Daeaga eumumpat sa tricycle matapos daehon sa konspisoyo nga lugar

File photo / Energy FM Kalibo

SANGKA 19-ANYOS nga baye ro eumumpat sa anang ginasakyan nga tricycle matapos nga gindaea imaw it driver sa sangka 'suspesyoso' nga lugar sa banwa it Kalibo.

Do nasambit nga baye hay nagsakay kuno sa sangka tricycle halin sa Aklan Catholic College sa Archbishop Reyes St. ag manaog kunta sa ACC sa Roxas Avenue Extension.

Sa una may nakasakay kuno imaw nga sambilog nga nagpanaog sa PhilHealth Office sa D. Maagma St. pero sa pihak nga idiretso imaw sa eskwelahan hay gindaea ta kuno imaw sa sangka suspesyoso nga lugar sa Magdalena Village sa Brgy. New Buswang, Kalibo.

Suno pa sa estudyante ngara nangawa kuno imaw nga owa ta it katawo-tawo sa nasambit nga lugar ag naghambae pa kuno ro driver kana nga "malibot-libot anay kita ne".

Kinuebaan kuno ro baye ngara rason nga eumumpat imaw sa tricycle ag dumaeagan. Natabu ro insidente kahapon ag rayang adlaw imaw nagreklamo sa Kalibo PNP.

Suno kay PSSgt. Chris Paul Alejandro, imbestigador, nabuoe man ta it baye ro body number it tricycle ag natumod eon ro driver.

Nakataeana sigon nga ipatawag ro tricycle driver sa police station agud mabue-an man imaw it pagpahayag.##