Ronda Pilipinas cycling teams dadaan sa kalsadahin ng Aklan bukas

photo Ronda Pilipinas FB

DADAAN SA kalsadahin ng Aklan bukas, Pebrero 12 ang mga lokal at internasyonal na siklista sa 9th LBC Ronda Pilipinas cycling event.

Kaugnay rito, ang mga kapulisan at iba pang emergency response unit sa probinsiya ay nakahanda na sa pagdaan ng mga siklista sa probinsiya sa panghuling stage ng kanilang karera.

Sa bayan ng Kalibo, sinabi ni PSupt. Richard Mepania, hepe ng Kalibo PNP, nakahanda na ang kanilang seguridad kung saan ipapakalat umano sa highway ang mga kapulisan, auxiliary police, mga tanod. Katuwang din umano nila ang MDRRMO.

Ayon kay Mepania posible umanong dumaan rito ang mga siklista dakong alas-11 ng umaga.

Nagsimula ang karera sa 197.6-kilometer Iloilo-Iloilo Stage One noong Pebrero 7 diretso sa 101.8-km Guimaras-Guimaras Stage Two sa sumunod na araw.

Bumalik ang grupo sa Iloilo para sa 179.4-km Iloilo-Roxas City Stage Three nitong Pebrero 10 at sinundan ng 146.9-km Roxas-Roxas Stage Four pagdating ng Pebrero 11.

Ang awarding ceremony ay isasagawa sa Isla ng Boracay araw rin ng Martes.##

- Kasimanwang Darwin Tapayan, Energy FM Kalibo