Lalakeng lango sa alak, arestado sa pagbibitibit ng baril sa Boracay

NI DARWIN TAPAYAN, ENERGY FM 107.7 KALIBO

Nakapiit na sa Aklan Rehabilitation Center ang isang 35-anyos na lalake matapos sampahan ng kasong paglabag sa RA 10591 o Illegal Possession of Firearms.

Inaresto ng mga kapulisan si Ryan Christian Barredo, tubong Guinbaliwan, New Washington at kasalukuyang naninirahan sa isla ng Boracay, banda alas-7:00 ng gabi sa So. Tolubhan, Brgy. Manoc-manoc, Malay.

Ito ay matapos na nagkaroon umano ng kaguluhan sa pagitan nila ni Teddy Martin, residente ng naturang lugar.

Sa report ng Boracay Tourist Assistance Center (BTAC), nagtangkang bumunot ng baril ang suspek, subalit napigilan ito ng biktima at ng kanyang pamangkin.

Sa pagresponde ng mga kapulisan ay narekober sa lugar ang .45 caliber ng baril na may mga bala na pagmamay-ari ng naturang suspek. Agad namang inaresto si Barredo na napag-lamang lango sa alak.