MASAHISTA SA BORACAY, NATAGPUANG NAAAGNAS NA BANGKAY

ulat ni Darwin Tapayan, Energy FM 107.7 Kalibo

Naaagnas na bangkay na ng matagpuan ang isang masahista sa Isla ng Boracay sa kanyang inuupuhang kuwarto.

Sa report ng Boracay Tourist Assistance Center (BTAC) dakong alas-9:30 ng gabi ng makatanggap sila ng impormasyon hinggil rito.

Sa salaysay ng unang nakakita at may-ari ng boardin

g house na si John Joseph, ipinagtaka niya ang mabahong amoy na nanggagaling sa isang kuwarto. Nang usisain ay nakita niya ang inuuod na na bangkay ng kanyang boarder.

Kinilala ng pulisya ang nasabing lalaki na si John Rammy Eugenio, 22 anyos, at residente ng Brgy. Duyong, Pandan, Antique.

Sa unang pag-usisa ng SOCO, inatake umano sa puso ang nasabing lalaki dahilang ng kanyang kamatayan. Pinaniniwalaan na nasa 3 o 4 na araw na ng bawian ng buhay ang masahista at nabatid na nag-iisa lang sa kuwarto.

MOTORSIKLO VS. MULTICAB, 3 MIYEMBRO NG PAMILYA SUGATAN

ulat ni Darwin Tapayan, Energy FM 107.7 Kalibo

Sa provincial hospital na sasalubungin ng tatlong miyembro ng pamilya ang kanilang Pasko makaraang maaksidente sa sinasakyang motorsiklo kaninang hapon sa Brgy. Caiyang, Batan.

Ang mga biktima ay ang mag-asawang sina Lorielen, 37 anyos, at Ronie dela Cruz, 36, kasama ang kanilang 6 anyos na anak na babae.

Papauwi na ang pamilya sa kanilang bahay sa Brgy. Mabilo, New Washington galing sa Brgy. Fulgencio, Balete sakay ng motorsiklo na menamaneho ng padre de familia nang aksidente silang mabundol ng rumaragsa umanong multicab sa kurbadang bahagi ng kalsada.

Lumihis umano ng linya ang multicab na menamaneho ng hindi pa nakikilalang driver. Dahil rito tumilapon sa sementadong kalsada ang tatlo at lahat ay nabalian ng kaliwang paa at nagtamo ng sugat sa iba-ibang bahagi ng katawan.

Agad namang tumakas ang nasabing nakabangga. Confine naman sa ospital ang tatlong mga biktima.

Nagpapatuloy ngayon ang imbestigasyon ng Batan PNP station hinggil sa nangyaring aksidente.

PATAY NA PAWIKAN NAPADPAD SA BAYBAYIN NG TAMBAK, NEW WASHINGTON

ulat ni Darwin Tapayan, Energy FM 107.7 Kalibo

Not an actual photo. Lifted from the net.

Pinagkaguluhan ng mga residente ang isang pawikan na natagpuang palutang-lutang sa baybayin ng Brgy. Tambak, New Washington noong isang araw at naagnas na.

Sa ulat ng New Washington PNP station, nakatanggap sila ng tawag mula sa isang konsehal ng barangay sa lugar hinggil rito dakong alas-4:45 ng hapon.

Agad namang nagtungo sa lugar ang pulisya at humingi ng tulong ng Municipal Agriculture Office upang madokumento ang pangyayari.

Nabatid na ang pawikan ay may bigat na nasa 25 kilos at posible umanong nasa isang linggo nang patay. Samantala, posible umanong namatay ang pawikan dahil sa katandaan.

Ang hayop ay inilibing sa tabing-baybayin upang maayos na mai-dispose. 

Napag-alaman na ang pawikan ay isang uri ng hayop-dagat na nanganganib nang maubos.