25 RESORTS MAY PERMIT TO OPERATE NA PARA SA MULING PAGBUBUKAS NG BORACAY ISLAND SA OCT. 26

DALAWAMPU’T LIMANG resorts ang mayroon ng permit para mag-operate simula sa soft reopening ng Boracay sa October 26.

Ayon sa Department of Environment and Natural Resources, magbubukas ang kabuuang 1,000 kwarto sa unang araw ng operasyon ng isla matapos ang ilang buwang pagsasara.

Ang hotel na mayroong 40 rooms pataas na nasa beach front ay dapat na may sariling sewerage treatment plant habang ang istablisyimentong may 49 rooms pababa ay kailangang nakakonekta sa sewer line ng isla.

Bukod sa limitadong operasyon ng mga istablisyimento na may kumpletong permits mula sa lokal na pamahalaan, DENR at kaukulang ahensya ng gobyerno, ireregulate rin ang mga aktibidad sa waterfront ng boracay.

Bawal na rin sa beach front ang fire dance, fish feeding, coral picking, open fire, paggamit ng kerosene lamps, mga lamesa, upuan at ibang gamit gayundin ang malalaking beach umbrella, souvenir shops at electirical lights.

Mayroon na ring no-build, no-party at no smoling zones sa loob ng 25 plus 5 meters ng beachfront.
Maski ang pagtatanim ng mga puno ng niyog ay nangangailangan ng permit mula sa DENR.##

- Radyo INQUIRER

200 LIFEGUARDS SUMAILALIM SA TRAINING NG COAST GUARD SA BORACAY

BILANG PAGHAHANDA sa muling pagbubukas ng isla ng Boracay sa October 26 ay sumailalim sa training ang nasa 200 mga lifeguards.

Mismong ang Philippine Coast Guard (PCG) Western Visayas ang namuno sa naturang training.

Ayon kay Captain Allan Victor dela Vega, district commander ng PCG 6, ang mga lifeguards ay mula sa mga resort at hotel na nakatayo sa lugar.

Aniya, layunin ng programa na tiyaking qualified ang mga lifeguards upang masiguro ang kaligtasan ng publiko.

Ayon pa sa PCG, ang mga establisyimento na nakatayo sa may beachfront ay dapat mayroong mas maraming mga lifeguard.

Ayon pa kay dela Vega, hindi lamang sapat na marunong lumangoy ang mga lifeguards, kundi ay dapat marunong din sila ng techniques at tamang paggamit ng rescue equipment.

Tinuruan din ng PCG ang mga lifeguards ng gagawin sakaling magkaroon ng oil spill.##

- Radyo INQUIRER

PENRO TALABERO PINAGSOSORRY SA TAUMBAYAN NI MAKATO VICE MAYOR LEGASPI

PINAG-SOSORRY NGAYON ni Makato Vice Mayor Bob Legaspi si Provincial Environment and Natural Resources Officer - Aklan Valentin Talabero sa taumbayan.

Kasunod umano ito ng binitawang pahayag ni Talabero sa isang radio station na "politicking science" ang nasa likod ng pagpapasara ng Sangguniang Bayan sa tambakan ng basura sa kanilang bayan.

Ito ang hiniling ng bise alkalde at iba pang miyembro ng Sanggunian sa PENRO sa technical conference ng Environmental Management Bureau hinggil sa pagpapasara ng tambakan ng basura.

Nanindigan si Vice Mayor Legaspi na walang pamumulitika sa likod ng nasabing resolusyon na ipinasa nila na nagrerekomenda na isara ang tambakan ng basura sa Brgy. Cabatanga.

Ayon kay Legaspi ang kanilang aksiyon ay base umano sa kanyang personal na obserbasyon sa lugar na aniya ay hindi sumusunod sa mga environmental laws.

Binanggit rin ng opisyal na maaaring makasuhan administratibo ang PENRO dahil sa malisyoso niyang pananalita.

Nabatid na hindi pa nakakabisita sa lugar si Talabero. Humingi naman ito ng "sorry" sa Sangguniang Bayan sa nasabing conference pero nais ni Legaspi na mag public apology ito on air.##

- Kasimanwang Darwin Tapayan, Energy Fm 107.7 Kalibo