Motorista kritikal matapos maaksidente sa bayan ng New Washington

photo credited to the owner

MALUBHA ANG lagay ng isang motorista matapos madisgrasya sa kalsada Huwebes ng umaga sa Brgy. Tambak, New Washington.

Batay sa ulat ng New Washington PNP, nakilala ang biktima na si Nestor Desol Dalida Jr., 25-anyos, at residente ng Brgy. Linabuan Sur, Banga.

Lumabas sa paunang imbestigasyon ng kapulisan na nag-overtake umano sa isa pang motorsiklo ang biktima at nawalan ito ng kontrol dahilan para bumangga sa gutter ng tulay.

Nabatid na mabuhangina ang kalsada sa lugar na pinangyarihan ng aksidente.

Nabalian ng kanang paa ang biktima at nagtamo ng malubhang sugat sa ulo.

Agad na rumesponde ang mga tauhan ng MDRRMO sa lugar at isinugod ang biktima sa ospital at naka-confine ngayon sa intensive care unit.

Samantala, napag-alaman na noong Mayo 29 ay nasangkot rin sa aksidente ang isa niyang kapatid matapos masagasaan ag isang 15-anyos na batang babaeng tumatawid sa kalsada sa Brgy. Estancia, Kalibo.

Doble ang kargo ngayon ng pamilya dahil sa panibagong aksidente habang tinutulungan rin nilang mapagamot ang 15-anyos na batang babae na malubha rin ang lagay sa Iloilo.##

- Kasimanwang Darwin Tapayan, Energy FM Kalibo