AMA ARESTADO SA BAYAN NG IBAJAY MATAPOS IREKLAMO NG PANGHIHIPO NG 12-ANYOS NA ANAK NA BABAE

Inaresto ng mga kapulisan ang isang 45-anyos na ama sa bayan ng Ibajay matapos siyang ireklamo ng panghihipo ng sariling niyang anak na babae.

Naganap ang insidente kahapon ng umaga. Kuwento ng 12-anyos na dalagita umuwi umano ang suspek na lasing sa kanilang bahay, niyakap siya, hinalikan at hinipuan umano ang masilang bahagi ng kanyang katawan.

Nagpumiglas ang bata at umiiyak na nagsumbong sa ina na naglalaba sa labas ng kanilang bahay.

Agad na inireport ng mag-ina ang insidente sa Ibajay PNP station at sa pagresponde ay inaresto ang lalaki sa kanilang bahay.

Ayon sa imbestigador ng Women and Children Protection Desk ng Ibajay, mariing itinatanggi ng suspek ang reklamo ng kanyang anak.

Palawinag ng lalaki, paglalambing lamang umano ang kanyang ginawa at posibleng namis-interpret lamang anya ito ng panganay na anak.

Nabatid na may dalawang anak ang mag-asawa at parehong babae. Walang trabaho ang lalaki at halos araw-araw umanong naglalasing.

Pansamantalang ikinulong sa police station ang suspek at posibleng maharap sa kaukulang kaso.