ENERGY INVESTIGATIVE REPORT: Gilid ng kalsada sa Estancia, Kalibo, mistulang dumping site dahil sa tambak-tambak na basura; LGU Kalibo, inaksyunan ang problemang basura

Inaksyunan na ng LGU Kalibo ang tambak-tambak na basura sa gilid ng national highway sa Brgy. Estancia, Kalibo.

Mahigit isang linggo na raw na nakatambak ang mga basura at patuloy na nadadagdagan araw-araw kaya nagmistulang dumping site na ang lugar.

Kaninang umaga ay nagpahayag sa programang Prangkahan with Jodel Rentillo si Engr. Jessie Fegarido, MEEDO Head, na aaksyuan niya ang reklamo at ipapalinis ang lugar.

Nitong tanghali ay binalikan ng Energy FM Kalibo ang lugar at malinis na nga ito.

Una nang inireklamo at napansin ang basura sa nasabing lugar kung saan may mga karatula o reminder pa sa lugar na nakasaad na "bawal magtapon ng basura" at "ilagay sa tamang lugar ang mga basura" pero katabi naman nito ang tambak-tambak na basura.

INVESTIGATIVE REPORT: 15-anyos na dalagita, pinaniniwalaang ginahasa at iniwan sa palayan sa New Washington, Aklan

NINA ARCHIE HILARIO AT NIEL VILLANUEVA, ENERGY FM 107.7 KALIBO

Nakatali ang mga kamay, nakabusal ang bibig at naka-baba ang suot na pantalon at underwear ng isang babaeng natagpuan sa isang palayan sa Brgy. Jugas, New Washington, Aklan alas-6:00 kahapon ng umaga, Oktubre 5.

Sa panayam ng Energy FM Kalibo sa nanay ng biktima, napag-alaman na bandang 6:45 ng umaga nitong Oktubre 4, umalis ng bahay ang dalagita upang pumasok sa paaralan.

Nag-baon pa nga raw ito ng kanin at ulam para hindi na umuwi para magtanghalian.

Ayon pa sa nanay, saulado na raw niya ang oras ng pag-alis at pag-uwi ng anak mula sa eskwela.

Pero mag-a-alas-5:00 pasado na ng hapon ay hindi pa raw nakakauwi ang dalagita. Alas-5:00 ng hapon raw ang normal na oras ng pag-uwi nito kaya kinabahan na silang lahat.

Alas 5:41 ng hapon, nag-reply ang dalaga sa text ng nanay at ganito ang sinabi: "Ma gapauli eon kami, nag-obra pa bi kami it regalo para kay ma’am hin-aga." (Ma, pauwi na kami. Gumawa pa kasi kami ng repalo para kay ma’am para bukas.)

Kaya naghintay na lamang ang nanay at mga kapatid ng dalagita sa pag-uwi nito.

Sumapit ang alas-8:00 ng gabi pero hindi pa rin nakakauwi ang dalagita, kaya tinawagan na nila ang cellphone nito.

Makailang ulit rin nilang tinawagan ang cellphone ng biktima at bandang huli ay sinagot naman raw ito pero walang nagsasalita sa kabilang linya.

Lalong nadagdagan ang kanilang pag-alala pero wala naman daw silang maaaring gawin kundi ang hintayin ang pag-uwi ng dalagita. Inisip na lang daw nila na mga kaklase lang ng biktima ang kasama nito at maaaring may tinatapos lang na proyekto.

Alas-6:00 ng umaga ng sumunod na araw ay nabulabog ang ilang residente ng Brgy. Jugas matapos na may matagpuang isang babaeng nakabusal, nakatali ang dalawang kamay, at nakababa na ang suot na pantalon at natatakpan pa ng dayami.

Inakala nilang patay na ito kaya hindi agad nila ito ginalaw. Pero nang makita nilang kumilos ang nakagapos na dalagita ay agad na tinawag ang mga barangay health workers upang mabigyan ito ng paunang lunas habang naghihintay ng sasakyan na magdadala sa ospital.

Naisugod agad sa hospital ang biktima at ligtas na ito.

Sa ngayon ay nasa ospital na ang dalagita at nasa ligtas na’ng kalagayan. Nakatakda naman itong isailalim sa pagsusuri para malaman kung nagahasa nga ang biktima.

Nananawagan naman ang nanay ng biktima sa suspek na sumuko na at harapin ang nagawang krimen.

Nagpapatuloy naman ang New Washington PNP sa kanilang imbestigasyon para makilala ang suspek sa pag-abuso sa biktima.