70% disaster preventive fund pwede nang magamit dahil sa 'Dengue Outbreak' sa Aklan

PWEDE NANG magamit nang gobyerno probinsiyal ang 70 porsyento ng disasters preventive fund kasunod ng deklarasyon ni Gov. Florencio Miraflores ng Dengue Outbreak sa Aklan.

Ang deklarasyon ay ginawa ng gobernador nitong Lunes sa pagpulong ng Provincial Anti-Dengue Task Force. Isang Executive Order ang nakatakdang lagdaan ng gobernador kaugnay rito.

Sa panayam ng Energy FM Kalibo kay Dr. Cornelio Cuachon ng Provincial Health Office (PHO)-Aklan, kabilang sa posibleng pagamitan ng pondo ay ang pagbili ng mga karagdagang dengue testing kit at mga gamot.

Mababatid sa tala ng PHO-Aklan na umabot na sa 2,171 ang kaso ng dengue sa buong lalawigan sa taong ito, mataas ng 156 porsyento kumpara sa parehong peryod noong nakaraang taon. Labinlima na ang naitalang patay sa sakit sa taong ito.

Ang mga bayan ng Kalibo, Balete at Banga ay nakapagtala ng may pinakamataas na kaso ng dengue. Kapansin-pansin na sa mga nakalipas na linggo ay nakabilis ng pagtaas ng sakit sa buong lalawigan.

Samantala, napagkasunduan sa pagpupulong ng task force na isang sabay-sabay na paglilinis ang gagawin ng mga munisipalidad tuwing Biyernes, alas-3:00 hanggang alas-5:00 ng hapon at tuwing Sabado, alas-7:00 hanggang alas-9:00 ng umaga, sa apat na magkakasunod na linggo.

Nakatakda namang sumailalim sa Memorandum of Agreement ang gobyerno probinsiyal sa tatlong pribadong ospital sa Aklan para i-admit ang mga dengue patient na hindi kayang mai-admit sa mga pampublikong ospital dito sa bayan ng Kalibo.

Ang mga pribadong ospital ay popondohan ng gobyerno para sagutin ang gastusin ng mga pasyente.##

- Kasimanwang Darwin Tapayan (with report from Kasimanwang Jodel Rentillo), Energy FM Kalibo

Bilang ng mga naputukan ng firecracker sa Aklan umabot na sa 12 - PHO

UMABOT NA sa isang dosena ang bilang ng mga naputukan ng firecracker sa probinsiya ng Aklan ayon sa tala ng Provincial Health Office (PHO) as of January 3.

Ayon kay Dr. Cornelio Cuachon, opisyal ng PHO, simula Disyembre 21, nakapagtala sila ng isa sa Disyembre 30, lima sa Disyembre 31, at anim sa Enero 1. Magtatapos ang bilangan sa Enero 5.

Sinabi ni Dr. Cuachon na mababa umano ito ng 37 porsyento kumpara sa nakaraang taon kung saan nakapagtala sila ng 19 firecracker-related injuries.

Sa nasabing bilang tatlo ang naitalang naputukan ng five stars, tatlo ang kwetes, dalawang libentador. May naitala ring nabiktima ng luces, camara at w. bomb.

Pinakamarami ang dinala sa Provincial Hospital na may walo, isa sa Ibajay District Hospital, isa sa Buruanga Municipal Hospital, at dalawang ang sa Altavas District Hospital.

Sa mga ito, anim ang taga-Kalibo, dalawa ang sa Altavas, isa sa Nabas, isa sa Numancia, Tangalan at isa sa Buruanga. Pinakabata sa mga naputukan ay edad sais anyos habang ang pinakamatanda ay 45.

Umaasa naman si Cuachon na sa susunod na taon ay mas bababa pa ang bilang na ito kung hindi man ma-zero.##

BATANG NAMATAY UMANO SA BAKUNA SA ESKWELAHAN SA MAKATO NAKATAKDANG I-OTOPSIYA

photo © Energy File

NAKATAKDANG I-OTOPSIYA ang bangkay ni Kent Nadal para malaman kung ito ba ay nabakunahan.

Mababatid na humihingi ng hustiya ang pamilya ng Grade 7 student sa paniniwalang namatay ito dahil sa bakuna.

Naninindigan ang mga magulang ng bata na mismong si Kent umano ang nagsabi sa kanila na siya ay nabukunahan noong Agosto 13.

Ito ay sa kasagsagan umano ng school-based immunization program ng gobyerno kung saan binabakunahan ng MR at TD ang mga bata.

Nilagnat umano ang bata at naconfine sa ospital at pagdating ng Agosto 19 ay binawian ito ng buhay.

Sa isang pulong balitaan araw ng Martes, nanindigan ang Provincial Health Office na base sa kanilang imbestigasyon hindi nabakunahan ang bata.

Giit ni Dr. Cornelio Cuachon ng PHO wala umano sa listahan ng batang nabakunahan sa Makato Integrated School si Kent.

Sa kabila nito sumisimpatiya umano ang Health Office sa pamilya. Umaasa rin siya na ang resulta ng otopsiya ay magbibigay ng linaw sa insidente.

Ang paaralan at ang mga Health Office ng munisipyo at ng probinsiya ay naghahanap ng paraan na makatulong sa paraan na hindi ito mamimis-interpret.##

- Darwin Tapayan, Energy FM Kalibo

ILANG PRINCIPAL SA AKLAN KONTRA SA SCHOOL-BASED IMMUNIZATION AYON SA PROVINCIAL HEALTH OFFICE

ILANG PRINCIPAL sa Aklan ang umano'y nangangampanya kontra sa School-Based Immunization program ng gobyerno.

Ito ang malungkot na rebelasyon ni Dr. Cornelio Cuachon ng Provincial Health Office sa isang pulong balitaan araw ng Martes.

Sinabi ni Cuachon na ang programang ito ay partnership ng Department of Health, Department of Education, Department of Interior and Local Government at pamahalaang lokal ng probinsiya.

Ipauubaya na umano niya sa DepEd ang pagbibigay disiplina sa mga principal na ito.

Nagsimula ang immunization program na ito sa unang araw ng Agosto at inaasahang magtatapos sa huling araw ng Setyembre.

Ayon kay Cuachon mababa umano ang porsyento ng mga nagpapabakunang mga bata ngayon. May mga magulang rin umano na tumatanggi na mabakunahan ang mga bata.

Posibleng dulot anya ito ng isyu sa dengvaxia vaccine. Dagdag pa ang isyu ng pagkamatay kamakailan ng 12-anyos na bata sa Makato na paniwala ng pamilya ay dahil sa bakuna.

Sa kabila nito, nanindigan si Cuachon na base sa kanilang pag-aaral ang mga bakuna sa measles and rubella (MR) at Tetanus and Diphtheria (Td) ay ligtas.

Iginiit pa niya na ang pagpapabakuna ay mahalaga para sa kalusugan ng bata at sa pagsugpo ng pagkahawa ng sakit sa iba.##

- Darwin Tapayan, Energy FM Kalibo