LUXURY CRUISE SHIP, DADAONG SA BORACAY SA ARAW NG MGA PUSO

Ulat ni Darwin Tapayan, Energy FM 107.7 Kalibo

Pinasigurado na ng pamunuan ng Caticlan Jetty Port ang kaligtasan ng mga bisitang sakay ng luxury cruise line Celebrity Constellation na nakatakdang dumaong sa unang pagkakataon sa Isla ng Boracay sa Pebrero 14.

Nilinaw ni port administrator Niven Maquirang na bagaman magiging abala ang mga security personnel sa pagbibigay seguridad sa mga delegado ng ASEAN Summit na idaraos sa parehong linggo, hindi umano nila isasantabi ang mga cruise visitor.

Pahayag ni Maquirang na magtatagal lamang ng alas-8:00 ng umaga hanggang alas-5:00 ng hapon ang cruise ship sakay ang nasa 2,100 pasahero.

Samantala, nakatakda namang mag-return visit ang MS Europa II at MS Seabourn Sojourn sa Pebrero 15 at Pebrero 25 ayon sa pagkakasunod.

Sa Pebrero 28 naman ay darating sa unang pagkakataon ang MS Crystal Symphony at ang pagbabalik ng Seven Seas Voyager. – PNA