TATLO RO ninahon sa natabu nga banggaan it motorsiklo ag tricycle sa palikuon nga parte it national highway sa Brgy. Pudiot, Tangalan kahapon it hapon.
Ginkilaea ro driver it motorsiklo sa report it Tangalan PNP nga si Andre Flaviano, 36-anyos, samtang ro anang angkas hay si John Philip Icay, 31, parehong mga taga-Brgy. Poblacion, Libacao.
Samtang ro driver man t-a it tricycle hay si Julie Tabanero, 44, it Sitio Ilawod, Brgy. Tamalagon, Tangalan.
Nasayuran nga halin sa banwa it Ibajay ro motorsiklo ag pauli eon kunta it Libacao ro mga sakay tag pag-abot sa natabuan it aksidente hay gulpi sandang inagawan it linya it tricycle halin sa pihak nga direksyon.
Parehong natumba sa sementadong karsada ro tricycle ag ro motor. Ninahon ro mga eakot sa nasambit nga aksidente ag ginpandaea sa ospital sa Kalibo.
Nasayuran nga una sa impluwensiya it makahieilong nga ilimnon ro driver it tricycle suno sa sugid it kapulisan.
Nagapadayon pa ro imbestigasyon sa natabo.##
- Kasimanwang Darwin Tapayan, Energy FM Kalibo
No comments:
Post a Comment