Animal welfare advocate pinakakasuhan ang pumatay kay "Bella"

PINAKAKASUHAN NI Animal Kingdom Foundation Inc. president Greg Quimpo ang pumatay sa asong si "Bella" sa Brgy. Laguinbanwa West Huwebes ng umaga.

Sa kanyang facebook Huwebes ng gabi hinikayat ni Quimpo si Kenneth Ang, may-alaga ng naturang aso na isang Siberian Husky, na sampahan ng kaso ang pumatay sa aso.

"A dog's life for a mildly bruised chicken. What a shame," sabi niya sa kanyang facebook post. "Kenneth Ang, let us pursue this case. Give your dog, Bella, the dignity and justice she is worthy of."

Sinabi pa niya na may abogado na tutulong kay Ang para mapakulong ang pumatay sa aso. "Animal rights lawyer, Heidi Marquez of Animal Kingdom Foundation is assisting Kenneth to put in jail the scumbag who did this."

Mababatid na inamin ni John Española sa panayam ng Energy FM Kalibo na pinalo niya ng bara de kabra ang aso ng makalawang ulit hanggang sa ito ay mapatay.

Ito ay matapos umanong mapagkamalan ng kapatid niya na si Raymar na isang "aswang" o mabangis na lobo ang naturang aso na naabutan nilang nilalapa ang ilang panabong na manok na inaalagaan nila.

Ayon kay Kenneth Ang, nagising umano siya at napag-alamang nakawala umano sa kulungan sa kanilang bakuran ang aso at nang komprontahin ang kapitbahay ay nalamang pinatay nila ito.

Nabatid na inireklamo na ni Ang ang kaso sa Numancia PNP at inirefer ang kaso sa Katurungang Pambarangay ng Brgy. Badio.##

- Kasimanwang Darwin Tapayan, Energy FM Kalibo

Alagang aso inakalang aswang ng kapitbahay pinagpapalo patay

[2nd update] NUMANCIA, AKLAN - Isang alagang aso sa Brgy. Laguinbanwa West, Numancia ang pinatay ng kapitbahay matapos umanong mapagkamalang aswang.

Ang aso na isang eight-month old na husky ay alaga ni Kenneth Ang, isang negosyante.

Sa panayam ng Energy FM Kalibo nagising umano siya kaninang umaga at napag-alamang nawawala na sa kulungan ang aso.

Hinanap umano niya ito sa kapitbahay at sinabing inatake umano ng aso na si "Bella" ang mga alaga niyang manok at nagwawala roon.

Napagkamalan umano ito ng kapitbahay na aswang kaya niya ito pinagpapalo ng makailang ulit hanggang sa mapatay.

Ayon kay Raymar Española, nagising umano siya at naabutang nilalapa ng aso ang mga alagang pansabong na manok.

Sinubukan niya itong awatin subalit nanlaban umano ang aso. Inakala umano niya na isa itong aswang dahil sa mabangis at hindi pangkaraniwan niyang kilos.

Nanlaban din umano ang aso sa kuya nitong si John. Inamin naman ni John ang paghambalos ng bara de kabra sa aso ng makalawang beses.

Ipinakita ng magkakapatid na nagbabantay lamang sa mga manok ang tatlong pansabong na manok na may mga sugat sa likod. Nawawala rin ang pitong sisiw na posible umanong kinain ng aso.

Inilibing nila ang aso sa likod na bahagi ng kanilang bakuran bago pa naabutan nalaman ng may-ari na napatay nila ito.

Plano naman nilang makipag-ayos sa nag-alalaga ng aso.##

- Kasimanwang Darwin Tapayan, Energy FM Kalibo

Suspek sa pagpatay sa alagang aso sa Numancia umamin, itinuro 2 kasama

UMAMIN SA mediation ng Barangay Council ng Tabangka, Numancia ang suspek na pumatay sa alagang aso ng kapitbahay at itinuro ang dalawa nitong kasama.

Batay sa mediation report, sinabi ng suspek na si Joemar Sorilla hinabol umano niya at pinalo ang dachshund gamit ang pinutol na kawayan na naging dahilan ng pagkamatay.

Dinala umano niya ito sa bahay ni Meejay Masallo kung saan sila nag-iinuman sa Brgy. Tabangka. Gayunman sinabi ni Sorilla na bago niya pinalo ang aso ay sinaksak na ito ng isa pa niyang kasama sa inuman na si certain Edison.

Pagkatapos umanong mapatay ang aso ay hindi na alam ni Sorilla ang sunod na nangyari dahil umalis ito para umuwi sa kanilang bahay sa Brgy. Cabayugan sa bayan ng Malinao.

Walang nangyaring pagkaayos sa pagitan ng suspek at nagrereklamo na si Desiderio Isturis ayon sa mediation ng barangay council nitong Miyerkules na pinangunahan ni Punong Barangay officer in charge Geneva Permison.

Ipapatawag pa sa susunod na mediation ang ang dalawa na itinuturo ni Sorilla na kasama niya sa pagpatay sa nasabing aso para hingin ang kanilang panig.

Samantala, napag-alaman na na-trauma ang mga bata sa bahay ni Isturis dahil sa pagkawala ng kanilang alagang aso noong Pebrero 8.

Nagbigay ng isang aso ang kanilang kapitbahay kapalit ng pinatay na aso para maibsan ang kalungkutan ng mga bata.##

- Kasimanwang Darwin Tapayan, Energy FM Kalibo

Aso na binalatan, binitay sa palengke ng Makato inimbestigahan ng animal welfare advocate group

[Exclusive] MARAMI ANG nagalit sa naibalitang pagbalat sa isang aso na iniwang nakabitay sa loob ng pamilihang bayan ng Makato araw ng Martes.

Kaugnay rito isang non-goverment organization na nangangalaga sa kapakanan ng mga hayop kabilang na ang aso ang nagtungo sa lugar at nag-imbestiga.

Ayon kay Greg Quimpo, presidente ng Animal Kingdom, nabahala umano siya sa nabalitaan kaya nagtungo siya nag-imbestiga kasama ang Makato PNP ngayong araw.

Aniya gusto niyang sampahan ng kaso ang mga kumatay sa nasabing aso gayunman wala umanong humaharap na testigo.

Batay rin umano sa amo ng aso na si Helen, bago ang pagbalat sa aso nalaman umano niya na nasagasaan ng sasakyan ang kanyang alaga.

Hindi umano niya nakita ang aso kung buhay pa ito o hindi nang masagasaan hanggang sa malaman nalang niya na ang asong binalatan at iniwang nakabitay sa loob ng palengke ay ang nawawala niyang aso.

Kaugnay rito, nagbabala si Quimpo na ang mahuhuling nanakit o kumakatay ng aso ay posibleng maparusahan o makulong. Paglabag umano ito sa Republic Act 8485 o "Animal Welfare Act".

Magsasagawa umano siya ng report ng imbestigasyon at ipapasa sa alkalde ng Makato. Balak rin niyang paigtingin pa ang kaalaman ng mga tao sa bayan kaugnay ng nabanggit na batas.##

- ulat ni Kasimanwang Darwin Tapayan, Energy FM Kalibo