MGA INTERNATIONAL DELEGATE NG ISANG CATHOLIC MOVEMENT NASA AKLAN PARA SA CULTURAL IMMERSION

Nasa Aklan ngayon ang 21 delegates mula Asia, Europe, at South America bahagi ng kanilang international youth festival na tinatawag na “GenFest".

Ang pagtitipong ito na inorganisa ng isang international Catholic movement sa Roma ay gaganapin sa Manila sa Hulyo 6-8. Lalahukan ito ng 7,500 kabataan mula sa 99 bansa.

Bago ang malaking pagtitipon na ito, ang mga delegado ay ipapadala sa iba-ibang lugar sa bansa para sa "Pre-GenFest" para sa kanilang cultural immersion.

Isa ang Kalibo sa mga lugar na ito kasama ang Baguio, Cebu, Dumaguete, Eastern Samar, La Union, Las Piñas, Leyte, Manila, Masbate, Palawan, Pangasinan, Pasay, Tagaytay, at Tarlac.

Magtatagal ang grupong ito hanggang Hulyo 5. Kabilang sa kanilang mga aktibidad ang Sadsad sa Kalye and the Kultura Night, Dinner and Jam Night.

Maglilibot rin sila sa ilang tourist destination sa kabiserang bayang ito kabilang na ang ipinagmamalaking Bakhawan Eco-Park.

Una nang hinikayat ni konsehal Philip Kimpo, committee chair on tourism, ang iba-ibang ahensya at tanggapan ng pamahalaan na makibahagi sa tagumpay ng pagdiriwang na ito.

"The staging of the 'Kalibo Pre-GenFest 2018 International Youth Gathering' will be a great opportunity for tourism and cultural promotions of our vibrant town of Kalibo," pahayag ni Kimpo sa ipinasa niyang resolusyon kaugnay rito. | Darwin Tapayan, EFM Kalibo

PAGKAKAROON NG IISANG PALABABAYAN SA WIKANG AKLANON ISINUSULONG NG NATIONAL ARTIST

Virgilio Almario

Isinusulong ngayon ng National Commission for Culture and the Arts (NCAA) ang pagkakaroon ng iisang palabaybayan ng mga salitang Aklanon.

Sa Marso 6-8, isang seminar at kumperensiya ang idadaos sa Aklan Training Center sa New Buswang para sa nabanggit na layunin.

Pangungunahan ito ng pambansang alagad ng sining na si Virgilio Almario, tagapangulo ng NCCA. Si Almario o "Rio Alma" ay isang manunulat, tagapagsalin, guro at makata.

Ayon kay Philip Kimpo, konsehal ng Kalibo at isa ring manunulat, tutulong umano ang NCCA at Komisyon sa Wikang Filipino sa pagbabalangkas ng iisang ortograpiya o palabaybayan sa Aklanon.

Pag-uusapan umano sa aktibidad na ito ang mga suliraning kinakaharap ng Aklanon sa tamang pagbaybay ng mga salita ng sariling dialekto o wika.

Sinabi pa ni Kimpo, tagapagtatag ng AkLit, isang grupo ng mga lokal na manunulat, isang aklat umano ang planong ilathala sa palabaybayan ng lokal na dialekto pagkatapos ng aktibidad.

Ang tatlong araw na "Seminar at Kumperensiya sa Wikang Akeanon at Wikang Pambansa" ay bahagi parin ng Madya-as Art Festival, isang lokal na pagdiriwang ng sining at panitikan.

Dadaluhan ito ng mga manunulat, mga guro at mga mag-aaral mula sa iba-ibang paaralan sa probinsya. - Darwin Tapayan, EFM Kalibo

MGA KASIMANWA NA-MISS NYO NA BA ANG ESTATWANG ITO? NALALAPIT NA ANG KANYANG PAGBABALIK!

Mga Kasimanwa baka namiss nyo na ang estatwang ito na inalis sa kanto ng Archbishop Reyes St. at Mabini St. noong Marso.

Pinag-aaralan na kasi ngayon ng Sanggunian Bayan ng Kalibo ang planong pagbabalik nito. Isa sa mga tinitingnang paglilipatan nito ay sa Pastrana Park.

Ayon kay vice mayor Madeline Regalado, pwede anyang isama ito sa bagong tayong ‘Vibrant Kalibo’ photo ops para dagdag-atraksiyon. Kailangan lamang anya na pintahan ito at pagandahin

Nakatakda namang maghain ng resolusyon si SB member at committee chair on tourism Philip Kimpo Jr. para sa paglilipatan ng nasabing estatwa.

Nilinaw naman niya ang nasabing estatwa ay hindi si “Datu Bangkaya” kundi isa lamang anyang representasyon ng ati, taliwas sa mga itinatawag rito ng ilan.

Matatandaan na una nang nagpasa ng resolusyon sina SB Kimpo at SB Mark Quimpo na ipreserba ang nasabing estatwa matapos itong alisin sa dating kinalalagyan nito.

PAGSASABATAS NG ‘KALYE KULINARYA SA KALIBO’ ISINUSULONG SA SANGGUNIANG BAYAN

Ulat ni Darwin Tapayan, Energy FM 107.7 Kalibo

Isinusulong ngayon sa Sangguniang Bayan ng Kalibo ang pagsasabatas ng bagong bukas na “Kalye Kulinarya sa Kalibo” o KKK bilang food tourism destination tuwing gabi sa kabiserang bayang ito.

Binuksan ang food strip na ito sa kahabaan ng Veterans Avenue ika-3 ng Nobyembre kasabay ng ika-446 taon ng Kalibo Foundation Day sa bisa ng executive order para mag-operate sa loob ng 30 araw.

Sa ngayon ay nakasalang na sa ikalawang pagbasa ang proposed draft ordinance no. 24 na inakdaan ni SB member at committee chairperson on tourism Philip Kimpo Jr.

Sa session ng Sanggunian araw ng Huwebes pinuri ng opisyal ang pagtangkilik ng mga mamamayan at ng mga turista sa proyektong ito. Sa kabila nito ay may ilan pa anyang isyu na kailangang bigyan ng pansin. 

Kaugnay rito muling magpapatawag ng pagdinig ang committee on tourism para repasuhin ang ilang mga isyu sa operasyon ng KKK kabilang na ang isyu sa pagsasara ng kalye at iba pa.

Una nang napagkasunduan sa komitiba na isasara lamang ang kalye simula alas-3:30 ng hapon hanggang 12:30 ng madaling araw. 

Umaasa naman ang Sanggunian na mabibigyang tugon agad ang mga problema at mas mapaganda pa ang nasabing proyekto.