Lalaki arestado matapos mahulihan ng baril, mga bala sa Makato

ARESTADO ANG isang 20-anyos na lalaki sa Makato, Aklan matapos mahulihan na nagdadala ng baril at mga bala ng walang kaukulang dokumento.

Kinilala ang suspek na si Alfred Kim Magallanes y Almanon, ng Roxas City, Capiz.

Nabatid na nagpapatrolya ang ilang tauhan ng Makato Municipal Police Station dakong 10:40 kagabi sa Brgy. Poblacion para magpatupad ng curfew nang mahuli nila ang suspek.

Napansin umano ng kapulisan ang tatlong lalaki na nakatambay sa waiting shed na dali-daling sumakay sa isang motorsiklo.

Naabutan umano ng kapulisan ang tatlo at hinanapan sila ng mga ID. Binuksan ng suspek ang kanyang bag at tumambad sa kapulisan ang 38 caliber revolver na may kasamang tatlong live ammunition.

Paliwanag ng suspek na pinadala lamang sa kanya ang baril ng kilala niyang guwardiya. Pupunta sana siya kasama ang dalawang iba pa sa isang okasyon sa Makato.

Inaresto ng Makato PNP ang suspek at pansamantalang ikinulong sa lock-up cell at nakatakdang sampahan ng kasong paglabag sa Republic Act 10591.##

- Kasimanwang Darwin Tapayan, Energy Fm 107.7 Kalibo