HENANN GROUP OF RESORTS NAGBOOK NA NG MGA TURISTA KAHIT HINDI PA COMPLIANT AYON SA DENR

NALAMANG NAGBO-BOOK na ng mga turista ang Henann Group of Resorts sa Isla ng Boracay sa kabila na hindi pa ito accredited ng Department of Tourism.

Ito ang pinahayag ni Department of Environment and Natural Resources (DENR) USec. Benny Antiporda sa isang press conference umaga ngayong Biyernes sa Isla.

Ayon kay Antiporda, hawak na nila ang reklamo ng turista na nagbook sa nasabing resort sa pamamagitan ng Agoda. Aniya ayaw umanong ibalik ng resort ang perang ibinayad ng turista.

Mahigpit ang panawagan noon ng Inter-Agency Task Force na tanging ang mga compliant establishments lamang sa Isla ang maaaring magbook ng mga turista.

Sa pinakahuling listahan na inilabas umabot na 68 accommodation establishment ang accredited ng DOT. Hindi kasama rito ang alinman sa limang resort ng Henann.

Kamakailan lang ay nabisto ng Inter-Agency Task Force na peke ang isinumiteng Environmental Compliance Certificate (ECC) sa Department of Tourism (DOT) para sa accreditation.

Ayon kay Antiporda wala pang Sewerage Treatment Plant ang group of resort, isang requirement para mabigyan sila ng panibagong ECC.

Nanawagan ngayon si Antiporda sa iba pang mga turista na nagbook at nagbayad sa mga resort ng Henann na magreklamo sa Inter-Agency Task Force.

Una nang nagbabala ang Task Force na ang mga non-compliant establishment na malalamang nagbo-book ng mga turista ay posibleng maharap sa kaukulang penalidad.##

-Kasimanwang Darwin Tapayan/ Energy Fm 107.7 Kalibo

HENANN HINILING SA DENR NA PAYAGAN MAG-OPERATE KAHIT HINDI PA ACCREDITED

TINANGGIHAN NG Department of Environment and Natural Resources o DENR ang hiling ng Henann Group of Resorts sa Isla ng Boracay na mag-operate kahit hindi pa accredited.

Ayon kay DENR USec. Benny Antiporda, hiniling umano ng may-ari na si Henry Chosuey na payagan silang mag-operate habang ikino-comply palang nila ang mga dokumento para sa accreditation.

Nahaharap ngayon sa kontrobersiya at imbestigasyon ang group of resorts dahil sa pagsusumite ng pekeng Environmental Compliance Certificate (ECC) sa Department of Tourism (DOT).

Mababatid na sa inilabas na 68 accredited accomodation establishment sa Boracay ng Department of Tourism, hindi kasama rito ang alinman sa limang resort ng Henann.

Ayon kay Antiporda, kinausap umano niya ng personal ang tauhan ng Henann na nagsumite ng pekeng ECC. Paliwanag umano nito, na-excite lang siya nang makita ang ECC sa kanyang mesa at agad ipinasa sa DOT para mabigyan na ng akreditasyon.

Nabatid na handwritten lamang ang petsa sa ECC kesa sa karaniwan na itinatatak. Humingi naman umano ng paumanhin ang tauhang ito ng Hennan.

Aniya wala pa umanong Sewerage Treatment Plant ang group of resorts. Ipagpapatuloy pa ng Inter-Agency Task Force ang imbestigasyon sa kaso titingnan kung mayroon din silang pagkukulang.##

-Kasimanwang Darwin Tapayan/ Energy Fm 107.7 Kalibo