para iligtas ang mga naturang turista.

Maswerte anyang hindi naman nalunod ang mga sakay rito dahil ilang metro lamang ang layo nito sa front beach ng isla.

Ayon pa kay Maulana, ipinagbabawal na ang paglalayag ng mga bangka sa front beach dahil narin sa habagat na nararanasan sa Boracay.

Dapat anya ang sa back beach lang ang mga water at iba pang sports activity sa isla.

Samantala, ayon sa Coastguard ang byahe ng mga pampasaherong bangka ay inilipat na sa Tabon-Tambisaan vice versa dahil sa habagat.

Bumibiyahe parin anya ang Oyster at Boracay Express ferry sa Caticlan-Cagban vice versa.