Mamamayan sa Kalibo, buong Aklan pinag-iingat sa mga nag-iinspeksyon ng LPG

NAGBABALA ANG Sangguniang Barangay ng Poblacion, Kalibo sa taumbayan na mag-ingat sa mga nagbabahay-bahay at nag-aalok na inspeksyunin ang LPG.

Ayon kay Kagawad Kim Melgarejo, ilang reklamo umano ang natanggap ng barangay kaugnay sa mga taong ito na nag-iinspeksyon ng walang mga kaukulang dokumento.

Sinabi ni Melgarejo na kahit walang sira ang LPG ay sasabihin nito na hindi na ligtas at isa umano sa kanilang modus ang mag-alok ng mga gadget para sa LPG para bilhin ng taumbahay.

Hindi umano mga taga-rito ang mga ito na ilan sa kanila ay dumarayo pa mula sa Cebu at sa ibang lugar. Wala umano itong koordinasyon sa Bureau of Fire Protection (BFP)-Kalibo at sa Sangguniang Barangay.

Samantala, sinabi naman ni FO1 Sandro Fernando, tagapagsalita ng BFP-Kalibo na tanging ang mga bombero lamang ang otorisadong mag-inspeksyon sa mga bahay kabilang na ang mga LPG.

Sa ngayon umano wala silang binigyan ng otoridad na magsagawa ng ganitong pag-iinspeksyon. Ang BFP umano ay nag-iinspeksyon sa mga establishment kapag nag-aapply ng business permit.

Kaugnay rito, sinabi ni Fernando na ang mga otorisadong mag-inspeksyon ay nakasuot ng uniporme ng BFP at may otorisasyon mula sa pumunuan ng lokal ng BFP at may ugnayan sa barangay.

Kapag may ganito aniyang insidente ay ireport lamang sa barangay, sa kapulisan o sa mga bombero.##

- Kasimanwang Darwin Tapayan, Energy Fm 107.7 Kalibo

MGA MENOR DE EDAD NIRESCUE SA KANILANG "HIDE-OUT" SA KALIBO

NIRESCUE NG ng mga otoridad ang mga menor de edad na nagtatago umano sa isang bahay kubo sa Purok 2 C. Laserna, Brgy. Poblacion, Kalibo umaga ng Miyerkules.

Tatlong lalaki at dalawang babae na pawang mga menor de edad ang naabutan ng Pulis Kalibo, social worker ng munisipyo at mga opisyal ng barangay sa itnuturing nilang hide out.

Una rito, nakatanggap ng petisyon ang Sangguniang Barangay ng Poblacion na ipagiba ang bahay kaugnay ng reklamo sa mga menor de edad na nag-iingay.

Ayon kay Punong Barangay Niel Candelario, umiinom umano ang menor at doon narin natutulog sa nasabing kubo. Ilan rin umano sa mga ito ang sangkot sa mga kaso ng nakawan sa bayang ito.

Wala na umanong nakatira sa bahay na ito na pagmamay-ari ni alyas Tatang.

Ginawa nang tuluyan ng mga menor de edad ang kubo kapag naglalayas sa kanilang sariling bahay. Galing umano sila sa iba-ibang barangay sa Kalibo.

Dalawa pang menor de edad - lalaki at babae ang naiulat sa Barangay na naglayas at hindi naabutan doon sa lugar.

Pinasasara at pinababatanyan na ng barangay sa mga tanod ang nasabing bahay para hindi na muling matirhan ng mga menor.

Nasa pangangalaga na ngayon ng Women and Children and Protection Desk ng Municipal Social Welfare and Development Office ng Kalibo ang mga nasabing bata para sa kaukulang disposisyon.##

- Kasimanwang Darwin Tapayan, Energy Fm 107.7 Kalibo